ޚަބަރު

ދޮރުން ދޮރަށް ދާއިރު ފެންނަ ހާލަތާއި ހަދާ ސިޔާސަތުތަކާއި ގުޅުމެއް ނުހުންނަކީ ކީއްވެ؟

12 ޖެނުއަރީ 2023 - 11:51

މިއޮތީ އަނެއްކާވެސް ދޮރުން ދޮރަށް ހިނގާ ދުވަސްވަރު ފެށިފައެވެ. ސިޔާސީ ކެމްޕެއިން ތަކުގައި ރައްޔިތުން ގާތަށް ގޭގެއަށް ސިޔާސީ މީހުން އެންމެ ފުރަތަމަ ދާން ފެށީ 2008ގެ ރިޔާސީ އިންތިހާބަށް ކެމްޕެއިން ކުރި ދުވަސްވަރުއެވެ.

އޭރުގެ ރައީސުލް ޖުމުހޫރިއްޔާ މައުމޫނު އަބްދުލް ގައްޔޫމުގެ ވެރިކަމަށް 30 އަހަރު ފުރުނު އިރުވެސް ދުވަހަކުވެސް ރައްޔިތުންގެ ގޭގެއަށް ނުދެއެވެ. އޭރަކު ކެމްޕެއިން ކުރުމެއް އަމުދަކުން ނުވެސް އޮވެމެއެވެ. ލަމުން އައީ ފެންނަ ނުފެންނަ ވޯޓެއް ކަމުން، ވޯޓު ކަރުދާހުގައި ވާދަވެރި ބައެއްގެ ނަމެއް ނޯވެއެވެ. އޮތަސްވެސް އެމީހަކަށް ވޯޓުލާން ކެރޭ ބަޔަކު ނުތިބެއެވެ.

advertisement

މައުމޫނުގެ ނަން ކިޔަންވެސް މީހުން އޭރު ބިރުގަނެއެވެ. އޭނާ އަށް މުހާތަބުކޮށް މީހުން ކިޔައި އުޅެނީ ރައީސުލް ޖުމުހޫރިއްޔާއެވެ. މައުމޫނުގެ ނަމުން މުހާތަބުކުރާކަށް ނުކެރެއެވެ. އޭނާއާއި ބެހޭ ވާހަކައެއް ދެއްކިއަސް ވަށައިގެން ނަޒަރު ހިންގައި ބެލުމަށް ފަހު ސިއްރުސިއްރުން ނޫނީ ވާހަކަ ދައްކާކަށް އޭރު މީހުންނަކަށް ނުކުރެއެވެ.

ވާދަވެރި ސިޔާސީ ކެމްޕެއިންތަކުގެ ފެށުން

ރައީސާއި ރައްޔިތުންނާއި މެދު އޮތް ގުޅުން އެހާލެއްގައި އޮއްވައި ދެން ފެނުނީ ސިޔާސީ ޕާޓީތައް އުފެދިގެން ސިޔާސީ ކެމްޕެއިންތައް ފެށުނު ތަނެވެ. މައުމޫނުގެ ނަން ވެސް ކިޔާލަން ނުކެރި ރައްޔިތުންތަކެއް ތިއްބައި، އޭނާގެ ވާދަވެރި ކެންޑިޑޭޓު އައިސް ގޭގޭގެ ބަދިގެތަކަށް ވަންނަން ފެށީއެވެ. ހުނި ގޭނުމާއި ހަވާދު ފުނޑުން ފަދަ ކަންތަކުގައިވެސް ބައިވެރިވާން ފެށީއެވެ.

ބަޔަކު ބަށިކުޅެން ތިބިއްޔާ އެތަނަކަށް ގޮސް އެކަމުގައި ވެސް ބައިވެރިވާން ފެށީއެވެ. ކުޑަކުދިން އުރައި ދޮންދޭން ފެށީއެވެ. މިއީ ދިވެހިންގެ ލޮލުން ދުވަހަކުވެސް ފެނުނު މަންޒަރެއް ނޫނެވެ. މިތަން ފެނި މީހުން އުފަލުން ފޮޅުނެވެ. ގޭގެ ހާލަތު ދައްކައި، ކިޔައިދޭން ފެށިއެވެ. އެވާހަކަތައް ގާތުން އަޑުއަހަމުން އައީ ސީދާ ރިޔާސީ ކެންޑިޑޭޓެވެ. މާދަމާ ފަހަރުގައި ރައީސަށް ވާން ހުރި މީހާއެވެ.

ނަޝީދު މާފަންނުދެކުނު ދާއިރާގަ ދޮރުން ދޮރަށް ހިންގެވުން، 2013 | ފޮޓޯ: އެމްޑީޕީ

އަމޭ މިއޮތީވެރިކަމޭ ބުނެ ރައްޔިތުން އެފަހަރު މައުމޫނަށް ވެރިކަމެއް ނުދިނެވެ. ވެރިކަން ހަވާލުކުރީ ކޯލިޝަން ސަރުކާރަކާއެވެ. އޭރު ރައްޔިތުން ތިބި ހާލަތަށް ބަލައި އެހާލަތު ބަދަލުކުރުމުގެ ބޭނުމުގައި އެވެރިކަމުގައި ރާއްޖެއަށް މުޅިން އާ ސިޔާސަތުތަކެއް ތައާރަފްކުރިއެވެ. އޭގެ ތެރޭގައި، ސިއްހީ އިންޝިއުރެންސް ސިޔާސަތާއި، ޕެންޝަންގެ ސިޔާސަތާއި، ސޯޝަލް ޕްރޮޓެކްޝަންގެ ދަށުން މުސްކުޅިންނާއި، ނުކުޅެދުންތެރިކަން ހުންނަ މީހުންނަށް އިނާޔަތެއް ދޭން ފެށުން ހިމެނެއެވެ.

ނަމަވެސް އަމިއްލަ ފައިމައްޗަށް ތެދުވެ ހުރެވޭ މިންވަރަށް އާއްމުންނަށް އިގްތިސާދީ ސިޔާސީ އިޖުތިމާއީ މިނިވަންކަން ނުލިބޭ ކަމަށް ގަބޫލުކުރާ މީހުން ގިނައެވެ. ހާއްސަކޮށް އާމްދަނީގެ ގޮތުން ބާރުވެރި މީހުން ރާއްޖޭގައި މަދުކަމަށް ހަޔަސް ރިޕޯޓުން ވެސް ދައްކައެވެ.

ދޮރުން ދޮރަށް ހިނގާތާ މިއީ 3 ވަނަ ރިޔާސީ އިންތިހާބު، ބަދަލެއް އައިތަ؟

ދޮރުން ދޮރަށް ހިނގައި ރައްޔިތުންގެ ހާލަތު ގާތުން ބަލަމުން، ފޮޓޯ ނަގަމުން، ވާހަކަތައް ނޯޓު ކުރަމުން ހިނގާތާ މިއީ 3 ވަނަ ރިޔާސީ އިންތިހާބީ އަހަރެވެ. ގޭގެތަކުގެ ތެރެއިން ފެންނަ ނާއުއްމީދީ މަންޒަރަށް ރިއާޔަތްކޮށް އިންގިލާބީ ބަދަލުތަކެއް މިދިޔަ 10 އަހަރުތެރޭގައި ފެނިފައެއް ނެތެވެ.

ދިރިއުޅުމުގެ ހަރަދާއި ލިބޭ އާމްދަނީގެ ގޮތުން ރައްޔިތުންގެ ދިރިއުޅުމުގެ ހާލަތަށް މާބޮޑު ބަދަލުތަކެއް އައިކަމަކަށް ހިސާބުތަކުން ނުދައްކައެވެ. ދޮރުންދޮރަށް ހިނގާ ހިނގުމުގެ ފޮޓޯތަކުން ފެންނަނީ ރައްޔިތުންގެތެރޭގައި ވަރަށް ނިކަމެތިހާލުގައި ތިބި މީހުން އަދިވެސް ގިނަކަމެވެ. އަނެއްކާވެސް ގޭގޭގެ ބަދިގެތަކަށް ޒިޔާރަތްކުރުން ފެށިއްޖެއެވެ. ފޮޓޯތަކަށް ބަލާލުމުން ހީވަނީ ބޭނުމަކީ އެންމެ ފަގީރު ގެއަށް ގޮސް އެންމެ އަވަހަށް އެބަޔަކާއި ވާހަކަދައްކައި ފޮޓޯ ނެގުމުގެ ވާދަވެރިކަމެއް ވެސް އޮތްހެންނެވެ.

މިފަހަރު ހަދާ ވައުދުނާމާގައި ހިމަނާނީ ކޮން ވާހަކަތަކެއް ބާއެވެ؟ އަލުން ލިޔާނެ އާ ވާހަކައެއް އެބައޮތްބާއެވެ؟ އަދިވެސް ރައްޔިތުން ތިބީ ތާހިރު ދިރިއުޅުމެއް ހޯދުމުގެ އުއްމީދުގައެވެ. ސަލާންޖެހުން ހުއްޓޭނެ ދުވަހެއްގެ އިންތިޒާރުގައެވެ. ބޯހިޔަލެއްގެ އިންތިޒާރުގައެވެ. މަޖިލިސް މެމްބަރުގެ ގާތަށް ގޮސް އާދޭސް ނުކޮށް ވަޒީފާއެއް ހޯދޭނެ ދުވަހެއްގެ އިންތިޒާރުގައެވެ. މިކަންކަން ހައްލު ކުރާނެ އާ ގޮތެއް ނުވަތަ އާ ސިޔާސަތުތަކެއްގެ ވާހަކަ މިފަހަރުގެ ވައުދުބަރީގައި ހިމެނޭނެބާއެވެ؟ ނުވަތަ އޮތީ ހަމަ ކުރިންވެސް ދެއްކި ވާހަކަތައް އައު ބަހުރުވައަކުން އައު ރާގަކަށް ދައްކައި ރައްޔިތުން ހައްދާލުންބާވައެވެ؟

ރިއެކްޝަންސް
0
0
0
0
0
0
0