ބްލެކްހެޑްސް ހުންނަނީތަ މިހެން ހަދާ

ބްލެކްހެޑްއަކީ ބައެއް މީހުންނަށް ދިމާވާ މައްސަލައެކެވެ. މޫނުމަތީގައި ނަގާ ބްލެކްހެޑްސް ނައްތާލުމަށް ބައެއް މީހުން ވަރަށް ބޮޑު ހޭދައެއްކުރުމަށްފަހު ސެލޫންތަކަށްވެސް ދެއެވެ. ނަމަވެސް ކޮންމެ ފަހަރަކު ސެލޫންއަށް ދިއުމުގެ ބަދަލުގައި މިއީ ގޭގައި ދޭ ފަރުވާއަކުންވެސް ހައްލު ލިބިދާނެ ކަމެކެވެ. އެގޮތުން މި ހިމަނާލަނީ ބްލެކްހެޑްސްއަށް ގޭގައި ދެވިދާނެ ބައެއް ފަރުވާއަށެވެ.

ލުނބޯ އަދި މާމުއި

ލުނބޯ މެދުން ފަޅިކޮށްލާފައި އެއް ފަޅިއަށް މާމުއި އަޅާށެވެ. ދެން އޭގެ މައްޗަށް ސައިބޯން ބޭނުންކުރާ ހަކުރުކޮޅެއް އަޅާށެވެ. ބްލެކްހެޑްސް ހުރި ހިސާބުގައި ލުނބޯ ފަޅިން މަސާޖުކޮށްލާށެވެ. ނަތީޖާ ފެންނަންދެން ހަފްތާއަކު 1 ފަހަރު މިހެން ހަދާށެވެ.

advertisement

ފޮނިތޮއްޓާއި އޯޓްސް ފްލާ

ސައިސަމުސަލެއްގެ މުގުރާ ހިމުންކޮށްފައި ހުރި ފޮނިތޮއްޓާއި ހަމަ އެހާ ވަރަށް އޯޓްސް ފުށް އެއްކުރާށެވެ. ދެން ފެންފޮދެއް ޖަހައިގެން ރަނގަޅަށް އޮލަ ކްރީމަކަށް ވަންދެން އެއްކުރާށެވެ. ދެން ބްލެކްހެޑްސް ނަގާފައި ހުރި ހިސާބުތަކުގައި މި ކްރީމުން މިނިޓެއްހާއިރު ވަންދެން ސްކްރަބް ކުރުމަށްފަހު ފިނިކޮށް ހުރި ފެނުން ދޮވެލާށެވެ. މިއީ މަހަކު ދެ ފަހަރަކު ދޭން ރަނގަޅު ފަރުވާއެކެވެ.

އެލޫވެރާ، ވައިޓް ކްލޭ އަދި އެސެންޝަލް އޮއިލްސް

ސައިސަމުސަލެއްގެ އެލޫވެރާ ޖެލް އާއި ދެ ސައިސަމުސަލުގެ ވައިޓް ކްލޭ އެއްކުރާށެވެ. ދެން ސަމުސަލެއްހާ ޑިސްޓިލްޑް ވޯޓާ އެއްކުރާށެވެ. އަދި ހައެއްކަ ތިކި އެސެންޝަލް އޮއިލް ޖަހާށެވެ. މި ފޭސް މާސްކް ބްލެކްހެޑްސް ހުންނަ ހިސާބުގައި ހާކާފައި 10 މިނިޓް ބެހެއްޓުމަށްފަހު ހޫނުފެނުން ދޮވެލާށެވެ. މިއީ މަހަކު ދެ ފަހަރު ދިނުމުން ނަތީޖާ ފެންނާނެ ފަރުވާ އެކެވެ.

ހަކުރު، މާމުއި އަދި ޒައިތޫނި ތެލާއި ވެނީލާ އެކްސްޓްރެކްޓް

ޖޯޑެއްގެ ހަތަރުބައިކުޅަ އެއްބައި ހަކުރާއި ހަމަ އެހާ ބްރައުން ޝުގާ ބޯތައްޓަކަށް އަޅައި ރަނގަޅަށް އެއްކުރާށެވެ. ދެން އޭގެ ތެރެއަށް ސައިތޫނިތެލާއި މޭޒުމަތީ ސަމުސަލެއްގެ މާމުއި އަޅާ ރަނގަޅަށް ގަށާށެވެ. އަދި ސައިސަމުސަލެއްގެ ދެބައިކުޅަ އެއްބައި ހުންނަހާ ވެނީލާ އެކްސްޓްރެކްޓް އަޅާ އެއްކޮށްލާށެވެ. ރަނގަޅަށް އޮމާންވާ ވަރަށް އެއްވުމުން ސްކްރަބް އެއް ގޮތަށް ބްލެކްހެޑްސް ހުރިހިސާބުތަކުގައި ހާކާށެވެ. އަދި ހޫނުފެނުން ދޮންނާށެވެ. މި ފަރުވާ ހަފުތާއަކު އެއްފަހަރު ދިނުން ރަނގަޅުވާނެ އެވެ