“ޑަސްޓް” ނުވަތަ ހިރަފުހަށް އެލާޖިކްވޭތަ؟

ޑަސްޓް އެލާޖީ ނުވަތަ އެލާޖިކް ރައިނައިޓިސް ނުވަތަ “ހޭ ފީވާ” އަކީ އުޅޭ މާހައުލުން ހިރަފުހަށް ހުށަހެޅުމުން ދިމާވާ އެލާޖީގެ ބާވަތެކެވެ.

ޑަސްޓް އެލާޖީ ހުންނަ މީހަކު ނޭވާލާއިރު މި ޕާޓިކަލްތަށް ހަށިގަނޑު ތެރެއަށް ވަނުމުން އެ މީހުންގެ ދިފާއީ ނިޒާމުން އޮޅުމަކުން އެއީ ނުރައްކަލެއްގެ ގޮތުގައި ދެނެގަނެ، ހިސްޓަމިން އާއި އެހެނިހެން ކެމިކަލްތައް ދޫކޮށްގެން ރިއެކްޓްކޮށް، ބަލިވުމުގެ އަލާމާތްތައް  އުފައްދަ އެވެ.

advertisement

އޭގެ އަލާމާތްތަކުގެ ތެރޭގައި ހިމެނެނީ:

• ކިނބިހި އެޅުން
• އަރިދަފުން އައުން
• ލޮލާއި ނޭފަތާއި ކަރު ހިރުވުން
• ކެއްސުން
• ބޮލުގައި ރިއްސުން

ސީރިއަސް ހާލަތްތަކުގައި ޑަސްޓް އެލާޖީގެ ސަބަބުން ނޭވާލާން އުނދަގޫވެ، މެޔަށް ބާރުކޮށް ނޭވާ ހިއްލަންވެސް ފަށާފާނެ އެވެ. މިއީ އަސްތްމާގެވެސް އަލާމާތްތަކެކެވެ.

ޑަސްޓް އެލާޖީ ޑައިގްނޯސްކުރުމަށް އާންމުގޮތެއްގައި ބަލިމީހާގެ އަލާމާތްތަކާއި މެޑިކަލް ހިސްޓްރީގެ އިތުރުން ރިއެކްޝަން އުފެދޭ ވަކި އެލާޖީންތައް ދެނެގަތުމަށް ހަން ނުވަތަ ލޭގެ ޓެސްޓުތަކަށް ބަލައިގެން ކުރާ ކަމެކެވެ.

ޑަސްޓް އެލާޖީއަށް ފަރުވާ ދިނުމުގައި ހިމެނެނީ ހިރަފުހުން ދުރުހެލިވުމާއި، އެއާ ފިލްޓަރާއި އެއާ ޕިއުރިފަޔަރ ބޭނުންކުރުމާއި، ބައެއް ހާލަތްތަކުގައި އެންޓިހިސްޓަމައިންސް، ޑިކޮންޖެސްޓެންޓްސް ފަދަ ބޭސްތައް ބޭނުންކުރުމެވެ.

އަދި ހިރަފުސް ގިނަ ތަނަކުން ހިނގާނަމަ މާސްއެޅުމަކީވެސް ކުރެވިދާނެ ކަމެކެވެ.

ސީރިއަސް ހާލަތްތަކުގައި އެލާޖީ ޝޮޓްސް (އިމިއުނޯތެރަޕީ) ވެސް ރިކޮމެންޑް ކުރެވިދާނެ އެވެ.

ހިރަފުހަށް އެލާޖިކްވުމަކީ އާންމުގޮތެއްގައި ސީރިއަސް މައްސަލައެއްނޫނެވެ. ނަމަވެސް މިކަން ތަހައްމަލް ކުރާ މީހާއަށް އުނދަގޫވާނެ ކަމެކެވެ. ސިއްހީ ހިދުމަތްދޭ ފަރާތަކާ ގުޅިގެން މި މައްސަލައަށް ހައްލު ހޯދުމަކީ މުހިންމު ކަމެކެވެ.