ވަގުތުގެ ޖޯޝުގައި ގާނޫނު ލިޔެގެން ބޮޑެތި ފުށޫއެރުންތަކެއް!

ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި ޕްރޮސެކިއުޓާ ޖެނެރަލް ހުސައިން ޝަމީމްއާ ކުރިމަތިވި އެންމެ ބޮޑު އެއް ސުވާލަކީ ރިހާކުރު ފުޅި ވަގަށް ނެގި މީހާ އަށް ބޮޑު އަދަބު އައިސް، ހަތަރު މަސް ވަގަށް ނެގި މީހާ ހަތަރު މަހަށް ޖަލަށް ލެވޭއިރު މަސްތުވާތަކެތި ވިއްކާ ޓްރެފިކްކުރުމާއި، މިފަދަ ބޮޑެތި ކުށްތައް ކުރާ މީހުން މިނިވަންވެ ދޫވަނީ ކީއްވެގެންތޯ ކުރި ސުވާލެވެ.

ރައްޔިތުންގެ މަޖިލީހގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ކުރިމަތިކުރެއްވި މި ސުވާލުގެ ޖަވާބުގައި ޕީޖީ ވަނީ އެ ވަގުތެއްގައި އޮތް އެންމެ ބޮޑު ކަމުގެ ފޯރިއާއި ޖޯޝުގައި ޖެހިގެން ކުރީގެ ގާނޫނުތަކަށް ބަލައި ނުލައި ގާނޫނުތައް ފާސްކޮށް ތަސްދީގުކުރުމުން ކޯޓު މަރުހަލާއާއި ދައުވާކުރުމާ ހަމައަށް ދާއިރު، ގާނޫނުތަކުގައި ހުރި ބޮޑެތި ފުށޫއެރުންތަކުގެ ވާހަކައެވެ.

advertisement

މިސާލެއްގެ ގޮތުން ޕީޖީ ނެންގެވީ މުއްދަތާއި ތާރީހު ގުނުމުގައި ހުރި ދަތިތަކުގެ ވާހަކައެވެ.

“ގާނޫނު މާނަ ކުރުމާ ބެހޭ ގާނޫނުގައި އޮންނަނީ ބަންދު ދުވަސް ނުލައޭ ގުނާނީ، އަނެއް ބައި ގާނޫނުތަކުގައި ބަންދު ދުވަސް ލާންވާނޭ. އެހެންވީމާ ކިހިނެއްތޯ އަސްލު ވާންވީ ގޮތް ނޭނގި އޮއްވައި ކޮންމެވެސް ފަނޑިޔާރަކު އެ އިޝޫ ނަންގަވާފައި ގޮތެއް ނިންމަވަނީ. ދެން އަޅުގަނޑުމެން ހައި ކޯޓަށް އެޕީލްކޮށްގެން އޭގެ އަސްލު ވާންވީ ގޮތް ސާފުކުރުމުގެ ޕްރޮސެސް މި ހިނގަނީ،” ޝަމީމް ވިދާޅުވިއެވެ.

ޝަމީމް ވިދާޅުވީ މިއީ ގާނޫނު ފުށޫ އަރާގޮތުގެ ކުަޑަ މިސާލެއް ކަމަށެވެ.

“ކުރީގެ މަޖިލީހުން ފާސްކޮށްފައި އޮތް ދެ ގާނޫނެއް އެބަ އޮވޭ، އެއް ދުވަހަކު ތަސްދީގުކުރެއްވީ. ދެ ގާނޫނުގަވެސް އެބޮތް އެއް މާއްދާއެއް، މި ގާނޫނަށޭ އިސްކަން ދޭންވާނީ. ދެން އަޅުގަނޑުމެން ކިހިނެތްތޯ ހަދާނީ؟ އޭގެ އެއް ގާނޫނަށް އިސްކަން ދީގެން ދިޔައީމަ ކޯޓުގެ ފަނޑިޔާރު ނިންމަވާނެ ތި ގާނޫނަކަށް ނޫނޭ، މި ގާނޫނޭ. ދެން އެވީ އެ މައްސަލަ ހިފައިގެން ހައި ކޯޓަށް ނޫނީ ސުޕްރީމް ކޯޓަށް ދާން. އެހެންވީމަ އެކަހަލަ ބައެއް އިޝޫޒްތައް.”

ޝަމީމް ވިދާޅުވިގޮތުގައި ބަންދުގެ ދުވަސް ގުނުމާއި، މިފަދަ ގިނަ މައްސަލަތައް ފެންމަތިވެ ބޮޑެތި ކުށްތައް ކުރާ މީހުން ވެސް އިޖުރާއަތްތައް ހަމަނުވެގެން ދޫވާން މެދުވެރިވާ މައިގަނޑު އެއް ސަބަބަކީ ގާނޫނުތައް މާނަކުރުމުގައި ދިމާވާ މައްސަލައެވެ. އަދި މިގޮތަށް މައްސަލަ ޖެހެނީ އެއް ގާނޫނު އަނެއް ގާނޫނާ ފުށޫ އަރާގޮތަށް އޮންނަ ލޫޕްހޯލްތައް ކަމަށާއި، އެކަން އެހެން ދިމާވަނީ ގާނޫނުތައް ހަދައި ފާސްކުރާއިރު އެ ވަގުތެއްގެ ޖޯޝުގައި ކުރީގެ ގާނޫނަށް ނުބަލައި ފާސްކޮށް ނިންމާތީ ކަމަށް ޝަމީމް ވިދާޅުވިއެވެ.

މިކަމަށް އޮތް ހައްލެއް:

ގާނޫނުގައި ހުރި މިފަދަ މައްސަލަތައް ހައްލުވާނެ ގޮތެއްވެސް ޝަމީމް ހުށަހެޅުއްވިއެވެ. އެގޮތުން ކުށް ބަޔާންކުރާ މާއްދާތައް ގާނޫނުލްއުގޫބާތުގައި އެކަނި ހިމެނުމުން މި މައްސަލަ ވަރަށް ބޮޑަށް ހައްލުވާނެ ކަމަށް ޝަމީމް ވިދާޅުވިއެވެ. މިހާރު އޮންނަގޮތުން ނަމަ ކުށް ބަޔާންކުރާ މާއްދާތައް ތަފާތު އެކި ގާނޫނުތަކުގައި އޮވެއެވެ.

ޝަމީމް ވިދާޅުވީ ކުށް ބަޔާންކުރާ މާއްދާ އޮންނަންވާނީ ޕީނަލް ކޯޑުގައި ކަމަށެވެ. އެކަމަކު ޓެރަރިޒަމްއާ، މަސްތުވާތަކެއްޗާއި ކުޑަކުދިންނަށް ޖިންސީ ގޯނާކުރުން ފަދަ ބޮޑެތި ކުށްތައް ބަޔާންކުރާ ވަކި ގާނޫނެއް އޮތުން އެންމެ ރަނގަޅު ކަމަށް ޝަމީމް ވިދާޅުވިއެވެ.

” އެހެން އޮއްވާ މޫދަށް ކުނިއެޅުން ވެސް އެއީ ޖިނާއީ ކުށަކަށް ވެދާނެ. ދެން އެ އޮވެދާނެ އެންވާރަމަންޓާ ބެހޭ ގާނޫނުގަ ވެސް. އެހެންމަ އެކަހަލަ ބައެއް އިޝޫޒް އެބައާދޭ”

ޝަމީމް ވިދާޅުވީ މިކަހަލަ ވަރަށް ގިނަ މައްސަލަތައް މިހާރު ސުޕްރީމް ކޯޓާ ހަމައަށް ގޮސް ފަނޑިޔާރުންގެ ހައްލު ލިބިފައިވާ ކަމަށެވެ. އެކަމަކު މިކަން ހައްލުކުރުމަށް އެކި ގާނޫނުތަކުގައި ހުރި ކުށް ބަޔާންކުރާ މާއްދާތައް ގާނޫނުލްއުގޫބާތުގައި ހިމަނައި “ހާމަނައިޒް” ކުރުމަށް މަޖިލީހުގައި އެދުމަށް ބަންޑާރަ ނައިބަށް ސިޓީއެއް ފޮނުއްވާފައިވާ ކަމަށް އޭނާ ވިދާޅުވިއެވެ.