ތާރީހުގެ ތެރެއިން: އަންހެން ކުދިން އަލަށް ލިބާސްލައްވައި ބޮޑު އަންހެނަކަށް ވީކަން އިއުލާންކުރުން

ކުރީޒަމާނުގައި, ކުދިންނަށް ވެސް އަދި ބޮޑެތި މީހުންނަށް ވެސް ހެދުން ހޯދުމަކީ އުނދަގޫ އަދި ހަރަދު ބޮޑު ކަމެކެވެ. އެޒަމާނުގައި ފިރިހެން އަދި އަންހެން ކުދިން ވެސް މުންޑުފިޔަވާ އިތުރު ހެދުމެއް ގަމީހެއް ނުލައްވައެވެ. އަންހެންކުދިން ގާތްގަނޑަކަށް 7 އަހަރާއި ހަމައިން މުންޑު ދޫކޮށްލާ ކަނޑިކި އަންނަން ފަށައެވެ. އެ އުމުރުގައި ލާ ހަމައެކަނި “ހެދުމަކީ” ކަނޑިކި އެކަންޏެވެ. ފޮތިކޮޅަކަށް ގައިގައި ދެން އޮންނަނީ ބޮލުގައި އައްސާފައި އޮންނަ ރުމާ ފޮތިކޮޅެވެ.

ކަނޑިކި އަންނަނީ އުނަގަނޑުގައި ފަށްޓަރު އަޅައިގެންނެވެ. ފަށްޓަރުގެ ފަށްގިނަކުރެވޭނީ އެކުއްޖެއްގެ އާއިލީ ކެރިފޯރުންތެރިކަން ހުރި މިންވަރަކުންނެވެ. ފަށްގިނަވުމަކީ އާއިލާގެ ފުދުންތެރިކަން ދައްކުވައިދޭ ކަމެކެވެ. ޒީނަތްތެރިކުރުމަށް ކަރުގައި ރަންފޮތިބައި ނުވަތަ މިބާވަތުގެ އެހެން އެއްޗެއް އެޅުމާ ކަންފަތުގައި ރަން، ނުވަތަ މުދިލުމަކީ ފުދުންތެރިންގެ ދަރިންނަށް އެމީހުން ކޮށްދީ އުޅުނު ކަންކަމެވެ.

advertisement

އަލަށް ލިބާސް ލެއްވުން

އޭގެ ފަހުން ދެން ލައްވަނީ ލިބާހެވެ. އަލަށް ލިބާސް ލެއްވުމުގެ އުމުރު، ކުދިންގެ ސިއްހަތާ ހެދިބޮޑުވުމާ ގުޅުން ހުރެއެވެ. އެކުއްޖަކު އެހުރީ ލިބާހަށް އައިބުވެފައޭ ބުނާ ސިފަތަކެއް ކުއްޖާގެ ކިބައިން ފާޅުވާން ފެށުމުން ލިބާސް ލައްވަންވީއެވެ. މިގޮތުން އެންމެ އަވަހަށް ލިބާސްލައްވާ ކުދިންވެސް އުމުރުން ނުވަވަރަކަށް އަހަރުވާނެކަމަށް އެދުވަސްވަރުގެ މީހުން ލަފާކުރެއެވެ. އުމުރުން ސޯޅަ ސަތާރަ އަހަރުގައި ލިބާސް ލައްވާ ކުދިންވެސް ތިބެއެވެ. އެދުވަސްވަރުގެ ބަހުރުވައިން ނަމަ “ބޮޑުއަންހެނަކަށް” ވުމުގެ ކުރިން ލިބާސް ނުލެވިއްޖެނަމަ، އެއީ މައިންބަފައިންނަށް މަލާމާތް ލިބޭފަދަ ހުތުރު ކަމެކެވެ.

ލިބާސް ލެއްވުމުގެ ކުރިން ބޯވަޑުވަންލުން އޮވެއެވެ. ބޯވަޑުވަންލުމަކީ ބޯނުބާލާގޮތަށް ނިންމައި ބޮލުގެ އިސްތަށިގަނޑު ދިގުކުރަން ފެށުމެވެ. ބޯވަޑުވަންލުމުގެ ކުރިން އަންހެންކުދިންވެސް ތިބެނީ ބޯބާލާފައެވެ. ބޯވަޑުވަން ލަނީ އުމުރުން އަށެއް ނުވައެއް އަހަރުގެތެރޭގައެވެ.

އަންހެން ކުއްޖާ ބޮޑުވަމުން އަންނަ އިރު ދެމަފިރިންގެ ދެމެދުގައި ދެކެވޭ އެންމެ ފުއްކުދި ސިއްރުވާހަކައަކީ ތިމާމެންގެ ދަރިފުޅު އަލަށް ލިބާސް ލެއްވުމާބެހޭ އެކި ވާހަކައެވެ. ތަނަވަސްކަން ކުޑަ އާއިލާތަކުގެ މީހުން ލިބޭ ލާރިފޮތި އެކިދުވަހުން އެއްކުރަމުން ގިނަކުރި ފައިސާކޮޅު މާލެ ފޮނުވައިގެން ލިބާސްކަނޑާނެ ފޮއްޗާ އަންނާނެ ކަނޑިކި ރަށަށް ގެނުވައެވެ.

ލިބާސް ކެނޑުން

ލިބާސް، ނުވަތަ ލިބާސް ކަނޑާނެފޮތި ލިބުމުން އެކަންކުރުވާނެ އެދުރުބޭކަލަކާ ބައްދަލުކޮށް ހެޔޮ އިރުވަރުގައި ލިބާސް ކަނޑައެވެ. ލިބާސްފަހާ މީހާ ލިބާހުގެ ބަދަނުގެ ފުޅައުމިން ދެއްކުމުން އެދުރުބޭ އެހިސާބުން ކުޑަތަންކޮޅެއް ވީދާލުމުން ނުވަތަ ވަޅިޖައްސާލުމުން އެ، ލިބާސްކެނޑުނީއެވެ. އެދުރުބޭ ލިބާސް ކަނޑުއްވާނީ ކިޔަވާލާ ފުމެލުމަށްފަހުގައެވެ. އަލަށް ލިބާސްލައްވާ ކުއްޖަކަށް އެންމެ ފުރަތަމަ މަދުވެގެން ތިންލިބާސް ފަހައެވެ.

ލިބާސް ލެއްވުމުގެ ރަސްމިއްޔާތު

މިރަސްމިއްޔާތުގައި އެދުރުބޭކަލަކު ޞަލަވާތް ފާތިހާ ކިޔެވުމަށްފަހު ތިންލިބާހަށް ދުން ބުރުވާލާނެއެވެ. މިހާހިސާބަށް އަންނައިރު ކުއްޖާ ހުންނާނީ ފެންވަރާ ތާހިރުވެ އަދި ނަލަވެސް ވެގެންނެވެ. ފުރަތަމަ ލިބާސކުއްޖާގެ ބޮލަށް މަހާލައިދޭނީވެސް އެދުރުބޭގެ އަތުންނެވެ. ބައެއްފަހަރު މައިންބަފައިން އަމިއްލައަށެވެ. ބޮލުން ލިބާސް މަހާލުމަކީ (ބޮލުން ލިބާސް ވައްޓާލުމަކީ) އަންހެނަކަށް ވުމުގެ ފެށުން އިއުލާނު ކުރެވުމެވެ. ލިބާސް ލައްވާ ގަޑި ޖެހުމުން އެދުރުބޭ ކޮންމެވެސް ނަމަކާއެކު ކުއްޖާ ކޮބައިތޯ އައްސަވާލެއްވުމުން މެދު ދޮރުގެ ފޮތިގަނޑު ހިއްލާލާފައި ކުއްޖާ ނިކުންނާނެއެވެ. ނޫންނަމަ މަންމައާއެކު އެދުރުބޭކަލަކާ ހަމަޔަށް އަންނާނެއެވެ. ދެން ލިބާސް ލައްވަނީއެވެ.

ރަސްމިއްޔާތުގެ އަނެއްފަރާތް

އަންހެންކުއްޖާ ލިބާސްލައްވާ ދުވަހު ރަށުގެ ޒުވާން ޅަފުރައިގެ ފިރިހެން ކުދިން މަހަށް ނުގޮސް ރަށުގައި މަޑުކުރާނެއެވެ. އެމީހުން ތިބޭނީ އެވަގުތު އަތިރިއަތިރިމަތީގައެވެ. ގޮނޑުދޮށުގައި ހުންނަ ހިޔާބޮޑެތި ގަސްގަސް ދޮށުގައެވެ. މައިޒާންތަކާއެކު ހޮޅުއަށިތަކުގެ ކަންކަނުގައެވެ. ލިބާސްލެއްވުމާ ހަވާލުވެ ހުރި އެދުރުބޭކަލެއްގެ ބޯކޮޅު ބަލަމުން ޒުވާން ފިރިހެންކުދިން ހިނގާނެއެވެ. އަންހެންކުއްޖާގެ ގެއަށް އެދުރުބޭ ދުރުވަމުން އެގެއާ ކައިރީގައި ހުންނަ ކޮންމެވެސް ގެއަކަށް ނުވަތަ ގޮސް މިކަމުގައި ރޫހީގޮތުން ބައިވެރިވެއެވެ. އަމިއްލައަށް ދައުވަތު ލިބިގަނެގެންނެވެ. އަންހެންކުއްޖާއަށް އޮތް ޝައުގު ދެއްކުމުގެ ގޮތުންނެވެ.

އިމްތިޔާޒުތައް

ލިބާސް ލެވުމުން އެކުއްޖަކު ދެންބެލޭނީ އަންހެނުންގެ ގިންތީގައި ހިމެނޭ ބޮޑު އަންހެނަކަށެވެ. އަންހެނަކަށް ވުމުން، އިޖުތިމާއީގޮތުންނާއި، އިދާރީގޮތުންނާއި، އަދި އާދަކާދަ ނިޔާކުރާގޮތުން ލިބެންޖެހޭ ހުރިހާ ހައްގެއް ލިބޭނެއެވެ. ހަމަމިއާއެކު މި ރޮނގުރޮނގުން އަދާކުރަންޖެހޭ ހުރިހާ މަސްއޫލިއްޔަތެއްވެސް އަދާކުރަންޖެހޭނެއެވެ. އަންހެންދަރިޔަކު އަލަށް ލިބާސް ލެއްވުމާއެކު މައިންބަފައިންނަށް ތިމަންނާމެންނަކީ އެކަނިވެރިން ނޫންކަމުގެ އިހުސާސު ކުރެވެން ފަށައެވެ.

މިއީ “ފަތްތޫރަ” މަޖައްލާގެ 277 (އެޕްރީލް 2002) ވަނަ އަދަދުން ނަގާފައިވާ މައުލޫމާތެކެވެ.