ކުރީގެ ރައީސް ޔާމީން ވ. އާރަށް ނުއަގުގައި ކުއްޔަށްދިން މައްސަލައިގެ ޝަރީއަތް ކުރުކޮށް

އެމްއެމްޕީއާރްސީ މެދުވެރިކޮށް، ކުރީގެ ރައީސް އިަބްދުﷲ ޔާމީން އެމަނިކުފާނުގެ ޒައާމަތުގައި ހިންގެވި ކޮރަޕްޝަންގެ ތެރެއިން ވ. އާރަށް ނުއަގުގައި ކުއްޔަށްދިން މައްސަލާގައި އޭރު އެމްއެމްޕީއާރްސީގެ އެމްޑީ އަބްދުﷲ ޒިޔަތާއި ނައިބުރައީސް އަހުމަދު އަދީބުގެ ހެކިބަސް ނެގުން އިއްޔެ ކުރިއަށް ގެންދިޔައެވެ. އެ ދެ ބޭފުޅުން ވެސް ބުނިގޮތުގައި އާރަށް ނުއަގުގައި ކުއްޔަށްދީ އެ ވިޔަފާރީގެ މުއާމަލާތަށް ރައީސް ޔާމީން ވަނީ ނުފޫޒު ފޯރުވާފައެވެ.

ހެކިބަސް ނެގުމުގެ މަޖިލީހުގައި އަދީބު ވިދާޅުވީ އޭރު ރައީސް ޔާމީން އޭނާއަށް ކަންކަމުގައި އިރުޝާދުދީ ހައްދަވަނީ އަބަދުވެސް ފޯނުން ގުޅުއްވާއެވެ. އަދި މިކަމުގައި ހިނގާދިޔަ މުއާމަލާތްތައް ވެސް ފޯނު ރިކޯޑުތައް ބެލުމުން އެނގޭނެ ކަމަށް ވިދާޅުވިއެވެ.

advertisement

މި މައްސަލާގައި ޔާމީންގެ އިތުރުން ކުރީގެ މެމްބަރު ޔޫސުފް ނައީމްގެ މައްޗަށް ދައުލަތުން ދައުވާކުރާއިރު، އޭނާގެ މައްޗަށްކުރަނީ ޔާމީނަށް އެއް މިލިއަން ޑޮލަރު ޔޫސުފް ނައީމް ރިޝްވަތުގެ ގޮތުގައި ދިން ދައުވާއެވެ. މިކަމުގެ ހެކިބަސް ދެމުން އަދީބު ވިދާޅުވީ ޔޫސުފް ނައީމް އެރަށާއި ގުޅިގެން ވާހަކަދެއްކި އިރު އެ ރަށަކީ ފިޝަރީޒް މިނިސްޓްރީގެ ދަށުގައި އޮތް ރަށެކެވެ. އެހެންވެ އެކަމުގައި އެހީވެވެން ނެތް ކަމަށް ބުނެފައިވާ ކަމަށް އަދީބު ވިދާޅުވިއެވެ.

އެކަމަކު އޭގެ ފަހުން ރައީސް ޔާމީން އެރަށް ޓޫރިޒަމް މިނިސްޓްރީގެ ދަށަށް ބަދަލުކުރަން ކެބިނެޓްގެ އިކޮނޮމިކް ކައުންސިލަށް ފޮނުވައި ބަދަލުކޮށްފައިވާ ކަމަށާއި، ފޯނުން ގުޅުއްވައި އެއީ ޔޫސުފް ނައީމްގެ އެދުމަކަށް ކުރެއްވިކަމެއްކަން ހާމަކުރެއްވި ކަމަށް ވިދާޅުވިއެވެ.

ޒިޔަތުގެ ހެކިބަސް:

ޒިޔަތު ވިދާޅުވިގޮތުގައި އޭނާއަށް ޔޫސުފް ނައީމް އެނގުނީ ވެސް އާރަށު މުއާމަލާތުގެ ތެރެއިންނެވެ. އަދި އެ ރަށް އެގޮތަށް ވިއްކަން އިރުޝާދުދެއްވީ އަދީބު ކަމަށާއި، އެ އިރުޝާދަކި ރައީސް ޔާމީން ދެއްވި އިރުޝާދެއްކަން ސާފުކޮށްދެއްވި ކަމަށް އޭނާ ވިދާޅުވިއެވެ.

އޭނާ ވިދާޅުވިގޮތުގައި އާރަށުގެ އަގު ފުރަތަމަ ކަނޑައެޅީ ފަސް މިލިއަނަށެވެ. އެކަމަކު ފަހުން އެކި މަޝްވަރާތަކަށް ފަހު 3 މިލިއަނަށް ބަދަލުކުރިއިރު މި ހުރިހާ މުއާމަލާތްތަކެއް ވަޓްސްއެޕް އަދި ވައިބާއިން ފެންނާނެ ކަމަށް ވިދާޅުވިއެވެ.

އެކަމަކު އޭގެ ފަހުން އެއްބަސްވުމުގައި ސޮއިކުރި އިރު އަގު 2 މިލިއަނަށް ކުޑަކުރީ ވެސް ރައީސް ޔާމީންގެ އެންގެވުމަކަށް އަދީބު އެ އިރުޝާދު ދެއްވައިގެން ކަމަށް ޒިޔަތު ވިދާޅުވިއެވެ.