ބޭނުންވަނީ ދިވެހި ޑޮކްޓަރުން، އެކަމަކު މުސާރަ ދޭއިރު ބިދޭސީ ޑޮކްޓަރުންނާއި ހަމަހަމައެއް ނުކުރޭ

ބިދޭސީ ޑޮކްޓަރުންނާއި ދިވެހި ޑޮކްޓަރުންގެ މެދުގައި މުސާރައިގެ ތަފާތުކުރުންތައް ގެންގުޅޭތީ އެކަމުގެ ކަންބޮޑުވުން އާންމުން ފާޅުކޮށްފިއެވެ. މި ކަންބޮޑުވުން ފާޅުކޮށްފައިވަނީ ޑޮކްޓަރުން ހޯދަން އިއުލާންކުރާއިރު ލިވިން އެލަވަންސްއާއި ފުޑް އެލަވަންސް ދިވެހި ޑޮކްޓަރުންނަށް ނުދީ ހަމައެކަނި ބިދޭސީ ޑޮކްޓަރުންނަށް ދޭތީއެވެ.

މިކަމުގެ ކަންބޮޑުވުން ފާޅުކޮށް ޓްވިޓަރގައި މީހުން ވަނީ ވަރަށް ބޮޑަށްވެސް ފާޑުކިޔާފައެވެ.  ދިވެހި ޑޮކްޓަރުންނާއި އަދި ބިދޭސީ ޑޮކްޓަރުންގެ މެދުގައި ތަފާތުކުރުންތައް ގެންގުޅޭކަމަށް ބުނެ ސަރުކާރަށް ވަނީ ފާޑުކިޔާފައެވެ.

advertisement

the discrimination here 😤😤😤 pic.twitter.com/MgG8OpFJip— މއނ (@c0warb) August 18, 2022

ހެލްތް މިނިސްޓްރީން ޑޮކްޓަރުން ހޯދުމަށް ކޮށްފައިވާ އިއުލާނެއްގައި ބިދޭސީންނަށް އެކޮމޮޑޭޝަންގެ ގޮތުގައި 3000 ރުފިޔާ ވަނީ ހިމަނާފައެވެ. އަދި ފުޑް އެލަވަންސްގެ ގޮތުގައި 1800 ރުފިޔާ ހިމަނާފައިވެއެވެ. ނަމަވެސް ދިވެހި ޑޮކްޓަރުންނަށް މި އެލަވަންސްތައް ހިމަނާފައެއް ނުވެއެވެ.

މިކަމަށް ކަންބޮޑުވެ މީހަކު ޓްވިޓަރގައި ބުނެފައިވަނީ ބިދޭސީންނަށް އަސާސީ މުސާރައިގެ އިތުރުން ޓިކެޓާއި، ލިވިން އެލަވަންސްއާއި އަދި ފުޑް އެލަވަންސްވެސް ދޭކަމަށެވެ. ނަމަވެސް ދިވެއްސެއްނަމަ ހަމައެކަނި ލިބެނީ އަސާސީ މުސާރަކަށް ވަނީ ބުނެފައެވެ.

މިފަދަ ތަފާތުކުރުންތައް ގެންގުޅުމަކީ މިދާއިރާއަށް ނިކުންނަން ބޭނުންވާ ދިވެހިންނަށް ދާއިރާއަށް ނިކުތުމަށް އެޅިގެންދާނެ ހުރަހެކެވެ. މިފަދަ ބޮޑު ތަފާތުކުރުންތަކެއް ސަރުކާރުން ގެންގުޅުމަކީ ބަލައިގަނެވޭނެ ކަމެއް ނޫންކަމަށް ގިނަ ބަޔަކު ދަނީ ބުނަމުންނެވެ.

މިހާރުވެސް ރާއްޖޭގައި ޑޮކްޓަރުންގެ ގޮތުގައި ގިނަ އަދަދެއްގެ ބިދޭސީން އަންނަނީ މަސައްކަތްކުރަމުންނެވެ. ނަމަވެސް ބިދޭސީން ތިބި މަގާމުތަކަށް ދިވެހިން ހޯދުމަކީ ސަރުކާރުން ވަރަށް ބޮޑު އިސްކަމެއްދީގެން ކުރަމުންއަންނަ މަސައްކަތެއްކަމަށް ސަރުކާރުން އަބަދުވެސް އަންނަނީ ބުނަމުންނެވެ. ނަމަވެސް މިފަދަ ތަފާތުކުރުންތައް ގެންގުޅޭނަމަ މި މަގާމުތަކަށް އަންނަން ބޭނުންވާ ދިވެހިންގެ އަދަދު މަދުވުމަކީ ކަންބޮޑުވުމެކެވެ.