ތާރީހުގެ ތެރެއިން: ކުރިން ދިވެހިން ފާހަގަކޮށް އުޅުނު ދުވަސްތައް

މި ލިޔުމުގައި މި ބަލާލަނީ އިހުގައި ދިވެހީން ފާހަގަކުރި ދުވަސްތައްކުގެ ތެރެއިން ދުވަސް ތަކަކަށެވެ. ތަފާތު އެކިއެކި ސަބަބު ތަކާއި ހުރެ މިދުވަސްތައް ފާހަގަ ކުރުން ވަނީ ހުއްޓާލާފައެވެ.

ކަނދި ދުވަސް

މިއީ މުހައްރަމް މަހުގެ 9 ވަނަ ދުވަހާއި 10 ވަނަ ދުވަހެވެ. ކަނދި ދުވަހަކީ ހުސައިނުގެފާނު ކަރުބަލާގައި މަރުވި ދުވަހެވެ. މި ދުވަސް ފާހަގަކުރަމުން އައީ އެ ދުވަހުގެ ހިތާމައިގައެވެ. ކަނދިދުވަހު ގޭގޭގައި ކަނދި ކައްކައިގެން ޞަލަވާތް ފާތިޙާ ކިޔަވައި އަދި ކަންޖާ އަޅައި ކުދީން ކިރާނެއެވެ. އަދި މި ދުވަހަށް ކަނދީ ޒަކާތް ބަހާ ދުވަހޭ ކިޔައޭ، މި ދުވަހު ގޭގެއަށް ފަގީރުން ދިއުމުން ލާރިއާއި ހަނޑޫ ބަހައި ހަނދައެވެ.

advertisement

ބޯފޮޅި ދުވަސް

މިއީ، ޖުމާދިލްއާޚިރު މަހު 29 ދުވަހާއި ޝަޢުބާން މަހު 14 ވަނަ ދުވަހާ އެ މަހުގެ 29 ވަނަ ދުވަހާ ޙައްޖު މަހުގެ 8 ވަނަ ދުވަސް. ބޯފޮޅިއަކީ ހަނޑުލާއި ގަނބުޅި ހުންޔާ އެއްކޮށްގެން ފުނޑައި ބޯކިރު އަޅައިގެން ފެންފޮޅިއަށް ވުރެ ތަންކޮޅެއް ބޯކޮށް ފިހާ ފޮޅިއަކަށް ކިޔާ ކަމެއް.

ބޯފޮޅި ދުވަހާ ވިދިގެން އަންނަ ދުވަހަކީ ބޯފޮޅި ވިލޭރެއޭ. ބޯފަޅި ދުވަހުގެ އަސުރު ނަމާދަށް މުންނާރުން ބަންގިގޮވީމާ ނިކަން ބާރަށް ބެރެއް ޖަހާނެއެވެ. މި ބެރަށް ކިޔަނީ ފާތިޙާ ބެރެވެ. މި ބެރު ޖެހީމާ ގޭގޭގައި ބޯފޮޅި ފާތިޙާ ކިޔެވުމަށް ތައްޔާރު ކުރާނެއެވެ. ބޯފޮޅި ހުންނާނީ ކުދި ތަށްޓަށް އަޅާފައެވެ. ފާތިޙާ ކިޔަވާނީ އެ ގެއެއްގެ މީހުންގެ މަރުވެފައި ތިބި ތިމާގެ މީހުންނަށެވެ. ބޯފޮޅި ވިލޭރޭ 9 ޖެހީމާ ރަދުން ގަނޑުވަރުން ޢިއްޒަތުގައި ބޯފޮޅިއަށް ވަޑައިގަތުމަށް ނުކުމެވަޑައިގަންނަވާނެ

ރަޖަބު މަހު 6 ވަނަ ދުވަސް

މި ދުވަހަކީ ނައިބުކަމާ ހިނގާ ދުވަހެވެ. މިއީ ފަނޑިޔާރު މީހާ ރާއްޖެއަށް ނައިބު ފަތް ނެރުއްވައި ދީނުގެ އަމުރުމައުރޫފު ހިންގަވާ ދުވަހެވެ. އެ ދުވަހު ހެނދުނު 6 ޖަހާއިރަށް ކޮއްޔެއް ލާނެއެވެ. އެ ދުވަހު ހަތަރު އަވަށު މައިޒާން ދޮށަށް މާލޭގެ ރައްޔިތުން އެއްކުރައްވާނެއެވެ.

ރަބީއުލްއައްވަލް މަހު 12 ދުވަސް

މިއީ ކީރިތި ރަސޫލާގެ އުފަންދުވަސް ކަމުގައި ފާހަނގަކޮށް އުޅުނު ދުވަހެވެ. މިހާރުވެސް ކޮންމެވެސް ވަރަކަށް މިދުވަސް ފާހަނގަކުރާ މީހުން އުޅެއެވެ. މި ދުވަހުގެ ރެއާއި މި ދުވަހު ގޭގޭގައި ކައްކައިގެން މައުލޫދު ކިޔައި ފާތިޙާ ކިޔަވައި އުޅުނެވެ. ފާތިހާ ކިޔުމަކީ ބިދުވައެއް ކަމަށް ގަބޫލުކުރާ މީހުން މިކަން މިހާރު ނުކުރެއެވެ.