ތާރީހުގެ ތެރެއިން: އިނގުރައިދޫ ނަގޫރޯޅި — އެރަށަށް ވަފުދެއް ދިޔައީ ދެއްވި އެހީ ފައިސާގެ ދޮޅުގުނަ ހަރަދުކޮށްފައި

މިއީ 90ގެ އަހަރުތަކުގައި ނެރުނު ދުވަހު ނޫހެއްގައި ލިޔެފައި އޮތް ހަބަރެކެވެ.

8 އެޕްރީލް 1990 ވީ ދުވަހު ރ. އިނގުރައިދުއަށް އެރި ނަގޫ ރޯޅީގައި އެރަށު ރައްޔިތުންނަށް ސާޅީހަކަށް ހާސް ރުފިޔާގެ ގެއްލުން ލިބުނެވެ. މިހިތާމަވެރި ހާދިސާގައި ގެއްލުން ލިބުނު ފަރާތްތަކަށް ސަރުކާރުން ވަނީ މާލީ އެހީ ވެދެއްވާފައެވެ.

advertisement

ސަރުކާރުން މިދެއްވެވި އެހީ ދެއްވުމަށްޓަކައި ރައީސުލްޖުމުހޫރިއްޔާގެ ހާއްސަ ވަފްދެއް ރ. އިނގުރައިދޫ އަށް ދިޔައެވެ. މިވަފުދުގެ އިސްވެރިޔަކަށް ހުންނެވީ ރައީސުލް ޖުމުހޫރިއްޔާގެ އާއިލީ ބޭފުޅެއް ކަމުގައިވާ އައްބާސް އިބްރާހިމެވެ.

މި ވަފުދު އިނގުރައިދޫ އަށް ދިޔައީ ހެލިކޮޕްޓަރެއްގައެވެ. އެ ހެލިކޮޕްޓަރު ކުއްޔަށް ދޫކުރާ ފަރާތްކަމަށްވާ “ހަމިންބާޑް” އިން ހެލިކޮޕްޓަރު ކުއްޔަށް ދޫކުރާ އަގަކީ ގަޑިއަކަށް 1500 ޑޮލަރެވެ. ރައީސުލްޖުމުހޫރިއްޔާގެ މި ވަފުދު އިނގުރައިދޫގައި ގާތްގަނޑަކަށް 5 ގަޑީ އިރު ހޭދަކުރިއެވެ.

އެހެން ކަމުން ހެލިކޮޕްޓަރުގެ އަގަށް އެކަނި ޖުމުލަ 7500 އެމެރިކާ ޑޮލަރު ހަރަދުވާނެ ކަމަށް ލަފާކޮށްފައި މިވާހަކަ ރިޕޯޓުކުރި ނޫހުގައި ވެއެވެ.

އެއީ އޭރުގެ ރޭޓުން ބަލާނަމަ 67500 ދިވެހި ރުފިޔާއެވެ. އެއީ އިނގުރައިދޫ ރައްޔިތުންނަށް ނަގޫ ރޯޅިން ލިބުނު ގެއްލުމުގެ ދޮޅު ގުނަ ގިނަ ފައިސާއެވެ. މިއީ އެޒަމާނުގައި ވެސް އަދި މިޒަމާނުގައި ވެސް ހިނގާ ކަންކަމެވެ.

ރައްޔިތުންނަށް އެހީވުމުގެ ނަމުގައި ކުޑަ ހަރަދަކުން ހިންގާ އަގުދަށް ޕްރޮޖެކްޓުތައް އިފްތިތާހުކުރުމުގެ ނަމުގައި ދައުލަތުގެ އެކި ފަރާތްތަކުން ޓީމު ހަދައިގެން ރަށަށް އަރައި ގެސްޓްހައުސް ތަކުގައި ނިދާފައި އެނބުރި މާލެ ދިޔުމަކީ އާއްމުކަމެކެވެ. ސިޔާސީ ފަރާތްތަކުން ރައްޔިތުންނަށް މިފަދަ މަލާމާތްކުރާތާ ވީހާދުވަހެއް ވެއްޖެއެވެ.