މިދިޔަ މަހު ކުޑަކުދިންނަށް ކުރާ އަނިޔާއާ ގުޅޭ 109 މައްސަލައެއް

ފާއިތުވި ޑިސެމްބަރު މަހުގައި 245 މައްސަލައެއް ޖެންޑަރ މިނިސްޓްރީއަށް ހުށައަޅާފައިވާކަމަށް ތަފާސްހިސާބު ތަކުން ދައްކައިފިއެވެ.

މައްސަލަތަކުގެ ތެރެއިން ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 109 މައްސަލަ ޑިސެންބަރު މަހު ރިޕޯޓުކޮށްފައިވާ ކަމަށް ޖެންޑާ މިނިސްޓްރީގެ ތަފާސްހިސާބުތައް ދައްކައެވެ. ޖެންޑާއިން ބުނީ އެންމެ ގިނައިން ރިޕޯޓުކޮށްފައި ވަނީ ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ މައްސަލަ ކަމަށެވެ. އެގޮތުން އެ ބާވަތުގެ 30 މައްސަލައެއް ޑިސެމްބަރު މަހު ހުށަހަޅާފައިވާ ކަމަށް ޖެންޑާއިން ބުނެއެވެ

advertisement

އޭގެ އިތުރުން އިހުމާލުވުމުގެ 29 މައްސަލަ، ޖިންސީ ހާނިއްކައިގެ 19 މައްސަލަ، ޖިސްމާނީ ހާނިއްކައިގެ 13 މައްސަލަ، ނަފްސާނީ ހާނިއްކައިގެ 12 މައްސަލަ ހުށަހަޅާފައިވާ ކަމަށް ވެސް ތަފާސްހިސާބުތަކުން ދައްކައެވެ. ބްލެކްމެއިލް ކުރުމުގެ އެއް މައްސަލަ، އެހެން ކުދިންގެ ފަރާތުން ގަނާ ލިބުމުގެ އެއް މައްސަލަ އަދި އެހެން ކުދިންގެ ފަރާތުން އިންޓަނެޓް މެދުވެރިކޮށް ލިބޭ ގެއްލުމުގެ އެއް މައްސަލަ ހުށަހަޅާފައިވާ ވެއެވެ.

 އަދި ވަކި ޖިންސަކަށް ވީތީ ކުރާ އަނިޔާ އާއި ގެވެށި އަނިޔާގެ 54 މައްސަލަ ޑިސެމްބަރު މަހު އެ މިނިސްޓްރީއަށް ހުށަހަޅާފައިވާވެއެވެ. އެފަދަ މައްސަލަތަކުގެ ތެރެއިން އެންމެ ގިނައިން ހިމެނެނީ ޖިސްމާނީ އަނިޔާ ކުރުމުގެ މައްސަލަތައްކަން ފާހަގަކޮށް ޖެންޑާއިން ބުނީ އެ ބާވަތުގެ 26 މައްސަލަ ހުށަހަޅާފައިވާ ކަމަށެވެ.

ތަފާސްހިސާބުތައް ދައްކާގޮތުން ޑިސެމްބަރު މަހު ޢާއިލީ މައްސަލަތަކާ ގުޅުންހުރި 24 މައްސަލައެއް ހުށަހަޅާފައިވެއެވެ. އެފަދަ މައްސަލަތަކުގެ ތެރޭގައި ކުދިންނާއި ބައްދަލުކުރުމުގައި ޖެހޭ 11 މައްސަލަ، ކުދިން ބެލުމުގައި ޖެހޭ ހަތް މައްސަލަ، ހަޟާނާތުގެ ތިން މައްސަލަ އަދި ދަރިންގެ ޚަރަދު ދިނުމުގައި ޖެހޭ ތިން މައްސަލައެއް ހުށަހަޅާފައިވާކަން މިނިސްޓްރީން ފާހަގަކުރެއެވެ.

ޑިސެމްބަރު މަހުގެ ނިޔަލަށް ދަޢުލަތުގެ ބެލުމުގެ ދަށުގައި ތިބި ކުދިންގެ ޖުމުލަ ޢަދަދަކީ 187 ކަމަށް ޖެންޑާއިން ބުނެއެވެ. އަދި އެ މަހު ދައުލަތަށް އަލަށް ދެ ކުއްޖެއް ނަގާފައިވާއިރު، ހަތަރު ކުއްޖަކު އާއިލާއަށް ރީއިންޓަގްރޭޓް ކުރެވި، 18 އަހަރު ފުރުމާ ގުޅިގެން ދެ ކުއްޖަކަށް ވަޒީފާ ހޯދައި ދީފައިވާކަން އެ މިނިސްޓްރީން ފާހަގަކުރެއެވެ.