ތާރީހުގެ ތެރެއިން: ރައްޔިތުންގެ މަޖިލިސް މެމްބަރުން ފައިސާއަށް ޕާޓީ ބަދަލުކުރަން ފެށުން

ރާއްޖޭގެ ސިޔާސީ ހަޔާތުގައި، މަލްޓިޕާޓީ ޑިމޮކްރަސީ އައުމަށް ފަހު ދައުލަތުގެ ތިން ބާރު ވަކިވެ ހިންގަން ފެށި ހިސާބުން، ރައީސުލްޖުމުހޫރިއްޔާގެ ހާއްސަ މެމްބަރުން މަޖިލީހުން ބޭރުކުރެވުނެވެ. 2009 ވަނަ އަހަރު އިންތިހާބުކުރި ރައްޔިތުންގެ މަޖިލީހުން ފެށިގެން މިއަދާއި ހަމައަށް ވެސް މަޖިލީހުގައި ތިބީ ރައްޔިތުންގެ ވޯޓުން ހޮވާފައިތިބި މެމްބަރުންނެވެ.

ނަމަވެސް މި މެމްބަރުންނަކީ އެކި ފަހަރު އެކި ޕާޓީތަކާ ގުޅެމުން އަންނަ ފަރާތްތަކެވެ. ރާއްޖޭގައި އެންމެ ފުރަތަމަ މިކަން ފެށުނީ އއ ތޮއްޑޫ ދާއިރާގެ ރައްޔިތުން 2009 ވަނަ އަހަރު އެ ދާއިރާއަށް ހޮވި ދިވެހި ރައްޔިތުންގެ ޕާޓީ (ޑީއާރްޕީގެ) މެމްބަރު އަލީ ވަހީދު އޭރުގެ ވެރިކަމުގައި އޮތް ޕާޓީ އެމްޑީޕީ އާއި ގުޅުނު ހިސާބުންނެވެ.

advertisement

އަލީ ވަހީދު އެމްޑީޕީ އާއި ގުޅުމުން އެޕާޓީ އިން ވަނީ އެކަން ފާހަނގަކޮށް ބޮޑު ހަފްލާއެއްބާއްވާފައެވެ. އަލީ ވަހީދު ޕާޓީ ބަދަލު ކޮށްފައިވަނީ އެތައް މިލިޔަން ރުފިޔާ އަށް ކަމަށް ގިނަ ބަޔަކު ތުހުމަތުކުރެއެވެ. އެދުވަސްވަރު އޭނާ ވަނީ ހުޅުމާލެއިން ދެ ގޯތި ގަނެފައެވެ.

އޭގެ ފަހުން 2018 ވަނަ އަހަރު އޭނާ ވަނީ ޖުމުހޫރީ ޕާޓީ އާއި ގުޅިފައެވެ. މިހާރު ހިނގަމުން މި އަންނަ ކޯލިޝަން ސަރުކާރުގެ ޓޫރިޒަމް މިނިސްޓަރުކަން އޭނާ ކޮށްފައިވަނީ ޖުމުހޫރީޕާޓީގެ ސްލޮޓެއްގައެވެ. 2011 ވަނަ އަހަރު އަލީ ވަހީދު ޑީއާރްޕީ އިން އެމްޑީޕީ އަށް ބަދަލުވީ ހިސާބުން މަޖިލިސް މެމްބަރުން ޕާޓީ ބަދަލުކުރުން އާއްމު ކަމަކަށް ބަދަލުވިއެވެ.

ހަމަ އެދުވަސްވަރު އައްޑޫ މީދޫ ދާއިރާގެ މެމްބަރު ރޮޒޭނާ ވަނީ ޑީއާރްޕީ ދޫކޮށް ގައުމީ އިއްތިހާދު ޕާޓީ އާއި ގުޅިފައެވެ. އެޕާޓީގެ ވެރިކަން ނިމުމުން އޭނާވަނީ އެޕާޓީ ދޫކޮށް އެމްޑީޕީ އާއި ގުޅިފައެވެ. އައްޑޫ މަރަދޫ ދާއިރާ މެމްބަރު މަވޯޓާ ޝަރީފުވެސް ވަނީ ރާއްޖޭގެ ވިޔަފާރިވެރިންގެ ޕާޓީތަކާއި އެކިފަހަރު ގުޅިފައެވެ.

2023ގެ އިލެކްޝަން ކައިރިވަމުން އަންނަ އިރު އަނެއްކާވެސް މަޖިލިސް މެމްބަރުން މިވަނީ ޕާޓީ ބަދަލުކޮށް ކޮޅު ބަދަލުކުރުމުގެ ވިޔަފާރި ފަށާފައެވެ.