ނުކުޅެދުންތެރިކަން ހުންނަ މީހުންނަށް ދިމާވާ މައްސަލަތަކާ ގުޅޭގޮތުން މަޝްވަރާކުރުމަށް ރިވެލި ފޯރަމް ބާއްވައިފި

ނުކުޅެދުންތެރިކަން ހުނަން މީހުންނަށް ދިމާވާ އުނދަގޫތައް ދެނެގަތުމަށް “ރިވެލި ފޯރަމް 2022” ގެ ނަމުގައި ފޯރަމްއެއް ޖެންޑާ މިނިސްޓްރީން އިއްޔަ ބާއްވައިފިއެވެ.

އެ ފޯރަމް ފެށުމަށް އިއްޔަ ހ. މީރުމާ ހޯލުގައި ބޭއްވި ރަސްމިއްޔާތު ޝަރަފްވެރި ކޮށްދެއްވީ ޖެންޑާ މިނިސްޓަރު އައިޝަތު މުހައްމަދު ދީދީއެވެ.

advertisement

 ޖަލްސާގައި ވާހަކަ ދައްކަވަމުން މިނިސްޓަރ ވިދާޅުވީ ނުކުޅެދުންތެރިކަން ހުންނަ މީހުންގެ ޙައްގުތައް ކަށަވަރުކުރުމަށް ހުރިހާ އިދާރާތަކެއް އެކައްޗެއް ކިޔަންޖެހޭކަމަށެވެ. އެގޮތުން އެފަރާތްތަކަށް މިހާރު ކުރިމަތިވަމުންދާ އެންމެ ބޮޑު ދައްޗަކީ ބޭނުންވާ ޚިދުމަތްތަކަށް އެކްސެސްވުމަށް ނުވަތަ ވާޞިލްވުމަށް ކުރިމަތިވެފައިވާ ހުރަސްތައް ކަމަށް މިނިސްޓަރ ވިދާޅުވިއެވެ. އެގޮތުން ޢިމާރާތްތަކަށް ވަނުމުގައާއި ޢާއްމު އިޖުތިމާޢީ ކަންކަމުގައި ޝާމިލުވެ އުޅުމުގައި ދިމާވަމުންދާ ހުރަސްތައް މިނިސްޓަރ ފާހަގަކުރެއްވިއެވެ.

ޖެންޑަރ މިނިސްޓަރ ވިދާޅުވީ މިހާރު ކުރަމުންދާ އެންމެ މުހިއްމު އެއް މަސައްކަތަކީ ލާމަރުކަޒީ އުސޫލުގެ ދަށުން އަތޮޅުތެރޭގައި ތިބި ނުކުޅެދުންތެރިކަން ހުންނަ ފަރާތްތަކަށް ބޭނުންވާ އެހީތެރިކަން ކައުންސިލްތައް މެދުވެރިކޮށް ދިނުމުގެ މަސައްކަތްކަމަށެވެ. އަދި މީގެ ދަށުން ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ފޯރުކޮށް ދިނުމާއި ފަރުވާ ދެވޭނެ މީހުން ތަމްރީންކުރުމުގެ މަސައްކަތް ޔުނިސެފާއި ގުޅިގެން ކުރަމުން އަންނަކަމަށް މިނިސްޓަރ ވިދާޅުވިއެވެ.

ރިވެލި ފޯރަމްގައި ނުކުޅެދުންތެރިކަން ހުންނަ މީހުންގެ ކަންކަމާ ގުޅުން ހުރި 23 އިދާރާއަކުން ބައިވެރިވިއެވެ. އަދި ނުކުޅެދުންތެރިކަން ހުންނަ މީހުންނާއި ކުދިންނަށް ތަފާތު ޚިދުމަތްތައް ފަސޭހައިން ލިބޭނެ އިންތިޒާމުތަކެއް ހަމަޖެއްސުމާއި އެ މީހުންނަށް ލިބޭ ހައްގުތައް ކަށަވަރުކުރުމަށްޓަކައި ހުރި ހުރަސްތަކާއި ގޮންޖެހުންތައް ދެނެގަތުމާ ގުޅޭގޮތުން ފޯރަމްގައި މަޝްވަރާކުރިއެވެ.

މީގެ އިތުރުން ނުކުޅެދުންތެރިކަން ހުންނަ މީހުންނާއި ކުދިންގެ ހުނަރާއި އުފެއްދުންތެރިކަން ދައްކާލުމުގެ ގޮތުން “ރިވެލި މައުރަޒު 2022″ގެ ނަމުގައި އިއްޔެ ވަނީ ޚާއްސަ މައުރަޒެއް ވެސް ހުޅުވައިފައެވެ.