ފާޑުކިޔަސް މާލެއާއި ރާއްޖެތެރޭ މީހުން ބޯހިޔާވަހިކަން ދިނުމުގައި ތަފާތުކުރާނަން: މިނިސްޓަރ އަސްލަމް

މާލޭގެ މަދުބަޔަކަށް މާލެ އަތޮޅުން ހިއްކާ ކޮންމެ ފަޅަކުން ހިލޭ ގޯތި ދިނުމުގައި ރާއްޖެތެރެއިން މާލޭގައި ވަޒަންވެރި ރައްޔިތުންނާމެދު ތަފާތުކުރާނެކަމަށް ވިދާޅުވެ ހައުސިންގ މިނިސްޓަރ އަސްލަމް ޤާނޫނު އަސާސީއަށް ގޮންޖައްސަވައިފިއެވެ.

އެގޮތުން މިފަދަ އެޕަރތައިޑް ސިޔާސަތެއްގައި އޭނާ ދެމިހުރި ބައިވަރު ސަބަބުތަކެއް ދައްކަވަމުން ޒަމާނުއްސުރެ ރާއްޖޭގައި ގޯތި ދިނުމުގައި އަމަލުކުރަމުން އަންނަ އުސޫލުގެ ތެރެއިން މާލޭގެ މީހުން ބާކީވެފައިވާ ކަމަށް ވިދާޅުވެ އެމްޑީޕީ ޤައުމީ މަޖިލިސްގައި ވަނީ ދޮގު ހަދާފައެވެ.

advertisement

މިނިސްޓަރ އޮފް ނެޝަނަލް ޕްލޭނިންގ، ހައުސިންގް އެންޑް އިންފްރާސްޓްރަކްޗަރ މުޙައްމަދު އަސްލަމް ވާހަކަފުޅު ދެއްކެވުން

އެމްޑީޕީގެ 4 ވަނަ ކޮންގްރެސް ކުރިއަށްދަނީ pic.twitter.com/kbjcy75T0C— MDP Secretariat (@MDPSecretariat) August 20, 2022

ދިވެހިރާއްޖޭގެ ރަށެއްގެ ރައްވެއްސަކަށް ވުމުގެ ޤާނޫނުގެ ދަށުން މާލެގެ ރައްޔިތަކުވެސް އެހެން ރަށެއްދިރިއުޅޭތާ 5 އަހަރުވުމުން އެރަށެއްގެ ރަޖިސްޓްރީއަށް ބަދަލުވެ، އެރަށަކުން ދޫކުރާ ބޯހިޔާވަހިކަމަށް ޝަރުތު ހަމަވާނެކަމެވެ. ނަމަވެސް މާލެ ސަރަހައްދުގައި ހުރިހާ ވަސީލަތަކާއި، ތަޢުލީމާއި އަދި ވަޒީފާ ޖަމާކޮށްފައި އޮތުމުގެ ސަބަބުން، މާލެ ދޫކޮށް އެެހެންރަށްރަށަށް ދިރިއުޅެންދަނީ މަދު މީހެކެވެ.

ވުމާއެކު ރަށްރަށުގައި ގޯތި ދޫކުރާއިރު އެ ރަށެއްގެ ދިރިއުޅޭ މީހުންނަށް އިސްކަންދޭ އުސޫލުން މާލޭގައި ވަޒަންވެރި އުޅޭ ރައްޔިތުންނަށް އެރަށްތަކުން ގެދޮރު ނުލިބުމަކީ އިންސާފެވެ. އަދި ރާއްޖޭގެ އެއްވެސް ރަށަކުން މިހާރުވެސް ގެދޮރު ދޫކުރެވެނީ ހައުސިންގ މިނިސްޓްރީގެ ހުއްދަ ލިބިގެންކަމަށްވާއިރު، އުސޫލުގެ ބޭރުން މިފަދަ ކަމެއް ހިނގާއިރު މިކަން ނުހުއްޓުވުމަކީ މިނިސްޓަރުގެ މަސްއޫލިއްޔަތު އަދާނުކުރެވުންކަމަށް ގިނަ ބަޔަކު ދެކެއެވެ.

މަލޭ ނިކަމެތިންގެ ފައިދާ ނަގައިގެން މަދު ބަޔަކު މުއްސަނދިކުރަނީ

“މި ވަގުތަށް އެބަޖެހޭ ހަމަ އަސްލުގައި ވެސް މާލޭގެ ރައްޔިތުންނަށް ލިބެން ހުރި މިންވަރަކުން ގޯތި ދޭން. އަދި އެދޭ ގޯތީގައި ތަންތަން ބިނާކުރެވޭނެ ވަރުގެ މީހުން އެބަތިއްބޭ،” އަސްލަމް ވިދާޅުވި އެވެ.

ސުވާލަކީ މިލިއަން ރުފިޔާގެ ގެދޮރު ބިނާކުރުމުގެ ޤާބިލް ހުރި މީހަކީ ނިކަމެއްޗެއްގެ ގޮތުގައި ބެލެވިދާނެކަމުގެ ސުވާލެވެ. ގިނަ ބަޔަކު ދެކޭގޮތުގައި މިފަހަރު ހުޅުމާލެއިން ބިން ހިލޭ ލިބޭނީ މިހާރު ރާއްޖެއިން ބޭރުގައި ދިރިއުޅެމުންދާ، އެހެން ޤައުމުތަކުގެ ރައްޔިތުކަން އޮންނަ މާލޭގެ މަދު ބަޔަކަށް ކަމަށާއި އަދި މާލޭގެ ނިކަމެތިންގެ ނަޖާއިޒް ފައިދާ ނަގައިގެން ސަރުކާރުން އުޅެނީ މަދުބަޔަކަށް ހިލޭ ބިލިއަން ރުފިޔާގެ އަގުހުރި މުދާތަކެއް ބަހާލުމަށްކަމަށެވެ.

ސަރުކާރުންވަނީ ރާއްޖެތެރޭގެ މީހުންގެ ތެރެއިން މާލޭ ރަށްވެހިންނަށް ވެފައިވާ ފަރާތްތައް މާލޭގެ ރައްޔިތުންގެ ގޮތުގައި ބަލައިގަނެވެން ނެތްކަމަށާއި އަދި ކުރީގެ ރަށުގެ ރަށްވެހިކަން ދޫކޮށް މާލޭ ދަފްތަރުގައި ޖެހުނު ފަރާތްތަކަށް ގޯތި ދިނުމުގައި ބާކީ ކޮށްލާނެކަމަށް ރައްޔިތުންގެ މަޖިލީހުގައި ހާމަކޮށްފައެވެ.

މިކަމާ ދެކޮޅަށް އަޑު އުފުލާ ރައްޔިތުން ވަނީ މިއީ ދެކުނު އެފްރިކާ އަދި އިޒްރޭލްގައި ރައްޔިތުން ތަފާތުކުރުމުގައި ގެންގުޅުނު ފަދަ އެޕަރތައިޑް ސިޔާސަތެއްކަމުގައި އަޑު އުފުލަމުންނެވެ. ދެހާސް އެގާރަވަނަ އަހަރު މާލޭގެ 250 މީހަކަށް 3 ބިލިއަނަށްވުރެ އަގުހުރި ބިންވަނީ ހިލޭ ދެވިފައެވެ. މިއީމާލޭގައި އޮންނަބިންކޮޅު ދައުލަތަށް ލިބޭގޮތަށް ހިންގި މަޝްރޫޢުއެއް ނަމަވެސް، ދައުލަތަށް މިބިންތަށް ލިބުނުކަމުގެ އެއްވެސް ލިޔެކިޔުމެއް ފެންނާކަށް ނެތެވެ.