ތާރީހުގެ ތެރެއިން: ޑރ. އަފްރާޝީމުގެ އަނިޔާވެރި މަރު

ޑރ. އަފްރާޝީމަކީ ކާކު؟

ރ. އުނގޫފާރަށް އުފަން، ޑރ އަފްރާޝީމް އަލީ ފުރަތަމަ ތަޢުލީމު ހާސިލުކުރެއްވީ މާޅޮސްމަޑުލު އުތުރުބުރީ އުނގޫފާރު ސްކޫލުންނެވެ. އެއަށްފަހު އެ އަތޮޅު މީދޫ ތަޢުލީމީ މަރުކަޒުން ކިޔެވުމަށްފަހު، މާލޭގެ ފުލުސް ކޯޓުގެ ކާތިބެއްގެ ވަޒީފާގައި އުޅުއްވިއެވެ. ޑޮކްޓަރ އާމިނަތު ޖަމީލާގެ އާއިލާ މެލޭޝިޔާއަށް ބަދަލުވި އިރު، ދަރިފުޅަށް ޤުރްއާން ކިޔަވައި ދިނުމަށްޓަކައި ޑޮކްޓަރ އަފްރާޝީމް މެލޭޝިޔާއަށް ގެންދިޔައެވެ. އެމަނިކުފާނު ތައުލީމު ހާސިލު ކުރަން ފެށީ ޑރ. އާމިނަތު ޖަމީލާގެ ދެމަފިރިންގެ އެހީތެރިކަމާއެކު އެވެ. އެދުވަސްވަރު، އިސްލާމިކް ޔުނިވަރސިޓީ އޮފް މެލޭޝިޔާގެ މިސްކިތުގެ އިމާމުކަންވެސް ކުރެއްވިއެވެ.

ޑިގްރީ ހާސިލުކޮށްފައިވަނީ ފިޤްހު އަދި އުޞޫލުލް ފިޤްހުގެ ރޮނގުންނެވެ. 2000 ވަނަ އަހަރު ޑިގްރީ ހާސިލުކުރެއްވުމަށް ފަހު، މާސްޓާސް ހާސިލުކުރެއްވީ 2003 ވަނަ އަހަރުގައެވެ. އެއަށް ފަހު ފިޤްހު، އަދި އުޞޫލުލް ފިޤްހުގެ ރޮނގުން ޕީއެޗްޑީ ހާސިލު ކުރެއްވީ ވެސް މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީންނެވެ. އެއީ 2007 ވަނަ އަހަރުއެވެ.

advertisement

ސިޔާސީ މަސައްކަތްތައް

ޕީއެޗްޑީ އަށްފަހު މާލެ ވަޑައިގެން ފުރަތަމަ އަދާކުރެއްވީ، އިސްލާމީ މަރުކަޒުގެ އިސް އިމާމުކަމުގެ ވަޒީފާއެވެ. އެއަށްފަހު ސަރުކާރުގެ މަތީ މަގާމުތައް އަދާކުރައްވާފައިވެއެވެ. ރައްޔިތުންގެ މަޖިލީހުގެ އިންތިޚާބުގައި، އުނގޫފާރު ދާއިރާގެ މެންބަރު ކަމުގެ ގޮނޑި ކާމިޔާބު ކުރައްވައި، ރައްޔިތުންގެ މަޖިލީހަށް ވެދެވަޑައިގަތީ 2009 ވަނަ އަހަރު އެވެ.

އަދި ޖުޑީޝަލް ސަރވިސް ކޮމިޝަންގެ މެންބަރުކަމާއި، އެ ކޮމިޝަންގެ ނައިބު ރައީސްކަމާއި، ދިވެހި ރައްޔިތުންގެ ޕާޓީ (ޑީ.އާރު.ޕީ.)ގެ ދީނީ، އިޖުތިމާޢީ ގޮފީގެ ރައީސްކަމާއި، ފަހުން ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް)ގެ ކައުންސިލް މެންބަރުކަންވެސް ކުރެއްވިއެވެ. މަރާލިއިރު ހުންނެވީ ޕީޕީއެމް ގެ ކައުންސިލް މެމްބަރެއްގެ ގޮތުގައެވެ.

ހަށީގަނޑު ފެނުނީ އަނބިމީހާއަށް

ޑރ. އަފްރާޝީމަށް ހަމަލާދީ އަނިޔާވެރިކޮށް މަރާލާފައިވަނީ ޓީ.ވީ މޯލްޑިވްސް އިން އެރޭ ލައިވްކޮށް ކުރިއަށް ގެންދިޔަ [އިސްލާމީ ދިރިއުޅުން] ޕްރޮގްރާމުގައި ބައިވެރިވުމަށް ފަހު ގެއަށް ގޮސް ގޭގެ އެތެރެއަށް ވަދެގެން ދިޔަ ގަޑީގައެވެ. އެރޭ ދަންވަރު ގާތްގަނޑަކަށް 01:15 ހާއިރު ޑރ. އަފްރާޝީމް އަވަހާރަކޮށްލާފައި ވަނިކޮށް އެންމެ ފުރަތަމަ ފެނުނީ އަނބިކަނބަލުން ގުރައިޝާ އަށެވެ.

ޑރ. އަފްރާޝީމް އަވަހާރަކޮށްލުމުގެ ކުރިން އެރޭ ގާތްގަނޑަކަށް 12:00 އެހާއިރު ގުރައިޝާ އަށް ފޯނުކޮށް ކާން ހެދުމަށް އަފްރާޝީމް އެދުނެވެ. ކާން ތައްޔާރުކޮށްގެން ހުރެ، ގެއަށް އައުން ލަސްވާތީ އެގޭގެ ތިންވަނަބުރިން ތިރި ބެލިއިރު އަފްރާޝީމުގެ ކާރު އެގޭ މަގުމަތީގައި އޮތެވެ. ގެއަށް ވަނުން މާބޮޑަށް ލަސްވާތީ ތިރިއަށް ފޭބިއރު ޑރ. އަފްރާޝީމްގެ ލެއިން ތަތްތެޅިފައިވާ ހަށިގަނޑު ފެނުނީ ގޭގެ އެންމެ ތިރީބުރީގައި ސިޑިމަތީގައި އޮއްވާ ކަމަށް ގުރައިޝާ ބުނެފައިވެއެވެ. މަރާލާފައިވަނީ ކަރަށާއި ބޮލަށް ތޫނު އެއްޗަކުން ހަމަލާދީގެންނެވެ.

މަރުގެ ތަހުގީގު

މިހާތަނަށް މި މައްސަލާގައި މަރުގެ ހުކުމެއް އިއްވާފައިވަނީ ހ.ލޮބީ، ހުސެއިން ހުމާމްގެ މައްޗަށް އެކަންޏެވެ. ހުމާމްގެ މައްޗަށް މަރަށް މަރުހިފުމުގެ ހުކުމް އިއްވާފައި ވީނަމަވެސް މިމައްސަލާގައި އަދިވެސް ގޮތްނޭނގޭ އެތައް ވާހަކަތަކެއް ދަނީ ދެކެވެމުންނެވެ. ހުމާމް ލައްވާ އެކަން ކުރުވި ބަޔަކު ތިބިކަމަށް ގަބޫލުކުރެވޭއިރު އެބުނާ ބަޔަކީ ކޮބައިކަމެއް އެއްވެސް ތަހުގީގަކަށް ހާމަވެ، އެމީހުން އަތުވެފައެއް ނުވެއެވެ.

ހުމާމުގެ މައްޗަށް މަރުގެ ހުކުމް އިއްވާފައިވަނީ މީހެއްގެ މައްޗަށް މަރުގެ ހުކުމް ސާބިތުވާނެ ހެކި ހޯދައި އެކަން ސާބިތުކޮށްދެވިގެންނެއް ނޫނެވެ. އެ ހުކުމް އިއްވާފައި ވަނީ ހަމަ އެކަނި އަމިއްލަ އިއުތިރާފުގެ މައްޗަށް ބުރަވެއެވެ. އެކި ފަހަރު އެކި ގޮތައް ކިޔާދިން ވާހަކަތަކާއި ތަހްގީގަށް ދީފައިވާ ބަޔާނަކީ ތެދުތޯ އެހުމުން ޝަރީއަތުގެ މަޖިލީހުގައި ހުމާމް ޖަވާބަކަށް އާނ އެކޭ ބުނުމުންނެވެ. ޝަރީއަތުގެ މަޖިލީހުގައި އެކަން ވީ ގޮތް ހުމާމް ކިޔާދީފައި ނުވެއެވެ. ފުލުހުންގެ ތަހްގީގުގައި ހޯދުނު ހޯދުންތަކާއި މެދު ގިނަ ސުވާލުތަކެއް އަދިވެސް އެބަހުއްޓެވެ.

މަރާލީ ކޮން ބައެއް ކަމާއި މެދު ދެކެވޭ ވާހަކަތައް

ޑރ. އަފްރާޝީމް އަލީ އަވަހާރަކޮށްލަން ފަންޑުކުރީ ރައްޔިތުންގެ މަޖިލީހުގެ މިހާރުގެ ނައިބު ރައީސް ރީކޯ މޫސާ މަނިކުގެ ދަނބިދަރި އަބްދުﷲ ޖާވިދު އާއި އޭނާގެ ބޭބެ ޝަހީން މުހައްމަދު ކަމަށް އެކަމުގެ މަޝްވަރާކުރި މީހުން ހުމާމު ގާތު ބުނި ކަމަށް ހޯމް މިނިސްޓަރ ކަމުގައި ހުންނަވައިގެން  އުމަރު ނަސީރު ވަނީ ވިދާޅުވެފަ އެވެ.

އަދި  ލ. ގަން ތުނޑި، ނޫއަލި، އާދަމް ސަލާޙް (ސްޕައި) ވާހަކަ ދައްކާފައިވާ ކަމަށް ހުމާމް ބުނެފައިވެ އެވެ. ޖާ އާއި ހުމާމްއާ ފޯނުން ގުޅާ ވާހަކަ ދައްކާފައިވާ ކަމަށްވެސް ހޯމް މިނިސްޓަރުގެ މަގާމުގައި ހުންނަވައިގެން އުމަރު ވިދާޅުވި އެވެ. ނަމަވެސް މި މީހުންގެ މައްޗަށް ދައުވާ ކުރަން ފޮނުވި މައްސަލާގައި ޕީޖީން ނިންމާފައިވަނީ އެ މީހުންގެ މައްޗަށް ދައުވާ ކުރެވޭ ވަރަށް ހެކި ނެތް ކަމަށެވެ. އަފްރާޝީމު މަރާލި އިރު ޕޮލިސް ކޮމިޝަނަރަކަށް ހުރި އަބްދުﷲ ރިޔާޒް ވެސް ވަނީ އެކަން ކުރި މީހުން އެނގޭ ކަމަށާއި ވަގުތު ޖެހުމުން އެކަން ހާމަ ކުރާނެ ކަމަށް ބުނެފައެވެ.

ނަމަވެސް މިހާތަނަށް އެއީ ކޮން ބައެއް ކަން އޭނާ ހާމަކޮށްފައެއް ނުވެއެވެ. މައްސަލައިގައި ތުހުމަތު ކުރެވޭ އަޒްލިފް ރައުފް ސީރިޔާގައި މަރުވެފައިވާ ކަމަށް ރަސްމީ ފަރާތްތަކުން ބުނި ނަމަވެސް ބައެއް ފަރާތްތަކުން ބުނާ ގޮތުގައި އޭނާ މަރެއް ނުވެއެވެ. މަރުވެފައިވާ ކަމަށް ބުނެ ފަތުރާފައިވާ ފޮޓޯތަކަކީ ވެސް އަސްލެއް ނޫންކަމަށް ވާހަކަ ދެކެވެއެވެ.

އެންމެ ފަހުގެ ހޯދުންތައް

ހާދިސާގެ މާފަހުން އެމްޑީޕީ އިން 2018 ވަނަ އަހަރު ވެރިކަމާއި ހަވާލުވެ މި ސަރުކާރުން އުފެއްދި ރިޔާސީ ކޮމިޝަނުގެ ތަހުގީގަށް ފަހު ނެރުނު ރިޕޯޓްގައި ބުނެފައިވަނީ، ހާދިސާ ހިނގިފަހުން ގިނައަހަރުތަކެއް ފާއިތުވެފައިވުމުގެ ސަބަބުން އިތުރު ހެކި ހޯދުމުގައި ހުރި ދަތިތަކާއި، މޯލްޑިވްސް ޕޮލިސް ސަރވިސްއިން ހޯދައި އެއްކޮށްފައިވާ ކަމަށް ގަބުލުކުރެވޭ ސީސީޓީވީ ފުޓޭޖް އާއި އިންޓެލިޖެންސް މައުލޫމާާތާއި ކޯލް ޑޭޓާގެ ތެރެއިން ބައެއް ތަކެތި ނުލިބުން ވީ ބޮޑު ގޮންޖެހުމަކަށް ކަމަށެވެ.

އަދި މައްސަލާގައި ތުހުމަތުކުރެވޭ ގިނަ އަދަދެއްގެ ބަޔަކު ހަނގުރާމަ ކުރުމަށް ރާއްޖެއިން ބޭރަށް ގޮސްފައި ތިބުމާއި، ހެކިބަސްދޭން ތިބި ބައެއް މީހުން ހެކިބަސް ދީފިނަމަ އެމީސްމީހުންގެ ޖާނާއި ފުރާނައަށް ނުރައްކާ އޮތްކަމަށް ބުނެ ހެކިބަސްދިނުމަށް އިންކާރުކުރި ކަންވެސް ފާހަގަކޮށްފައިވެއެވެ.

ކޮމިޝަނުގެ ތަހުގީގު ބިނާކޮށްފައިވަނީ މައިގަނޑު ހަތަރު މިސްރާބަށް އަމާޒުކޮށްގެންނެވެ.
އެއީ؛

1. އޭރު އޮތް ސަރުކާރާ އިދިކޮޅު ސިޔާސީ ބަޔަކު އަޑީގައި ތިބެގެން ސިޔާސީ މަގްސަދަކަށް ހިންގި ކަމެއްތޯ
2. އަމިއްލަ ޕާޓީގެ އެތެރޭގެ ސިޔާސީ ވާދަވެރިކަމުގެ ސަބަބުން
3. 2013 ގެ ރިޔާސީ އިންތިޚާބު އޭރުގެ އިދިކޮޅު ސިޔާސީ ފަރާތްތަކަށް ކާމިޔާބުވިޔަ ނުދިނުމުގެ މަގްސަދުގައި
4. ދީނީ ގޮތުން ޚިޔާލު ތަފާތުވުން

ކޮމިޝަނުން އެކުލަވާލި 121 ސޮފްހާގެ ރިޕޯޓްގައި ބުނެފައިވަނީ، ކޮމިޝަނުން ކުރި ތަހުގީގުންނާއި ބެލިބެލުމުން ހެކިބަސްތަކުން ދޭހަވަނީ ޑރ. އަފްރާޝީމްގެ މަރާއި އަޒްލިފް ރައޫފް އާއި ގުޅުން އޮތްކަމާއި އަޒްލިފް ރައޫފްއަކީ ދީނީ ހަރުކަށި ފިކުރުގެ ވިސްނުން ހުންނަ މީހެއް ކަމެވެ. އަދި ޑރ. އަފްރާޝީމް ދައްކަވާފައިވާ ވާހަކަތަކުގެ ސަބަބުން އޭނާ އަވަހާރަކޮށްލަން ޖެހޭކަމަށް އަޒްލިފް ރައޫފް ގަބޫލުކުރާ ކަންވެސް ރިޕޯޓުގައިވެއެވެ. މިމައްސަލައިގައި ތަހުގީގަށްފަހު ފުލުހުން ކުރިން އާއްމުކޮށްފައިވާ މައުލޫމާތުގައިވެސް އެމައްސަލައިގައި އަޒުލިފްގެ މައްޗަށް ވަނީ ތުހުމަކޮށްފައެވެ.

ރިޕޯޓުގައި ބުނެފައިވަނީ، ކޮމިޝަނަށް ލިބިފައިވާ ހެއްކާ ގަރީނާތަކުގެ އަލީގައި އެ ކޮމިޝަނަށް ބުރަވެވެނީ ޑރ. އަފްރާޝީމް އަލީ ގަތުލުކުރުމަށް ރާވައި އެކަމަށް ޚަރަދުކޮށް މިކަން ތަންފީޒުކޮށްފައިވަނީ މާލޭ ފުރުގާން މިސްކިތާއި ނޫރު މިސްކިތުގައި ހަރަކާތްތެރިވާ ހަރުކަށި ޖިހާދީ ފިކުރުގެ ޖަމާއަތުން ކަމަށެވެ.

އެކޮމިޝަނަށް މައުލޫމާތުދިން 4 ސިއްރު ހެކިންގެ ބަހުންނާއި، ފުލުހުން އެކިއެކި މައްސަލަތަކުގައި އެއްކޮށްފައިވާ އިންޓެލިޖެންސް މައުލޫމާތުތަކުން އެނގޭގޮތުގައި، އެކަމުގެ އަޑީގައި ތިބީ، އަދި އެ ޖަމާއަތް ހިންގަނީ މުހައްމަދު މަޒީދު އަދި ސާމިތު މުހައްމަދު ނަމަކަށް ކިޔާ މީހެއް ކަމަށްވެސް ރިޔާސީ ކޮމިޝަންގެ ރިޕޯޓުގައި ހާމަކޮށްފައިވެއެވެ.

ރިޕޯޓުގައި ބުނެފައިވަނީ، ކޮމިޝަނަށް ލިބިފައިވާ ހެއްކާ ގަރީނާތަކުގެ އަލީގައި ކޮމިޝަނަށް ގަބޫލުކުރެވެނީ، ހަރުކަށި ޖިހާދީ ފިކުރުގެ މިޖަމާއަތުން ޑރ. އަފްރާޝީމް މަރާލަންޖެހޭ ކަމަށް ކަނޑައަޅާފައިވާ ސަބަބަކީ ޑރ. އަފްރާޝީމް ދައްކަވާފައިވާ ވާހަކަތަކަކީ ކުފުރުގެ ވާހަކަތަކެއް ކަމަށް އެޖަމާއަތަށް ފެންނާތީ އާއި ކީރިތި ރަސޫލާގެ ސުންނަތަށް ފުރައްސާރަކޮށް ހަރާމް ކަންތައްތައް ހަލާލުކޮށް ޑރ. އަފްރާޝީމް ދީނަށް ފުރައްސާރަ ކޮށްފައިވާ ކަމަށް އެ ޖަމާއަތުން ގަބޫލުކުރާތީ ކަމަށެވެ.

މީގެ އިތުރަށް ޑރ. އަފްރާޝީމް އަވާހަކޮށްލުމުގެ ތުހުމަތު ސިޔާސީ މީހުންނަށާއި، އެމްޑީޕީއަށް ކުރި ނަމަވެސް އެކަމުގެ އެއްވެސް ހެއްކެއް ނުފެނުނު ކަމަށްވެސް އެމްޑީޕީގެ ސަރުކާރުން އުފައްދާފައިވާ މަރު ކޮމިޝަންގެ ރިޕޯޓުގައިވެއެވެ. އަދި އެމައްސަލައިގެ ތުހުމަތު ކުރީގެ ރައީސް އަބުދުﷲ ޔާމީނަށް ބައެއް ފަރާތްތަކުން ކުރި ނަމަވެސް، އެކަމަށް ބާރުދޭ އެއްވެސް ހެއްކެއް ގަރީނާއެއްވެސް ހޯދިފައި ނުވާކަމަށް ވެސް ރިޕޯޓުގައި ބުނެފައިވެއެވެ.

ރިޔާސީ ކޮމިޝަނުން ބުނީ އެކޮމިޝަނަށް ލިބިފައިވާ ހެއްކާއި ގަރިނާތަކަށް ބަލާއިރު، ޑރ. އަފްރާޝީމް އަލީ އަވަހާރަކޮށްލުމުގެ އަމަލީ މަސައްކަތުގައި ހ. ހިލްޓަން އަޒްލިފް ރައޫފްއާއި ހ. ލޮބީ ހުސައިން ހުމާމް އަހްމަދު އާއި، ހ. ހިކޯސްޓް އަލީ ޝާންއާއި ކުޑަކުއްޖާގެ އިތުރަށް، އިތުރަށް އެހެން ބަޔަކު އެމަސައްކަތުގައި އަމަލީގޮތުން ބައިވެރިވި ކަމަށް ބެލެވޭ ކަމަށެވެ. ނަމަވެސް އެމީހުން ޑރ. އަފްރާޝީމްގެ މަރުގެ ހާދިސާއަށްފަހު ރާއްޖެއިން ބޭރަށް ހަނގުރާމައަށް ގޮސްފައިވާތީވެ، އެމައްސަލާގެ އެބައި ތަހުގީގުކުރުމަށް ހުރަސްއެޅިފައިވާ ކަމަށް ރިޔާސީ ކޮމިޝަންގެ ރިޕޯޓް ނިންމާލަމުން ބުނެފައިވެއެވެ.

ކުރިން ސިޔާސީ މީހުންނަށް ތުހުމަތުކުރި ނަމަވެސް މަރު ކޮމިޝަނުގެ ރިޕޯޓުން ފެންނަ ގޮތުގައި މި މަރަކީ ދީނީ ގޮތުން ހަރުކަށި ފިކުރުގެ ބަޔަކު ރާވައިގެން ހިންގާފައިވާ ޖަރީމާއެކެވެ. ސިޔާސީ ބޭނުމެއްގައި، ދީނީ ހަރުކަށި މީހުން ބޭނުންކޮށްގެން ބަޔަކު ކުރުވި ކަމެއް ކަމަށް ދެކޭ މީހުންވެސް ގިނައެވެ. ޔޫއޭއީ އިން ބައަކު ރާއްޖެ އައިސް ޑރ. އަފްރާޝީމް އަވަހާރަކޮށްލާފައި ފުރާފައިވާކަމަށް ރައީސް ނަޝީދު ވިދާޅުވެ ދެއްކެވިވާހަކަފުޅާއިމެދެ އެވެސް ބަހެއް މަރު ކޮމިޝަނުގެ ރިޕޯޓުގައި ފެންނަން ނެތުމުން އެކަމާއި މެދު ގިނަ ބަޔަކު ސުވާލު އުފައްދައެވެ.