ވޯލްޑް ޓްރެވަލް އެވޯޑްސްގެ ލީޑިންގ ޓޫރިސްޓް ބޯޑު 2022ގެ ޝަރަފް އެމްއެމްޕީއާރުސީއިން ކާމިޔާބުކޮށްފި

ރާއްޖޭގެ ތާރީޚުގައި ފުރަތަމަ ފަހަރަށް ވޯލްޑްސް ޓްރެވަލް އެވޯޑްސްގެ ލީޑިން ޓުއަރިސްޓް ބޯޑުގެ ޝަރަފް އެމްއެމްޕީއާރުސީން ހޯދާ، ދުނިޔޭގެ ފެންވަރުގައި މަންޒިލް މާކެޓްކުރުމަށް ކުރާ މަސައްކަތްތަށް މިވަނީ އައު ހަރުފަތަކަށް ގެންގޮސްފައެވެ.

29 ވަނަ ވޯލްޑް ޓްރެވަލް އެވޯޑްސްގައި ވޯލްޑްސް ލީޑިން ޓޫރިސްޓް ބޯޑް 2022 ގެ މަގާމު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް)އިން ކާމިޔާބުކޮށްފިއެވެ. މިއީ ރާއްޖޭގެ ތާރީޚުގައިވެސް ދުނިޔޭގެ އެންމެ ޝަރަފުވެރި ޓޫރިސްޓް ބޯޑުގެ މަގާމު އެމްއެމްޕީއާރުސީއިން ކާމިޔާބުކުރި ފުރަތަމަ ފަހަރެވެ.

advertisement

އަދި ދިވެހިރާއްޖެ ފަތުރުވެރިކަމުގެ މަންޒިލެއްގެ ގޮތުގައި އައު އުސްމިންތަކަކަށް އުފުލުމަށް ވޭތުވެދިޔަ އަހަރު އެމްއެމްޕީއާރުސީއިން ކުރި ބުރަ މަސައްކަތާއި ޚިދުމަތްތެރިކަމުގެ އަލިގަދަ ނިޝާނެކެވެ. މި އަހަރު ރާއްޖެއިން ވަނީ ޖެހިޖެހިގެން ތިންވަނަ ފަހަރަށް ޑަބްލިއުޓީއޭގެ އެންމެ ޝަރަފުވެރި އެވޯޑް ކަމުގައިވާ ދުނިޔޭގެ ލީޑިންގ ޑެސްޓިނޭޝަންގެ މަގާމު ވެސް ކާމިޔާބުކޮށްފައެވެ.

އޮމާންގެ ރިޓްޒް ކާލްޓަންގެ ހޮޓެލެއްކަމުގައިވާ އަލް ބުސްތާން ޕެލަސްގައި ބޭއްވި ވޯލްޑް ޓްރެވަލް އެވޯޑްސް 2022 ގެ ހަފްލާގައި ދިވެހިރާއްޖެއަށް ލިބުނު މި ޝަރަފުވެރި އެވޯޑާއި ހަވާލްވެވަޑައިގެންނެވީ އެމްއެމްޕީއާރުސީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު ( ސީއީއޯ އެންޑް އެމްޑީ) އަލްފާޟިލް ތޮއްޔިބު މުހައްމަދުއެވެ.

މި ރަސްމިއްޔާތުގައި ވާހަކަ ދައްކަވަމުން ތޮއްޔިބު ވިދާޅުވީ ދުނިޔޭގެ ލީޑިން ޑެސްޓިނޭޝަންގެ ލަގަބު ޖެހިޖެހިގެން ތިން އަހަރު ހޯދުމަކީ ހަގީގަތުގައި ވެސް ލިބުނު ޝަރަފެއްކަމުގައެވެ. މި އަހަރަކީ ދިވެހިރާއްޖޭގެ ފަތުރުވެރިކަމުގެ ރަން ޔޫބީލްކަމުން، އަޅުގަނޑުމެންގެ އައްސޭރިފަށަށް ފަތުރުވެރިންނަށް މަރުހަބާ ކިޔަންފެށިތާ 50 އަހަރު ފުރުން ފާހަގަކުރުމަށް މިއަށް ވުރެ ރަނގަޅު ކާމިޔާބީއެއް ނެތްކަމަށްވެސް ތޮއްޔިބު ވިދާޅުވިއެވެ. މި ކާމިޔާބީއަކީ އަޅުގަނޑުމެންގެ ސަރުކާރުގެ އިރުޝާދާއި، އިންޑަސްޓްރީގެ ބައިވެރިންގެ އެއްބާރުލުމާއި، މުޅި ފަތުރުވެރިކަމުގެ ސިނާޢަތުގެ ބުރަ މަސައްކަތުގެ ސަބަބުން ހާސިލުވި ޝަރަފެއްކަން ފާހަގަކުރައްވަމުން ތޮއްޔިބުގެ ވާހަކައިގައި އިތުރަށް ވިދާޅުވީ ދުނިޔޭގެ ހުރިހާ ކަންކޮޅުތަކެއްގެ މީހުން ދިވެހިރާއްޖެ ދެކެ ވާ ލޯބި ވަރަށް ސާފުކޮށް ފެނިއްޖެކަމަށެވެ.

އަދި މި އަހަރަކީ އެމްއެމްޕީއާރުސީ (ވިޒިޓް މޯލްޑިވްސް)އިން ދުނިޔޭގެ ލީޑިންގ ޓޫރިސްޓް ބޯޑުގެ ޝަރަފު ކާމިޔާބުކުރި ފުރަތަމަ އަހަރުކަމުން، ފާއިތުވި އަހަރުތަކުގައި ދުނިޔެއަށް ކުރިމަތިލާން ޖެހުނު އެކި އެކި ގޮންޖެހުންތައް ތަހައްމަލުކޮށް، އެމްއެމްޕީއާރުސީގެ ޓީމުން ކުރި ބުރަ މަސައްކަތުގެ އަގު ދުނިޔެއިން ވަޒަންކޮށްފައިވާކަން އުފަލާއެކު ތޮއްޔިބު ފާހަގަކުރެއްވިއެވެ.

ތޮއްޔިބުގެ ވާހަކަ ނިންމަވާލައްވަމުން ޑަބްލިއުޓީއޭގައި ރާއްޖެއަށް އަދި އެމްއެމްޕީއާރުސީއަށް ވޯޓު ދެއްވި ހުރިހާ ބޭފުޅުންނަށް ޝުކުރު އަދާކުރައްވާ، ސަނީ ސައިޑް އޮފް ލައިފް އަށް މަރުހަބާ ކިޔާނެ ފުރުސަތު ލިބޭނެ ކަމަށް އުންމީދުކުރައްވާކަމަށް ވިދާޅުވިއެވެ.