އަލީ ސާހިލް: ކުރިން ރައްޓެހިވެގެން އުޅުނު އަންހެން ކުދިންނަށްވެސް އަނިޔާ ކުރި

ރޭގެ ދަންވަރުގެ ވަގުތެއްގައި އަނިޔާވެރި ގޮތަކަށް, ހ. ޝީރީން ވިލާގައި އަންހެނަކު މަރާލާފައި ވާ މައްސަލައާއި ގުޅިގެން ހައްޔަރުކޮށްފައިވާ އަލީ ސާލިހު އޭނާ ކުރިން ރައްޓެހިވެގެން އުޅުނު އަންހެނުންނަށް ވެސް އަނިޔާކުރާ ކަމަށް އޭނާގެ ރައްޓެހިންގެ ފަރާތުން ލިބުނު މައުލޫމާތުން ހާމަވެއްޖެ އެވެ.

މިގޮތުން، މި ނޫހާއި މައުލޫމާތު ހިއްސާ ކުރަމުން އޭނާގެ ރައްޓެއްސަކު ބުނެފައި ވަނީ އޭނާ ލޯބީގެ ގޮތުން މިހާތަނަށް ގުޅިފައިވާ ގިނަ އަންހެނުންނަށް އޭނާ އަބަދުވެސް އަނިޔާ ކުރާކަން މީހުންނަށް އެނގޭ ކަމަށެވެ. 

advertisement

ކަން ހިނގި ގޮތް

މައުލޫމާތު ލިބިފައިވާ ގޮތުގައި އަލީ ސާހިލް ހަމަލާ ދީ މަރާލާފައި ވަނީ އޭނާ ލޯބީގެ ގޮތުން ގުޅިގެން އުޅޭ އަންހެން މީހާ އެވެ. އޭނާ ހައްޔަރު ކުރި ވަގުތު އެ ގޭ ކައިރީގައި އެއްވެ ތިބި މީހުންނާއި ފުލުހުން ނުރަސްމީކޮށް ނޫސްތަކާއި ހިއްސާކޮށްފައިވާ މައުލޫމާތުން ބެލެވެނީ އެ އަންހެން މީހާގެ ބޮލާއި ހަށިގަނޑު ވަކި ކޮށްފައިވާ ކަމަށެވެ.

އެތަނަށް އެޓެންޑު ވި ފުލުހަކާއި ހަވާލާ ދީ ދިޔަރެސް ނޫހުން ރިޕޯޓުކޮށްފައިވާ ގޮތުގައި ބެލެވެނީ އޭނާ އެ އަންހެންމީހާގެ ހަށިގަނޑުގެ ގުނަވަންތައް ބުރިކޮށްފައި ވަނީ ހަށިގަނޑު ޑިސްޕޯސްކުރުމުގެ ބޭނުމުގައެވެ. ފުލުހުން ތަފާތު ދެ ބޮޑީ ބޭގް އެމްބިއުލާންސަށް އެރުވި މަންޒަރު ފެނުނު ކަމަށް އެ ސަރަހައްދުގައި ތިބި މީހުން މައުލޫމާތު ދެއެވެ. 

ސާހިލުގެ ރައްޓެއްސަކު އޭނާގެ އެހެން ރައްޓެހިންތަކަކާއި އެކު ވާހަކަ ދައްކާފައިވާ ޗެޓް ލޮގެއްގެ ސްކްރީން ޝޮޓް މިނޫހަށް ލިބިފައިވެއެވެ. މި ޗެޓް ގައި އޭނާގެ ރައްޓެއްސަކު ބުނެފައިވަނީ ސާހިލު ހައްޔަރުކޮށްފައިވަނީ ލެއިން ފޯވެގެން އެގޭ ބޭރުގައި ހުއްޓާ ކަމަށެވެ.

ފުލުހުންގެ ރަސްމީ ބަސް

މި މައްސަލަ އާއި ގުޅިގެން ނޫސްވެރިންނަށް މައުލޫމާތު ދިނުމަށް މިއަދު ހަވީރު ބޭއްވި ނޫސް ކޮންފަރެންސްގައި، ފުލުހުން ވިދާޅުވެފައިވަނީ ސާހިލުގެ ކުށުގެ ރެކޯޑެއް ނެތް ކަމަށެވެ. ނަމަވެސް، އޭނާ ހައްޔަރު ކުރި އިރު ހުރީ މަސްތުގެ ހާލަތުގައި ކަމަށާއި، ވިކްޓިމް މަރާލުމަށް ބޭނުންކުރި ކަމަށް ތުހުމަތު ކުރެވޭ ހަތިޔާރު ފުލުހުން ހޯދާފައިވާ ކަމަށް ވެސް ފުލުހުން ވިދާޅުވެފައިވެއެވެ. 

Police confirmed today the murder suspect Sahil had no prior criminal record. The gruesome murder of the young woman last night shocked the nation. The police were unable to answer many pressing questions as the investigation is still ongoing. pic.twitter.com/CM6hkgWPid— MV+ (@mvplusmedia) August 7, 2022

ހ. ޝީރީން ވިލާގެ އެ އެޕާޓްމަންޓަކީ އެހެން ބަޔަކު ދިރިއުޅޭ ގެއެއް ތޯ ނޫސްވެރިޔަކު ކުރި ސުވާލަށް ޖަވާބުދެމުން ފުލުހުން ވިދާޅުވެފައި ވަނީ “އެއީ ސާހިލު ކޮންމެވެސް ވަރަކަށް ދިރުޅޭ ގެއެއް” ކަމަށެވެ. ބެލެވޭ ގޮތުގައި އެގެއަކީ ސާހިލު އާއި އަންހެންމީހާ އެކުގައި ދިރިއުޅޭ ގެއެއް ނޫން ނަމަވެސް، ކޮންމެވެސް ވަރަކަށް ގޮސް އުޅޭ ގެއެކެވެ.

ސާހިލު ބޭނުންކޮށްގެން ހުރީ ކޮން ބާވަތެއްގެ މަސްތުވާ އެއްޗެއް ތޯ ފުލުހުން ކަށަވަރުކޮށް ދީފައި ނުވާ ނަމަވެސް، މައުލޫމާތު ލިބޭ ގޮތުގައި އާއްމުކޮށް ނުފެންނަ ބާވަތެއްގެ މަސްތުވާ ތަކެތީގެ ބާވަތެއް އެ ގެ ހުރި ސަރަހައްދުގައި މަސްތުވާތަކެތި ބޭނުން ކުރާ މީހުން މިދުވަސްވަރު ގެންގުޅެއެވެ. 

ފިރިހެނުން އަންހެނުންނަށް ގެވެށި އަނިޔާކުރަނީ ކީއްވެ؟

މުޖުތަމައުގައި ފިރިހެނުން އަންހެނުންނަށް އަނިޔާ ކުރާ މައްސަލަތަކަކީ އަހަރުމެންތެރޭގައި ނޭނގޭ ވާހަކަ އެއް ނޫނެވެ. 

ބައެއް ފިރިހެނުން އަންހެނުންނަށް އަނިޔާ ކުރަނީ އެމީހުންގެ ބައިވެރިޔާ އާއި ގާތް ގުޅުން ގާއިމުކުރާނެ އެހެން ގޮތެއް އެމީހުންނަށް ނޭނގޭތީއެވެ. މިފަދަ ބައެއް މީހުން ބޮޑު ވަމުން އަންނަ އިރު، ބައްޕަ މަންމަ އަށް އަނިޔާކުރާ މަންޒަރު އަބަދުމެ ފެނި އެކަން އާއްމުކަމަށް ވެފައިވާނަމަ، ނުވަތަ އެމީހާއަށް މައިންބަފައިން އާއްމުކޮށް އަނިޔާ ކުރާނަމަ، އެފަދަ ފިރިހެނުންނަށް ހަޔާތުގެ ބައިވެރިޔާ އާއި އެކު އަނިޔާވެރި ނޫން ގޮތަކަށް އުޅެން ނޭނގޭ ކަމަށް މިފަދަ މީހުންގެ އުޅުން ދިރާސާކުރާ ފަރާތްތަކުން ހާމަކުރެއެވެ. 

މިފަދަ އަނިޔާވެރި އަމަލުތައް ހިންގާ މީހުންގެ ކިބައިން އެންމެ އާއްމުކޮށް ފެންނަ އެއްގޮތް ކަްންކަމަކީ، މިފަދަ މީހުންނަށް ކުޑަ އިރު ލިބިފައިވާ އަނިޔާއެވެ. ހާއްސަކޮށް ގާތް، ލޯބިވާ ނުވަތަ އާއިލާ މީހުންގެ ފަރާތުން ދިމާވާ ޖިސްމާނީ އަދި ނަފްސާނީ އަނިޔާތަކަށް ލިބެންޖެހޭ ސައިކޯތެރަޕީ ނުލިބި ތިބޭ މީހުން، އަންހެނުންނަށް އަނިޔާވެރި ވާކަމަށް ދިރާސާތަކުން ދައްކައެވެ. އާއްމުގޮތެއްގައި ފިރިހެނުން އަންހެނުންނަށް އަނިޔާކުރަނީ އަންހެން މީހާ ކޮންޓްރޯލް ކުރުމަށާއި، އޭނާގެ ދިރިއުޅުމުގެ މައްޗަށް ބާރުފޯރުވައި ތިމާގެ ގަދަ ބާރު ދެއްކުމުގެ ބޭނުމުގައެވެ. ނުވަތަ އަންހެން މީހާއަށް ވަރަށް ބޮޑަށް ބަރޯސާ ވެގެން ދިރިއުޅުމުގެ ކަންކަން ހަމަޖައްސާ މީހެއް ނަމަ އެ އަންހެން މީހާ ބާރުވެރިވުމަށްޓަކައި ކުރާ ކަންކަމުގެ ސަބަބުން ތިމާގެ ބާރާއި ނުފޫޒާއި ކޮންޓްރޯލް ދިރިއުޅުމުން ގެއްލޭ ހެން ހީވުމާ ހާލަތް ތަކުގައި ވެސް ފިރިހެނުން އަންހެނުންގެ މައްޗަށް އަނިޔާވެރިވާ ކަމަށް ދިރާސާވެރިން ބުނެއެވެ. 

އަންހެން މީހާގެ އާއިލާގެ އެދުން

މަރުވެފައިވާ އަންހެންމީހާގެ ގެ އާއިލާއިން އެދެނީ އޭނާގެ ފޮޓޯ ތައް ސޯޝަލް މީޑިޔާގައި ދައުރު ނުކުރުމަށެވެ. އަދި ނޫސްވެރިން މި ހާދިސާ ރިޕޯޓު ކުރުމުގައި ޒިންމާދާރު ވުމަށާއި، ތަފާތު އެކި ގޮތްގޮތަށް ހަގީގަތާއި ހިލާފު ވާހަކަތައް ނުފެތުރުމަށް ވެސް އާއިލާ އިން އެދެއެވެ.