އަމިއްލަ ހިޔާލު: ދުވަހަކުވެސް ގަޑި ނުޖެހުމާއި ސަލާމެއް ނުބުނުން — މާ މޮޅު ކަމެއް ނޫން

އަންހެނުންގެ ދުވަހާއި މަސައްކަތްތެރިންގެ ދުވަހާއި އެކިއެކި އޮފީސްތަކުގެ އަހަރީ ދުވަސްތައް ފާހަނގަ ކުރާއިރު ވަރަށް ގިނައިން ފެންނަ މަންޒަރެކެވެ. އޮފީހަށް އެއަހަރަކު އެއްވެސް ދުވަހަކު ގަޑި ނުޖެހި އަދި ސަލާމެއް ނުބުނެ ބަރާބަރަށް ހާޒިރުވީ މުވައްޒަފު ހޮވައި އިނާމާއި ހަނދާނީ ފިލާ ދޭމަންޒަރެވެ. ހަބަރުތަކުގެ ސުރުހީތަކުން ވެސް މިފަދަ މުވައްޒަފުންގެ ވާހަކަ ފެނެއެވެ. މިވެނި ކުންފުންޏެއްގެ ނަމޫނާ މުވައްޒަފަކަށް މިވެނި އެވެނި މީހަކު ހޮވުނު ވާހަކައެވެ.

މަސައްކަތުގެ އަހުލާގާއި މަސައްކަތާއި އުފެއްދުންތެރިކަމުގައި ހައްދެއް އޮންނަން ޖެހެއެވެ. އެއްވެސް އިންސާނަކީ ހަފްތާ ބަންދު ނޫން ދުވަސްތަކުގައި ނޫނީ ބަލި ނުވާނެ މީހެއް ނޫނެވެ. ބަލިތަކަކީ ހަފްތާ ބަންދާއި ރަސްމީ އެހެން ބަންދު ދުވަސްތައް ބަލާފައި ޖެހޭ އެއްޗެއް ނޫނެވެ. ނުވަތަ އާއިލާ މީހުން, ދަރިންނާއި އަނބި/ފިރިން ނުވަތަ މައިންބަފައިންނަށް އަދާކޮށްދޭން ޖެހޭ ޒިންމާ ތަކަކީ ހަމައެކަނި އޮފީސް ބަންދު ދުވަސްތަކުގައި ބޯމަތިވާ ކަންކަމެއް ނޫނެވެ.

advertisement

މިއީ އިންސާނީ ހަމަބުއްދިން ވިސްނާއިރު މިކަން ހިނގާނެ ގޮތެއް ނޫނެވެ. ވަޒީފާއާއި ބެހޭ ގާނޫނުން މަސައްކަތްތެރިންނަށް އާއިލީ ޒިންމާ ޗުއްޓީ އާއި, ބަލިވެގެން ސަލާމް ބުނުން ފަދަ ހައްގުތައް ލިޔެފައި ފާސްކޮށްފައި އޮންނަނީ މިހަމައަށް ބަލައިގެންނެވެ. މަސައްކަތްތެރިންނަކީ އިންސާނުން ކަމަށް ދެކިގެންނެވެ.

ފައިދާ ވަނީ ކޮންބަޔަކަށް?

ގަޑި ޖެހުމުން އެކަމުގެ އަދަބެއްގެ ގޮތުން މުސާރައިން ގަޑީ ލާރި ކަނޑައެވެ. އަދި އެޕްރައިޒަލް އިންވެސް މާކްސް ކަނޑައެވެ. މިދެވެނީ އެއް ކުށަކަށް ދެ އަދަބެވެ. އެއްކުށަކަށް ދެ އަދަބު ދިނުމަކީ ގާނޫނު އަސާސީ އާއިވެސް ހިލާފު ކަމެކެވެ. ނަމަވެސް މިކަން މިގޮތަށް ކުރާ އޮފީސްތައް ގިނައެވެ. ނަތީޖާއަކަށް ވަނީ މަސައްކަތްތެރިއާ އަށް ބޭކާރު ޕްރެޝަރު ކުރިމަތިވުމެވެ.

ކިތަންމެ ބޮޑު ކަމެއް ދިމާވިއަސްވެސް ގަޑި އަށް އޮފީހަށް ދެވޭތޯ ބެލުމެވެ. އެފަދަ ހާލަތްތަކުގައި ގަޑިއަށް އޮފީހަށް ވަދެލާފައި އެކުރަން އޮތް ކަމެއް ކުރުމަށްޓަކައި އޮފީހުން ނިކުމެގެން ދާ މުވައްޒަފުން ގިނައެވެ. މިކަމުގެ ސަބަބުން އެއްވެސް ބަޔަކަށް ވާ ފައިދާއެއް ނެތެވެ. އޮފީހަށް ވާ ވަކި މޮޅެއް ނެތެވެ. މަސައްކަތްތެރިއާ އަށް ވާ މޮޅެއް ނެތެވެ. ވީމާ އެއްވެސް ފަރާތަކަށް ފައިދާއެއް ނެތް މިފަދަ ބޭކާރު އުސޫލުތަކަށް މަސައްކަތްތެރިން ހާނުވަން މަސައްކަތް ކުރުމަކީ ބޭކާރު ކަމެއް ނޫންހެއްޔެވެ?

ދުވަހަކުވެސް ގަޑި ނުޖެހުމާއި ސަލާން ނުބުނުމަކީ ފާހަނގަކުރުން މުހިންމު ކަންކަން ކަމުގައި ބެލެވޭކަށް ނެތެވެ. ސަބަބަކީ އެގޮތަށް މަސައްކަތަށް ބަރާބަރަށް ކޮންމެ ދުވަހަކު ދާ ނަމަ އެމީހަކު ޔަގީނުންވެސް އަދާނުކުރާ އެހެން މުހިންމު ޒިންމާތަކެއް ވާނެއެވެ. އަދާ ކުރާ ވަޒީފާ ނޫން އެހެން ޒިންމާ އެއް ނެތް މީހުން ލޭބާ ފޯސްތެރޭގައި ވަރަށް މަދުވާނެއެވެ. ވީމާ މި ފާހަނގަކޮށް އިނާމު ދެވެނީ އެހާ ދުޅަހެޔޮ އާދައަކަށް ބާރުދީއެއް ނޫނެވެ.

ސަރުކާރު އޮފީހެއް ކުނިކަހާ މުވައްޒަފުގެ ވާހަކަ

އަހަރެންގެ އަމިއްލަ ތަޖުރިބާ ހިއްސާކޮށްލާނަމެވެ. ގާތް މީހެއްގެ މަންމަ އެކެވެ. ވަޒީފާ އަދާ ކުރީ ސަރުކާރު އޮފީހެއްގެ ކުނިކަހާ މީހެއްގެގޮތުގައެވެ. އޭނާގެ އުމުރުން 40 އަހަރުން ފެށިގެން 60 އަހަރާއި ހަމައަށް ހޭދަކުރި އެއްވެސް ދުވަހަކު އޮފީހަށް ގަޑި ނުޖެހެއެވެ. ގަޑި ޖެހިއްޖެ ނަމަ އޭނާ ސަލާމް ބުނަނީ އެވެ. އެހެން ކަމުން އޭނާގެ ރެކޯޑުގައި ގަޑި ޖެހުނު އެންމެ ދުވަހެއް ވެސް ނެތެވެ.

މުސްކުޅިކޮށް ރިޓަޔާ ކުރި ދުވަހު އެކަމުގެ އިނާމަކަށް ހަނދާނީ ފިލައެއް ދިނެވެ. ކިތަންމެ ބަލިވިއަސް އޭނާ އޮފީހަށް ދިޔައެވެ. ބަލިވާ ދުވަސްދުވަހު އޮފީހަށް ގޮސްލާފައި ގެއަށް އަންނަންވިޔަސް ވެހެވެ. ފޯކަސް އަކީ ހާޒިރީ ރީތި ކުރުމެވެ. އަމިއްލަ ނަފްސަށާއި ޖިސްމަށް އަރާމު ދިނުމަކީ އޭނާގެ ޒިންމާއެކެވެ. އެޒިންމާ އަދާކުރުމެއް ނެތެވެ. މިއީ ހިތްވަރު ދޭންޖެހޭ ކަމެއް ނޫނެވެ.

މިފަދައިން ގިނަ ފަހަރަށް އަމަލުކުރަނީ އެންމެ ނިކަމެތި މަސައްކަތްތެރިންނެވެ. ވަޒީފާ ގެއްލިދާނެ ފަދަ އެއްވެސް ސަބަބެއް ބާއްވަން ބޭނުން ނުވާ މީހުންނެވެ. މިއީ އެފަދަ މަސައްކަތްތެރިންގެ ނަފްސާނީ އަދި ޖިސްމާނީ ދުޅަހެޔޮކަމަށް ދެވޭ ގެއްލުމެކެވެ. މުޅި އަހަރުތެރޭގައި މިފަދަ ބޮޑު ހާސްކަމެއް ބޮލުގައި އަޅައިގެން ކޮންމެހެން ވެސް ގަޑި އަށް އޮފީހަށް ދާންޖެހޭކަމުގެ ޕްރެޝަރަކީ ކުޑަ ޕްރެޝަރެއް ނޫނެވެ. މިކަން ސެލެބްރޓް ކުރުން ހުއްޓާލަން ޖެހެނީ މިހެންވެއެވެ. ތިމާގެ ހަށިގަނޑަށް އަރާމު ދިނުން ޕްރޮމޯޓުކުރުމަށެވެ. މަސައްކަތްތެރިޔާގެ އުފެއްދުންތެރިކަމުގެ ފެންވަރު ރަނގަޅުވާނީވެސް އޭރުން ނޫންހެއްޔެވެ? ހަނދާނީ ފިލާއަކުން އޭނާ ކުރާނީ ކޮންކަމެއް ހެއްޔެވެ? އެފަދަ ހަނދާނީ ފިލާތަކަކީ ބުރަކަމާއި ނާއިންސާފު ސިޔާސަތެއްގެ ހަދާން އާވާން ޖެހޭ ފިލާތަކެކެވެ. ތިމާގެ އަމިއްލަ އާއިލީ ޒިންމާތައް ބޮލާލާ ޖެހުމަށްފަހު އެންމެ ސަލާމެއް ވެސް ނުބުނުމަކީ އެ ޒިންމާތަކުގެ ހައްގުވެރިންނަށް ކުރެވޭ ބޭއިންސާފެކެވެ.