އޭޝިއަން އޯޝޭނިއަން ސްޓޭންޑަރޑް ސެޓަރސް ގްރޫޕްގެ  (އޭ.އޯ.އެސް.އެސް.ޖީ.) މެމްބަރަކަށް ދިވެހިރާއްޖެ ވެއްޖެ

އޭޝިއަން އޯޝޭނިއަން ސްޓޭންޑަރޑް ސެޓަރސް ގްރޫޕްގެ  (އޭ.އޯ.އެސް.އެސް.ޖީ.) ގެ މެމްބަރެއްގެ ގޮތުގައި ދިވެހިރާއްޖޭގެ އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދި މޯލްޑިވްސް (ސީ.އޭ. މޯލްޑިވްސް) އެޑްމިޓް  ކޮށްފިއެވެ.

އޭޝިއާ އަދި އޯޝޭނިއާގެ ގައުމުތަކުގެ ޕްރޮފެޝަނަލް އެކައުންޓިންގ ހިމެނޭ ބައިނަލްއަޤްވާމީ މުއަސްއަސާއަށް ކަމަށްވާ އޭ.އޯ.އެސް.އެސް.ޖީ. ގެ މެމްބަރެއްގެ ގޮތުގައި ސީ.އޭ. މޯލްޑިވްސް އެޑްމިޓްކޮށްފިއެވެ. ނޭޕާލްގެ ވެރިރަށް، ކަތްމަންޑޫގައި މިހާރު ކުރިއަށްދާ އޭ.އޯ.އެސް.އެސް.ޖީ.ގެ 14 ވަނަ އަހަރީ އާންމު ބައްދަލުވުމުގައި،  ސީ.އޭ. މޯލްޑިވްސްއަށް ވަނީ އެ މުއަސްއަސާގެ މެމްބަރޝިޕް ދެވިފައެވެ.

advertisement

އިންސްޓިޓިއުޓް އޮފް ޗާޓަރޑް އެކައުންޓަންޓްސް އޮފް ދި މޯލްޑިވްސް (ސީ.އޭ. މޯލްޑިވްސް) އަކީ ޤާނޫނު ނަންބަރު 2020/13 (ދިވެހިރާއްޖޭގެ ޗާޓަރޑް އެކައުންޓެންޓުންގެ ޤާނޫނު) ގެ  ދަށުން 08 ސެޕްޓެމްބަރު 2020 ވަނަ ދުވަހު، ދިވެހިރާއްޖޭގެ އެކައުންޓެންސީ ޕްރޮފެޝަންއާއިގުޅޭ ކަންކަން، ބައިނަލްއަޤްވާމީ އުސޫލުތަކާއި ހަމަތަކާ އެއްގޮތްވާ ގޮތުގެމަތިން ތަންޒީމުކޮށް، ދިވެހިރާއްޖޭގައި އެކައުންޓަންސީ ޕްރޮފެޝަނެއް ގާއިމުކޮށް، އެ ޕްރޮފެޝަން ކުރިއެރުވުމަށް މަގުފަހިކޮށް ތަރައްޤީކުރުމަށް އުފައްދާފައިވާ އިންސްޓިޓިއުޓްއެކެވެ. އެހެންކަމުން އޭ.އޯ.އެސް.އެސް.ޖީ. ގެ މެމްބަރަކަށް ދިވެހިރާއްޖެވުން އެއީ ދިވެހިރާއްގެ އަދި ސީ.އޭ. މޯލްޑިވްސްއަށްވެސް ލިބިގެންދިޔަ ވަރަށް ބޮޑު ކުރިއެރުމެކެވެ.

އޭ.އޯ.އެސް.އެސް.ޖީ. އަކީ ޖުމްލަ 27 ޤައުމެއްގެ އެކައުންޓިންގ އޯގަނައިޒޭޝަން ހިމެނޭގޮތަށް 2009 ވަނަ އަހަރު އުފައްދާފައިވާ ޖަމާޢަތެކެވެ. މި ޖަމާޢަތުގެ މަޤްސަދަކީ، ބައިނަލްއަޤްވާމީ އެކައުންޓިންގ ސްޓޭންޑަރޑްތައް އެކި ޤައުމުތަކުގައި އެޑޮޕްޓް ކުރުމާއި އަދި ފެންވަރު ރަނގަޅު އެކައުންޓިންގ އަދި ފައިނޭންޝަލް ރިޕޯޓިންގ އުޞޫލްތަކާއި ހަމަތައް ޤާއިމްކުރުމަށް ލަފާދިނުމާއި އެހީތެރިވެދިނުމެވެ. އޭ.އޯ.އެސް.އެސް.ޖީ. ގެ މެމްބަރ ޤައުމުތަކުގެ ތެރޭގައި އޮސްޓްރޭލިއާ، ޗައިނާ، އިންޑިއާ، ޖަޕާން، ސަޢޫދީ ޢަރަބިއްޔާ އަދި ނިއު ޒީލެންޑްވެސް ހިމެނެއެވެ. ދިވެހިރާއްޖެއަށް ލިބިގެންދިޔަ މެމްބަރޝިޕްއާއިއެކު މިހާރު 28 ގައުމު އޭ.އޯ.އެސް.އެސް.ޖީ. ގެ މެމްބަރުންގެ ތެރޭގައި ހިމެނެއެވެ.

މި މެމްބަރޝިޕްގެ ސަބަބުން، ދިވެހިރާއްޖޭގައި ފައިނޭންޝަލް ރިޕޯޓިންގ އިތުރަށް ހަރުދަނާކޮށް، ކޮލިޓީ ހިފެހެއްޓުމަށް މަގުފަހިވެގެންދާނެއެވެ. މި އެއްބަސްވުމުގައި ސީ.އޭ. މޯލްޑިވްސްގެ ފަރާތުން ސޮއި ކުރެއްވީ އިންސްޓިޓިއުޓްގެ ނައިބު ރައީސް، އަލްފާޟިލް، ޙަސަން މުޙައްމަދު އެވެ.