ޖަމިއްޔާ ޖަމާއަތްތަކަށް ހިތްވަރުދޭ އެމް.ވީ.ޕްލަސް ކޮމިއުނިޓީ އިމްޕެކްޓް އެވޯޑްސް 2022 މިމަހު 15ގައި ބާއްވަނީ

ރާއްޖޭގެ ޖަމިއްޔާ ޖަމާއަތްތަކަށް ހިތްވަރުދިނުމުގެ ގޮތުން އެމް.ވީ.ޕްލަސް އިން މިދިޔަ އަހަރުން ފެށިގެން ދޭން ފެށި ކޮމިއުނިޓީ އިމްޕެކްޓް އެވޯޑްސް 2022 މިމަހު 15ގައި ބޭއްވުމަށްވަނީ ހަމަޖެހިފައިކަމަށް އެ މީޑިއާއިން މައުލޫމާތުދީފި އެވެ.

އެމް.ވީ.ޕްލަސް ކޮމިއުނިޓީ އިންޕެކްޓް އެވޯޑްސްގެ މަޤްސަދަކީ ހޮވާލެވޭ ލޯކަލް އެންޖީއޯތަކުގެ މަސައްކަތްތަކުގެ އަގު ވަޒަންކޮށް އަދި އެޖަމިއްޔާތަކުގެ މަސައްކަތް އިތުރަށް ފުޅާކުރުމަށް ހިތްވަރުދިނުމެވެ. މިގޮތުން މިއަހަރުވެސް 11 ޖަމްއިއްޔާއަކަށް، އެ ފަރާތްތަކުން މުޖުތަމައުއަށް ކޮށްދީފައި އަދި ކުރަމުން ގެންދާ ހިދުމަތްތަކުގެ އަގުވަޒަންކުރުމުގެ ގޮތުން އެވޯޑްދިނުމަށް ވަނީ ހަމަޖެހިފައި އެވެ.

advertisement

ހޮވާލެވޭ ޖަމިއްޔާތަކަށް އެވޯޑްދިނުމުގެ އިތުރުން، މިއަހަރުގެ ޖަލްސާގައި އިޖްތިމާއީ މައްސަލަތަކާއި ގުޅޭ އެކި އެކި ޕެނަލް ޑިސްކަޝަންތައްވެސް ކުރިއަށް ގެންދިޔުމަށްވަނީ ހަމަޖެހިފައި އެވެ. މި ޕެނަލްތަކުގައި ވާހަކަ ދެކެވޭނެ މައުލޫތަކުގެ ތެރޭގައި ޑްރަގް އެޑިކްޝަނާއި، ނަފްސާނީ ދުޅަހެޔޮކަމާ، މައްސައްކަތްތެރިންގެ ހައްގުތަކާއި އަދި ތިމާވެށީގެ މައްސަލަތައްފަދަ މައުލޫތައް ހިމެނޭކަންވެސް ފާހަގަކޮށްލަމެވެ. މި ޕެނަލް ޑިސްކަޝަންތަކުގައި ބައިވެރިވާނީ އެ އިޖްތިމާއީ މައްސަލަތަކާ ގުޅޭ ޖަމިއްޔާތަކާއި އަދި ސަރުކާރުގެ އެކި އެކި އިދާރާތަކުގެ ބޭފުޅުންނާއި އަދި އެކްޓިވިސްޓުންނެވެ.

އެމް.ވީ.ޕްލަސްއިން ގަބޫލުކުރާ ގޮތުގައި ނޮން ޕްރޮފިޓް ޖަމިއްޔާތަކަކީ އިޖްތިމާއީ އެކިއެކި ކަންކަމުގައި ހައްލު ހޯދައިދިނުމަށް މުޖުތަމައުގައި ވަރަށް މުހިއްމު ރޯލެއް އަދާކުރާ ބައެކެވެ. އެހެންކަމުން މިފަދަ ޖަމިއްޔާތައް ބާރުވެރިކޮށް ޖަމިއްޔާތަކަށް އެހީތެރިވުމަކީ އެމް.ވީ.ޕްލަސްގެ ވަރަށް ބޮޑު އަމާޒެކެވެ.