ބަރު ދަބަސް — ތުއްތު ކުދިން އުފުލަން ނުޖެހޭ ބޮޑު ބުރައެއް

ސްކޫލު ކުދިންގެ ފޮތްދަބަސް ބަރު ވާހަކައަކީ ބެލެނިވެރިންނާއި ދަރިވަރުންގެ ބޮޑު ޝަކުވާއެކެވެ. ހައްލެއް ހޯދައި ދިނުމަށް އެދި އާދޭސް ކުރާ މައްސަލައެކެވެ. އެހެނަސް އަދިވެސް ރާއްޖޭގެ ހުރިހާ ސްކޫލުތަކެއްގެ ދަރިވަރުންވެސް ސްކޫލަށް ދާން ޖެހެނީ ބަރު ފޮތް ދަބަސް ކޮނޑުން އުފުލައިގެންނެވެ.

މިކަމުގެ ހައްލެއްގެ ގޮތުން ބައެއް ރަށްރަށުގެ ސްކޫލު ކުދިންގެ ބެލެނިވެރިން ފައިސާ އެއްކޮށްގެން ކުލާހުގައި ފޮތް ހަރުގަނޑެއް ނުވަތަ ތަޅުލެވޭ ލޮކަރު ބަހައްޓާފައި ހުރެއެވެ. ނަމަވެސް ގުދާރު ގުޑާވަރުގެ ބަރު ދަބަސް ބަހައްޓަން އުނދަގޫވެ ބެލެންސް ގެއްލި ކުރިއަށް ވެއްޓޭ ގޮތްވާ ކަމަށް ވެއެވެ. އަދި ހަގު އުމުރުގައި ރާއްޖެ ބަލި (އާރތްރިޓްސް)ގެ އަލާމާތް ފެންނުމުގެ ފުރުސަތު ވެސް ބޮޑުވެއެވެ.

advertisement

ގިނަވަގުތު ދަބަސް އަޅައިގެން ހުންނަން ޖެހޭ ހާލަތްތަކުގައި ކުދިން ގުދުވެގެން ތިބުމަކީ، އެކަމުގެ ސަބަބުން އެކުދިންގެ ފުއްޕާމެއަށް ޕްރެޝަރވެ ނޭވާލުމުގެ މައްސަލަތައް ކުރިމަތިކުރުވާ ކަމެކެވެ. މިއީ ސީރިއަސް ސިއްހީ މައްސަލަތަކެކެވެ. އުފުލަން ޖެހިފައިވާ ދަރިވަރުން ވަރަށް ގިނައެވެ.

ބަރު ދަބަސް އުފުލުމުން ލިބޭ ގެއްލުންތައް

ބަރު ދަބަސް އާއްމުކޮށް ހަފްތާއަކު ފަސް ދުވަހު އުފުލުމުން ހެދި ބޮޑުވަމުންދާ ކުދިންގެ މައިބަދައިގެ ބައްޓަމަށް ބަދަލު އާދެއެވެ. އެގޮތުން ބުރަކަށީގެ މެދުގެ ގޮންޏާއި (ކާރވޭޗަރ) ތިރީ ގޮންޏަށް ބަދަލު އަންނަކަމަށް ދިރާސާތަކުން ވަނީ ހާމަވެފައެވެ. މީގެ ސަބަބުން އުނަގަޑުގައި ރިހުމާއި ބުރަކަށީގެ މެދު ބައިގައި ރިހުމާއި މޭކަށިތަކާއި ހުޅުތައް އަދި މަސްތަކުގައި ރިހޭ ގޮތްވެ ތަދުވުން ފަދަ ކަންކަން ދިމާވެއެވެ. އަދި ބައެއްފަހަރު ބުރަކަށީގައި ގޮށްގަޑެއް ލާގޮތް ވެސް ވެއެވެ.

ކުދިންނަށް އެކަށީގެންވާ ބަރުމިން ކަމުގައި ޑޮކްޓަރުން ކަނޑައަޅާފައިވާ ބަރުމިން

ސްކޫލް ދަބަހުގެ ބަރުދަން ހުންނަން ޖެހޭ މިންގަނޑެއް ކަމުގައި ދި އެމެރިކަން އެކަޑެމީ އޮފް ޕީޑިއޭޓްރިކްސް އިން ލާފާ ދޭ މިންގަނޑަކީ ކުއްޖާގެ ހަށިގަނޑުގެ ބަރުދަނުގެ %10- އާއި %20 ދެމެދުގެ ބަރުމިނެކެވެ.

ދުނިޔޭގެ ކުރިއަރާފައިވާ ގިނަ ގައުމުތަކުގައި ސްކޫލު ކުދިންގެ ފޮތް ދަބަސް ވަކި މިންވަރަކަށް ވުރެ ބަރު ކުރުމަކީ މަނާ ކަމެކެވެ. އެގޮތުން އިންޑިއާ ސަރުކާރުން ވަނީ 2018 ވަނަ އަހަރު، އެ ގައުމުގެ ސްޓޭޓް ސަރުކާރުތަކަށް އެސްޓޭޓްގެ ދަރިވަރުންގެ ސްކޫލު ދަބަހުގެ ބަރުދަން ލުއިކުރުމަށް އަންގާފައެވެ.

އެގޮތުން އިންޑިއާގެ ހުރިހާ ސްޓޭޓެއްގައި ވެސް ގްރޭޑް 1 އަދި 2 ގެ ދަރިވަރުންގެ ދަބަހުގެ ބަރުދަން ހުންނަން ޖެހެނީ 1.5 ކިލޯ ގްރާމް ގައެވެ. ގްރޭޑް 3-5 އަށް ދަބަހުގެ ބަރުދަނަކަށް 2-3ކިލޯ ގްރާމެވެ. އަދި ގްރޭޑް 1 އަދި 2 ގެ ދަރިވަރުންނަށ ގޭގައި ކުރުމަށް މަސައްކަތް (ހޯމްވޯކް) ނުދިނުމަކީ ވެސް އެގައުމުގެ ސްކޫލުތަކުން އަހައްމިއްޔަތުކަން ދޭ ކަމެކެވެ.

ރާއްޖޭގެ ސްކޫލުތަކުގެ ދަރިވަރުން (ކީ ސްޓޭޖް 1،2 އަދި 3) ގެ ސްކޫލް ދަރިވަރުންގެ ފޮތް ދަބަސް ގާތްގަނޑަކަށް 5 ކިލޯ އަށް ވުރެ ބަރުވާނެއެވެ. މިއީ މިކުދިންގެ އުމުރާއި ހަށިގަނޑާއި އެކަށީގެންވާ ވަރަށް ވުރެ ބަރު މިންވަރެކެވެ. ތުއްތު ކުދިންގެ ގުދާރު ސަލާމަތްކޮށް، އެކުދިންގެ މުސްތަގުބަލުގެ ސިއްހަތަށްޓަކައި ވެސް މިކަން ބަދަލުކުރުމަކީ ދައުލަތުން މުހިންމު އިސްކަމެއް ދޭން ޖެހޭ ކަމެކެވެ.

ކުޑަކުދިންގެ ހައްގު ހަނިގޮތަކަށް މާނަ ކުރުމަކީ ކުދިންނަށް ދެވޭ އަނިޔާއެއް ނޫންތޯއެވެ؟ މިފަދަ ކަންކަމާއި އަޅާނުލައި ދޫކޮށްލުމަކީ އިހުމާލެކެވެ. ކޮންމެ އިހުމާލަކީ އަނިޔާއެކެވެ. މިކަމަށް ހައްލެއް ހޯދުން މާ ލަސްވެސް ވެއްޖެއެވެ.