ރިޕޯޓް: ޔުނިފޯމު ގަވާއިދުގެ ރޫހާއި ހިލާފުނުވާނެ މިންވަރަކަށް ބޯ ދިގުކުރަން އެދޭ ކުދިން ވަރަށް ގިނަ!

ބައެއް ކުދިން މިކަމަށް އެދި ހަދީސް ހިފައިގެން ސްކޫލު އޮފީހަށް ވެސް ދޭ!

އަހުމަދިއްޔާ ސްކޫލުގައި ކިޔެވި އަންހެނަކު ކިޔައި ދިން ގޮތުގައި އޭނާ ކުރުކޮށް ބޯ ކޮށުމުން އެ ސްކޫލުގެ ޕްރިންސިޕަލް އޭނާ ސްކޫލުން ސަސްޕެންޑް ކުރިއެވެ. އެއީ މީގެ 20 ވަރަކަށް އަހަރު ކުރިއެވެ. ޒަމާނުއްސުރެންވެސް ރާއްޖޭގެ ސްކޫލުތަކުން ގެންގުޅެނީ މި އުސޫލެވެ. އަންހެން ކުއްޖެއް ނަމަ ބޯ ހުންނަން ޖެހޭނީ އެއްސޭ ދިގު މިނުގައެވެ. ފިރިހެން ކުއްޖެއް ނަމަ ހުންނަން ޖެހޭނީ ތުނިކޮށް ކޮށާފައެވެ.

ރާއްޖޭގައި ހިންގާ ހުރިހާ ސްކޫލެއް ވެސް ހިންގަނީ އެޑިއުކޭޝަން މިނިސްޓްރީ އިން ރެގިއުލޭޓް ކުރެވޭނެ އުސޫލެއްގެ ދަށުންނެވެ. ފިރިހެން ދަރިވަރުންގެ ބޮލުގެ އިސްތަށީގެ ކުރުދިގު މިނަކީ ސްކޫލު ޔުނިފޯމު ގަވާއިދުން ކަނޑައަޅާ ކަމެކެވެ. ސަރުކާރު ސްކޫލުތަކުން އަމަލުކުރަމުން އަންނަ ސްކޫލު ޔުނިފޯމު ގަވާއިދަށް އަމަލުކުރަން ޖެހެނީ ހަމައެކަނި ސަރުކާރު ސްކޫލުތަކަށެވެ. ޕްރައިވެޓް ސްކޫލުތަކުން އަމަލުކުރަނީ އެސްކޫލުތަކުގެ އަމިއްލަ ގަވާއިދުތަކަކަށެވެ.
ސަރުކާރު ސްކޫލުތަކުގެ ދަރިވަރުން ތުނިކޮށް ބޯ ނުކޮށާނަމަ އެކުދިންގެ އަދަބު އަހުލާގު ދަށްވާ ކަމަށް އެޑިއުކޭޝަން މިނިސްޓްރީ އިން ގަބޫލު ކުރާ އިރު، ޕްރައިވެޓް ސްކޫލުތަކުގެ ދަރިވަރުންގެ އަދަބު އަހުލާގާއި އެކުދިންގެ ބޮލުގެ އިސްތަށި ހުންނަ ދިގު ކުރު މިނާއި ގުޅުމެއް ނޯންނަ ކަމަށް މިނިސްޓްރީ އިން ގަބޫލުކުރަނީ ތޯއެވެ؟ ނުވަތަ އެއީ މުއްސަނދިންގެ ކުދިންނަށް އޮންނަ ހާއްސަ އިމްތިޔާޒެއް ބާއެވެ؟
ސްކޫލު ކުދިން ވަކި ޔުނިފޯމެއް ލުމާއި، ޑީސެންޓް ކޮށް ބޮލުގައި ފުނާއަޅައި ރީތިވެގެން ތިބުމަކީ މުހިންމު ކަމެކެވެ. ހައިޖީން މެއިންޓެއިން ކުރުމަކީ މުހިންމު ކަމެކެވެ. މިކަންކަން ހާސިލުކުރެވޭނެ ގޮތަށް، މާދިގު ނޫން މިންވަރަކަށް، އަދި ލޯމައްޗަށް އިސްތަށި ނުވެއްޓޭ މިންވަރަށް ބޮލުގެ އިސްތަށި ދިގު ކުރުމަކީ ދުނިޔޭގެ އެހެން ސްކޫލުތަކުން މަނާ ކުރާ ކަމެއް ނޫނެވެ.

advertisement

ބައެއް ދަރިވަރުންނަށް ތިމާގެ ސިފަ އާއި ހުންނަ ގޮތް އެއީ ވަރަށް ބޮޑަށް މުހިންމު ކަމެކެވެ. މިދަފަ ކުދިންނަށް ތިމަންނާގެ ސިފަ ރީތީ ކޮންމެވެސް މިންވަރަކަށް ބޯ ދިގުކުރުމުން ކަމަށް ފެންނަ ނަމަ އެކުދިން މިކަމަށް އެދޭނެއެވެ. ސްކޫލަކީ ކުއްޖާގެ އަމިއްލަ ނަފްސަށް އޮންނަ އިތުބާރާއި ލޯބި ގެއްލުވާލާ ތަނެއް ކަމަށް ކުއްޖާއަށް ގަބޫލުކުރެވި އެތަން މަތިން ހިތް ކެނޑި ސްކޫލަށް ދިޔުމަށް ދެކޮޅު ހަދާ ކުދިން މިހާރު ރަށްރަށުގައި އަދި މާލޭގައިވެސް ގިނަވަމުންދާކަން ބެލެނިވެރިން ފާހަނގަކުރެއެވެ. “އަޅުގަނޑުގެ ދަރިފުޅުގެ ބޯ ހުރީ ލޮކްޑައުންތެރޭގައި ދިގުކޮށް. އެހާ ދިގެއް ނޫން. ހުރީ ހަމަ ޑީސެންޓް ވަރަކަށް، ސްކޫލު ހުޅުވުމުން ބޯ ކޮށަން ޖެހުމުން އޭނައަށް އިހުސާސް ކުރެވުނު ބޯ ކޮށުމަކީ ތައުލީމު އުގެނުމަށް ކޮންމެހެން ކުރަންޖެހޭ ކަމެއް ނޫން ކަން. އޭނާގެ ބޯ ކޮށުމުން އަމިއްލަ ނަފްސަށް އޮތް އިތުބާރު ގެއްލި އޭނާ އަށް އޭނާގެ ސިފަ ހަޑިވި. އެހިސާބުން ސްކޫލަށް ދާން އޭނަ ފޫހި ވާން ފެށި” މިކަމާއި މެދު މި ނޫހަށް މައުލޫމާތު ދިން ބެލެނިވެރިޔަކު ކިޔައިދިނެވެ.

ފިރިހެންކުދިން ބޯ ތުނިކޮށް ކޮށަންޖެހޭ ކަމަށް ގަބޫލުކުރާ މީހުން ބުނާ ގޮތުގައި ކުދިން ޑިސިޕްލިން ކުރުމަށް އެއީ މުހިންމު ކަމެކެވެ. ނަމަވެސް މިއީ ތާކުންތާކު ނުޖެހޭ ބޯދާ ގަބޫލުކުރުމެއް ކަމަށް ދެކޭ މީހުން ގިނަކަން މިކަމާއި މެދު ސޯޝަލްމީޑިއާގައި ހިޔާލުފާޅުކުރާ މީހުންގެ ވާހަކަތަކުން އެނގެއެވެ. އޮފީސްތަކުގެ މަތީ މަގާމުތަކުގައި ވެސް ޑީސަންޓް މިންވަރަކަށް ބޮލުގެ އިސްތަށި ދިގުކޮށްފައި ތިބޭ މީހުން ގިނައެވެ. އަހުލާގު ރަނގަޅު ކިޔެވުމަށް މޮޅެތި ދަރިވަރުން ޕްރައިވެޓް ސްކޫލުތަކުގައި ވެސް ގިނައެވެ. އެކުދިންގެ ބޯ ވެސް ހުންނަނީ ސަރުކާރު ސްކޫލުތަކުން ބޭނުންވާ މިންވަރަށް ތުނިކޮށެއް ނޫނެވެ.

ޔުނިފޯމު ޑިސިޕްލިންގެ ރޫހާ ހިލާފު ނުވާގޮތަށް ބޮލުގެ އިސްތަށި ދިގު ކުރަން އެދޭ ކުދިން ސްކޫލުތަކުގައި މިހާރު ވަރަށް ގިނައެވެ. ދެކުނުގެ ރަށެއްގެ ޕްރިންސިޕަލަކު ބުނި ގޮތުގައި އެ ސްކޫލުގެ ގިނަ ފިރިހެން ކުދިން މިކަމަށް އެދި ވާހަކަދައްކަން ޕްރިންސިޕަލްގެ އޮފީހަށް ވެސް އާދެއެވެ. ބައެއް ކުދިން އަންނަނީ މިކަމަށް ބާރު ދޭ ހަދީސްތައް ވެސް ހިފައިގެންނެވެ. ނަމަވެސް އެޑިއުކޭޝަން މިނިސްޓްރީ އިން ހަދާފައިވާ ޔުނިފޯމު ގައިޑްލައިންގައި ފިރިހެން ކުދިން ބޯ ތުނި ވާން ޖެހޭނެ ކަމަށް އޮތުމުގެ ސަބަބުން މިކަމާއި މެދު ކުރެވޭނެ ކަމެއް ސްކޫލަށް ނެތް ކަމަށް އޭނާ ބުންޏެވެ. ޔުނިފޯމު ކޯޑުގެ ރޫހަކީ ސާފުތާހިރުކަމާއި އަހުލާގީ މިންގަނޑަށް ބަލައިގެން ވަކި ކަހަލަ ހެދުމެއް އެޅުމެވެ. ފިރިހެން ކުދިންގެ ބޮލުގެ އިސްތަށި ލޮލަށް ނޭޅޭނެހެން އަދި ގިރުވާނާއި ކަންފަތާއި ހަމައަށް ނާރާނެ މިންވަރަށް ދިގު ވުމަކީ މި ރޫހާއި ހިލާފު ކަމެއްގެ ގޮތުގައި ދެކިލައްވަންތޯއެވެ؟ ނުވަތަ މުޖުތަމައުގައި އަހުލާގު ފެންވަރު ދަށް މީހުން ގިނަވަނީ ބޮލުގެ އިސްތަށި ދިގުކުރާތީ ތޯއެވެ؟

ކުޑަކުދިންގެ ހައްގުތަކާއި ބެހޭ ގާނޫނުގައި ބަޔާކޮށްފައިވަނީ ކުޑަކުދިންގެ މައްސަލަތަކުގައި އިސް ކުރަން ޖެހޭނީ ކުއްޖާގެ މަސްލަހަތު ކަމަށެވެ. ވީއިރު، ކުއްޖާގެ މަސްލަހަތަށް އެންމެ ރަނގަޅު ގޮތަކީ ބޮލުގެ އިސްތަށީގެ ދިގު މިނަށް ބަލައި ކުއްޖާ އަށް ސްކޫލަށް އައުން މަނާ ކުރުންތޯއެވެ؟ ނުވަތަ އޭނާގެ އަމިއްލަ ނަފްސަށް އޮންނަ އިތުބާރު ދަމަހައްޓައި، އޭނާގެ ސިފަ އާއި މެދު މަޖުބޫރުން ގޮތް ނުނިންމައި ތައުލީމު އުގެނުމުގެ ފުރުސަތު ދިނުންތޯއެވެ؟