ސިޔާސީކަންކަމާއި ތިބާ ނުބެހުނަސްވެސް ސިޔާސީ ކަންކަން އައިސް ތިބާއާއި ބެހޭނެ

ދުނިޔޭގެ އެހެން ގައުމުތަކުގެ ސިޔާސީ ކަންކަމަށް ނުފޫޒުފޯރުވުމުގައި ޒުވާނުން، ހާއްސަކޮށް ކޮލެޖު އަދި ޔުނިވާސިޓީތަކުގެ ދަރިވަރުންގެ އަޑު ގަދައެވެ. ސްޓޫޑަންޓް ޔޫނިއަންތަކުން ނިކުމެ މުޒާހަރާތައް ކޮށްގެން ހޯދާފައިވާ ކުރިއެރުންތައްވެސް ގިނައެވެ. މިގޮތުން ދަރިވަރުންގެ ޕޮކްޓްމަނީ ފައިސާ އިތުރުކުރުމާއި ކެމްޕަސް އެކޮމޮޑޭޝަންގެ ކުލި ކުޑަ ކުރުމާއި ކޮލެޖް ގްރެޖުއޭޓުންގެ އެސިސްޓަންޓްށިޕް ޕްރޮގްރާމުގެ ދަށުން މަސައްކަތްކުރަންޖެހޭ ވަގުތު މަދުކުރުމާއި މިނޫނަސް ޑިގްރީ ފެންވަރަށް ނުވަތަ މާސްޓާސް އަދި ޕީއެޗްޑީ ހަދާ މީހުންގެ ދިރިއުޅުމަށް އަސަރުކުރާ ސިޔާސަތުތައް ބަދަލުކުރުމަށް އެގައުމުތަކުގެ ޒުވާނުން ޖެހިލުމެއް ނެތި ތެދުވެ މުޒާހަރާކުރުމަކީ އާއްމުކަމެކެވެ.

ނަމަވެސް ރާއްޖޭގެ ސިޔާސީ މާހައުލަށް ބަލާއިރު އެބައެއްގެ ދިރިއުޅުމަށް ސިޔާސަތުތަކުގެ ސަބަބުން ކުރާ ނޭދެވޭ އަސަރު ކުޑަ ކުރުމަށް ވާހަކަދައްކާ ޒުވާނުން ވަރަށް މަދެވެ. ޒުވާނަކު ސިޔާސީ ކަމަކުން ފެންނަނީ އާއްމުގޮތެއްގައި އޭނާ އަދާކުރާ ވަޒީފާ ގެއްލިދާނެ ކަމުގެ ބިރަށްޓަކައި ނިކުންނަ ނިކުތުމެއްގެ ތެރެއިންނެވެ. ނޫނެކޭ ތިޔަ ސިޔާސަތު ތިޔަ ގޮތަށް ހެދީމާ ތިމަންނާގެ އާމްދަނީ އަށާއި ދިރިއުޅުމަށް މިވެނި އެވެނި ބަދަލު އެބަ އާދެޔޭ ތިޔަ ކަމާއި ރުހެވޭކަށް ނެތޭ ބުނާ ޒުވާނަކު މަދުން ނޫނީ ނުފެނެއެވެ.

advertisement

ރާއްޖޭގެ ވޯޓުލާ އާބާދީގައި ގިނައީ ޒުވާނުންނެވެ. ކުރިއަށް އޮތްތަނުގައި އަމިއްލަ ދިރިއުޅުން ފަށައިގެން ކުދިން ބޮޑުކުރާނެ އާބާދީއަކީ އެއީ އެވެ. މިއަހަރު އޮންނަ ރިޔާސީ އިންތިހާބުގައި ވޯޓުލެވޭ ޒުވާނުންގެ އަދަދު އެއް ލައްކައަށް އަރާނެ ކަމަށް އިލެކްޝަންސް ކޮމިޝަނުން މައުލޫމާތުދެއެވެ. ވޯޓުލުމުގެ ހައްގު މިފަހަރު އަލަށް ލިބޭ 21000 ޒުވާނުން އެބަތިއްބެވެ. ވޯޓުލެވޭ ޖުމުލަ އާބާދީ އަކީ 280000 އެވެ.

2015 ވަނަ އަހަރު ޓްރާންސްޕޭރެންސީ މޯލްޑިވްސް އިން ޒުވާނުންނަށް ހާއްސަކޮށްގެން ހެދި ޔޫތް އޮޕަޗިއުނިޓީސް އެންޑް ކޮރަޕްޝަން އިން ދަ މޯލްޑިވްސް ރިޕޯޓުގައި ބަޔާންކޮށްފައިވާ ގޮތުން،

•    ކޮރަޕްޝަންގެ އަމަލުތައް ޒުވާނުން ރިޕޯޓުކުރަން ބޭނުން ނުވަނީ ރިޕޯޓުކުރަން ޖެހޭ ގޮތް ނޭނގޭތީއާއި ބާރުގަދަ ސިޔާސީ މީހުންނާއި ދެކޮޅަށް މައްސަލަ ހުށައަޅައިގެން ކުރި ނުލިބޭނެކަމަށް ގަބޫލުކުރާތީވެއެވެ.

•    އެންމެ ގިނަ ޒުވާނުން ފާހަނގަކުރި ބޮޑު މައްސަލައަކީ ވަޒީފާގެ ފުރުސަތުތަކެވެ. ގިނަ ޒުވާނުން ފާހަނގަކޮށްފައިވަނީ ރަށްރަށުގެ ވަޒީފާތައް ދިނުމުގައި ޕާޓީތަކުގެ ގާތް ތިމާގެ މީހުންނަށް އިސްކަންދޭކަމެވެ. މާލޭގައި ދިރިއުޅޭ ޒުވާނުންވެސް އެއްބަސްވާ ގޮތުގައި މަތީ މަގާމުތައް އަދި ވަޒީފާގެ ކުރިއެރުން ލިބެނީ ސިޔާސީ ފަރާތްތަކުގެ ގާތް މީހުންނަށެވެ.

•    ސިޔާސީ މީހުންގެ ފައިދާއަށް ޒުވާނުން އެކިގޮތްގޮތަށް ބޭނުންކުރާކަމަށް ޒުވާނުން ގަބޫލުކުރޭ

•    މުހިންމު ސިޔާސަތުތައް ނިންމާއިރު ޒުވާނުންގެ ހިޔާލާާއި ބައިވެރިވުން ނުހޯދާކަމަށް ޒުވާނުން ގަބޫލުކުރެއެވެ.

•    ދައުލަތުގެ ފައިސާ ހަރަދުކުރުމުގައި މާލެއާއި ރާއްޖެތެރެއާއި މެދު ބޮޑު ފަރަގެއް ވާކަމަށް ޒުވާނުން ގަބޫލުކުރެއެވެ.

•    ޕާޓީތަކުގެ ހަރަކާތްތަކުގައި އުޅޭ މީހުންނަށް ވަޒީފާއާއި އާމްދަނީ ހޯދުމުގެ ފުރުސަތުތައް ނުހަމަކޮށް ދޭކަމަށް ގިނަ ޒުވާނުން ގަބޫލުކުރެއެވެ.

•    ސިޔާސީ ފަރާތްތަކުން ޒުވާނުން ބޭނުންކުރަނީ ހަމައެކަނި މަގުމަތީގެ ހަރަކާތްތަކުގައި ބޯގިނަ ކުރުމަށް ކަމަށް ވެސް މި ސާވޭގެ ބައިވެރިން ފާހަނގަކޮށްފައިވެއެވެ. އަދި މިފަދަ ހަރަކާތްތަކުގައި އަނިޔާލިބި ޖަލަށް ގޮސް ކުށްވެރިންގެ ގޮތުގައި އެ ޒުވާނުން ވާ ހިނދު ސިޔާސީ ފަރާތްތަކުން ތިބެނީ ގޭގައި ކަމަށް ވެސް ފާހަނގަކޮށްފައިވޭ.

•    ޒުވާނުންނަށް ތައުލީމުގެ ފުރުސަތުތައް ގިނަ ވަމުން އައި ނަމަވެސް ވަޒީފާގެ ފުރުސަތު ކުޑަ ކަމާއި، ސިއްހީ ފަރުވާގެ ނިޒާމު ރަނގަޅުނޫން ކަން ވެސް ޒުވާނުން ފާހަގނަކޮށްފައިވެއެވެ.

•    މާލޭ ސަރަހައްދުގައި ފްލެޓު އެޅުމާއި ބެހުން އޮންނަނީ ސިޔާސީ ކަމަކަށް ވެފައި ކަމަށް ވެސް ޒުވާނުން ގަބޫލުކުރާ ކަމަށް މި ރިޕޯޓުގައި ވެއެވެ.

މިއީ ރާއްޖޭގެ ހުރިހާ ޒުވާނުންގެ ވިންދުވެސްމެއެވެ. ނަމަވެސް ޒުވާނުންގެ އަޑު މާ މަޑީ ކީއްވެބާއެވެ؟ ޒުވާނުންގެ ދިރިއުޅުމަށް ބޯމަތިވެފައިވާ އެންމެ ބޮޑެތި ސީރިއަސް މައްސަލަތައް ކަމަށްވާ ވަޒީފާ އާއި ބޯހިޔާވަހިކަމުގެ މައްސަލަ އާއި ގުޅުން ހުރި މާލީ އަދި އިޖުތިމާއީ ސިޔާސަތުތައް ހަދާ ސިޔާސީ ފަރާތްތަކަށް ގޮވާލާ އެޒުވާނުންގެ އަޑު އެހުމަށް މަޖުބޫރުނުކުރަނީ ކީއްވެހެއްޔެވެ؟ ކަށަވަރުވާ އެއް ކަމަކީ ޒުވާނުންގެ ވޯޓާއި ނުލައި އެއްވެސް ސިޔާސީ މީހަކަށް ވެރިކަމަށް ނާދެވޭނެ ކަމެވެ. ޒުވާނުންނާއި ގުޅޭ ސިޔާސަތުތައް ހަދާނެ ވާހަކަ ބާރަށް ދައްކަނީ އެހެންވީމައެވެ. ސުވާލަކީ ޑިމޮކްރަސީގެ ހަޔާތުގައި ޒުވާނުންގެ ދިރިއުޅުމަށް ހެޔޮ ބަދަލު އަންނާނެ ފަދައިން ހެދި ސިޔާސަތުތަކުން ނަތީޖާ ފެނޭބާއެވެ؟ އެފަދަ ބަދަލު ނުފެންނަ ނަމަ އެ ބަދަލު އިހުސާސުކުރެވެންދެން، އަމިއްލަ ދިރިއުޅުމުން އެބަދަލުތައް ފެންނަން ދެން އެކަމަށް ވަކާލާތުކުރުމުގައި ޒުވާނުން ދެމި ނުތިބޭނަމަ ދެން ވެސް ފެންނާނީ ނަތީޖާ ނުނެރެވޭ ވާހަކަތަކާއި ސިޔާސަތުތަކެވެ. މިކަން ބަދަލުކުރެވޭނީ ޒުވާނުން އަމިއްލަ ބުއްދި އިސްކޮށް، އަމިއްލަ ދިރިއުޅުމާމެދު ވިސްނައި ތިމާގެ ހާލަތާއި، ސިޔާސީ މީހާ ހަދާ ސިޔާސަތާއި އޮތް ގުޅުން ދަނެގެންނެވެ. މިބާރު އޮތީ ޒުވާނުންގެ އަތްމަތީގައެވެ. ސިޔާސީ ކަންކަމާއި ބެހުމަކީ ވަކި ބަޔަކު ކުރަންޖެހޭ ކަމެއް ކަމަށް ދެކިގެން ވާކަށް ނެތެވެ. ސަބަބަކީ ސިޔާސަތުތަކުން އަސަރުކުރަނީ ވަކި ބަޔަކަށް ނޫންކަމެކެވެ. ސިޔާސީ ކަންކަމާއި ނުބެހި ހުރުމަކީ ޒިންމާދާރުކަން ކުޑަ ކަމެކެވެ. ތުބާ ސިޔާސަތާއި ނުބެހުނަސް، ސިޔާސަތު އައިސް ތިބާއާއި އަރައި ހަމަކުރާނެއެވެ. އެންމެ ފަހުން ޖީއެސްޓީ ބޮޑުކުރަން ކަނޑައެޅި ސިޔާސަތު މީގެ ހެއްކަކަށް ފުދެއެވެ.