މިއަދުގެ ފާހަގަކޮށްލެވޭ ހަބަރުތައް ކުރުކޮށް

މެރިޓައިމް ދާއިރާ ހަރުދަނާ ކުރުމަށް ބޭނުންވާ މުހިންމު 14 ގަވާއިދެއް ނިންމުމުގެ މަރުހަލާގައި

މިއަދު ފާހަގަކުރާ ބައިނަލްއަގްވާމީ ކަނޑުދަތުރުފަތުރާ ބެހޭ ދުވަހާ ގުޅިގެން އެ މިނިސްޓްރީން ނެރުނު ބަޔާނެއްގައި ބުނީ ރާއްޖޭގެ ކަނޑުދަތުރުފަތުރުގެ ސިނާއަތް ހަރުދަނާ ކުރުމަށްޓަކައި ސްޓްރެޓެޖިކް އެކްޝަން ޕްލޭންއެއް އެކުލަވާލައި، އިންޓަނޭޝަނަލް މެރިޓައިމް އޯގަނައިޒޭޝަންގެ އެހީގައި ކަންކަން ހަރުދަނާ ކުރުމަށް މިއަހަރު މަސައްކަޔް ފަށާފައިވާ ކަމަށެވެ.

އެގޮތުން މެރިޓައިމް ދާއިރާގެ ގާނޫނުތަކާއި ގަވާއިދުތައް ހެދުމުގެ މަސައްކަތް ކުރަމުން އަންނަ ކަމަށް މިނިސްޓްރީން ބުނެއެވެ.

advertisement

ގަވައިދާ ޚިލާފަށް ނަންބަރު ބޯޑު ހުންނަނަމަ ހޮނިހިރު ދުވަހުން ފެށިގެން ފިޔަވަޅު އަޅަން ފަށަނީ

އެއްގަމުގައި ދުއްވާ އިންޖީނުލީ ވެހިކަލްތަކުގެ ނަންބަރު ބޯޑް ހުންނަން ޖެހޭ ކަމަށް ގަވައިދުގައި ބުނާ އުސޫލަށް އަމަލު ކުރަން ފަށައި އުސޫލާ ޚިލާފަށް ނަންބަރު ބޯޑު ހުންނަ ވެހިކަލުތަކަމާ މެދު އަންނަ ހޮނިހިރު ދުވަހުން ފެށިގެން ފިޔަވަޅު އަޅަން ފަށާނެއެވެ.

އެއްގަމުގައި ދުއްވާ އިންޖީނުލީ ބައެއް އުޅަނދުތަކުގެ ނަންބަރު ބޯޑުތައް ފަހަކަށް އައިސް ހަދައިފައި ހުންނަނީ، އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީ ކުރުމުގެ ގަވާއިދާ ހިލާފަށް ކަމަށް، މިދިޔަ ހޯމަ ދުވަހު ޓްރާންސްޕޯޓް މިނިސްޓްރީން ކުރި އިއުލާނެއްގައި ވަނީ ބުނެފައެވެ.

އެ ގަވާއިދުގައިވާ ގޮތުން އިންޖީނުލީ އުޅަނދު މަގުމަތީގައި ދުއްވޭނީ ރަޖިސްޓްރީކުރުމަށް ފަހު އެ އުޅަނދުގައި ހަރުކުރުމަށް އެއްގަމު އުޅަނދުފަހަރުގެ ރަޖިސްޓްރާ، ނުވަތަ ރަޖިސްޓްރާ އައްޔަންކުރާ ފަރާތަކުން ދޭ ނަންބަރެއް ގަވާއިދުގައި ފާހަގަކޮށްފައިވާ ގޮތަށް ހަރުކުރުމަށް ފަހުއެވެ.

އެއްފަހަރާ 57 ޓަނު ކިރުވައިގެން މަޑަވެލީ ދޯންޏަކުން މިފްކޯގެ ރެކޯޑެއް

މިފްކޯގެ ސީއީއޯ އިސްމާއީލް ފައުޒީ މިއަދު ކުރެއްވި ޓްވީޓެއްގައި ވިދާޅުވީ އެ އެދޯނިން ކިރުވި މަހަށް 971،548 ރުފިޔާ ލިބިފައިވާ ކަމަށެވެ. މިއީ ދެކުނަށް މޫސުން އެހާ ރަނގަޅު ދުވަސްވަރެއް ނޫން ކަން ވެސް ފައުޒީ ފާހަގަކުރެއްވިއެވެ.

ފައުޒީ ވިދާޅުވި ގޮތުގައި އެ ދޯންޏަކީ މިދިޔަ އަހަރު މިފްކޯއަށް އެންމެ ގިނައިން މަސް ކިރުވި ދޯނި ވެސްމެއެވެ. އެގޮތުން، މިދިޔަ އަހަރު ޖުމްލަ 1024 ޓަނަށް ވުރެ ގިނަ މަސް އެ ދޯނިން މިފްކޯއަށް ވަނީ ކިރުވާފައެވެ.

ގަން އެއާޕޯޓު މަޝްރޫއު އަންނަ ހަފުތާގައި ބީލަމަށް

ގަން އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއުގެ ބީލަމަށް އަންނަ މަހު ހުޅުވާލާނެ ކަމަށް އިކޮނޮމިކް މިނިސްޓްރީން ބުނެފިއެވެ.

އިކޮނޮމިކް މިނިސްޓްރީން ބުނީ އެ މަރުހަލާއިން ހަތް ކުންފުންޏެއް ބީލަމަށް ކޮލިފައިވެފައިވާ ކަމަށެވެ.

ގަން އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއުގެ ދަށުން އެ އެއާޕޯޓުގައި އާ ޓާމިނަލެއް ތަރައްގީ ކުރުމަށް ވަނީ ހަމަޖެހިފައެވެ. އޭގެ އިތުރުން އާ ކޮންޓްރޯލް ޓަވަރަކާއި، ފަޔާ ސްޓޭޝަނެއް، އަދި ކާގޯ ވަސީލަތްތައް ވެސް ގާއިމުކުރުމަށް ވަނީ ހަމަޖެހިފައެވެ.

ދަރަވަންދޫގައި ހެލްތް އިމަޖެންސީ އެންޑް ޓްރައުމާ ޔުނިޓެއް ހުޅުވައިފި

އިންޑިއާގެ އެހީގެ ދަށުން ގާއިމްކުރި މި އިމަޖެންސީ ޔުނިޓް ހުޅުއްވައިދެއްވީ ޖެންޑާ މިނިސްޓަރު އައިޝަތު މުހައްމަދު ދީދީއެވެ. މި ރަސްމިއްޔަތުގައި ހެލްތު މިނިސްޓަރު އަހްމަދު ނަސީމާއިގެ އިތުރުން އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ބައިވެރިވެވަޑައިގަތެވެ.

އިމަޖެންސީ ޔުނިޓް ހުޅުވުމަށް ދަރަވަންދޫގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ނަސީމް ވިދާޅުވީ މާލެއާއި އާތޮޅުތަކުން ލިބެންހުންނަ ޚިދުމަތްތަކުގެ ފަރަގު ކުޑަކޮށް، ރާއްޖޭގެ ކޮންމެ ހިސާބަކުން ވެސް ކޮންމެހެން ލިބެންޖެހޭ ޚިދުމަތްތައް ރަށު ފެންވަރުގައި ގާއިމްކުރުމަށް މި ސަރުކާރުން ފަށާފައިވާ މަސައްކަތަކީ ރައްޔިތުން އިންތިހާއަށް ބޭނުންވެފައިވާ މުހިންމު މަސައްކަތެއްކަމަށެވެ.