ސިމްޑީން ދުނިޔޭގެ ފުރަތަމަ ލަގްޝަރީ އެއަރލައިން އާއި ދިމާލަށް

ސިމްޑީ ގްރޫޕާއި ޔޫއޭއީގެ އަރަބެސްކް ގުޅިގެން ދުނިޔޭގެ ފުރަތަމަ ލަގްޝަރީ އެއަރލައިން ތަޢާރަފްކުރުމުގެ މަސައްކަތް ފަށައިފިއެވެ.

ދުނިޔޭގެ ފުރަތަމަ ލަގްޝަރީ ދަތުރުތަކަށް ޚާއްސަ މި އެއަރލައިން ފެށުމާއި ގުޅޭ އެއްބަސްވުމުގައި އަރަބެސްކް އަދި ސިމްޑީ ގްރޫޕުން މިހާރުވަނީ ސޮއިކޮށްފައެވެ.

advertisement

ސިމްޑީން ބުނީ މިއީ ރާއްޖޭގެ ފަތުރުވެރިކަމަށް މިއަހަރު 50 އަހަރު ފުރޭއިރު، ހޮސްޕިޓަލިޓީ އަދި ފަތުރުވެރިކަމުގެ ދާއިރާއަށް ދުނިޔޭގެ އިތުރުން ރާއްޖޭގައިވެސް

މަތީފެންވަރުގެ ޚިދުމަތެއް ފޯރުކޮށްދިނުމުގެ މަޤްސަދުގައި ފެށި މަސައްކަތެއްކަމަށެވެ.

ސިމްޑީން ބުނީ މި އެއަރލައިން ރާއްޖޭގެ އެކި ކަންކޮޅުތަކުގެ އިތުރުން ދުނިޔޭގެ 60 މަންޒިލަކަށް އުދުހުމަށް އަމާޒު ހިފާފައިވާ ކަމަށެވެ.

ޔޫއޭއީގެ އިންވެސްޓްމެންޓް ފާމެއް ކަމަށްވާ އަރަބެސްކް އާއި ގުޅިގެން މިމަސައްކަތް ކުރިއަށްދާއިރު، އެކުންފުންޏަކީ ލުފްތަންސާ އަދި ޤަތަރު ފަދަ އެއަރލައިންތަކުގައި އޭވިއޭޝަން އިންޑަސްޓްރީގެ އިސް މަޤާމުތަކުގައި މަސައްކަތް ކޮށްފައިވާ ގިނަ ބޭފުޅުން ގުޅިގެން އުފައްދާފައިވާ ކުންފުންޏެއް ކަމަށް ސިމްޑީން ބުނެއެވެ.

ރާއްޖޭގެ ސިމްޑީ ގްރޫޕުން ދުނިޔޭގެ ފުރަތަމަ ލަގްޝަރީ ދަތުރުތަކަށް ޚާއްސަ އެއަރލައިން ތަޢާރަފު ކުރުމަށް މަސައްކަތް ކުރަމުންދާއިރު ފާއިތުވި 25 އަހަރު އެކުންފުނިން މަސައްކަތް ކޮށްފައިވަނީ ފަތުރުވެރިކަމުގެ ދާއިރާއަށް މުހިންމު ޕްރޮޑަކްޓުތަކެއް ގެނެސްދީ ރަނގަޅު ފެންވަރުގެ ޚިދުމަތެއް ދިނުމަށް ކަމަށް އެކުންފުނިން ބުނެއެވެ.