އަމިއްލަ ހިޔާލު: ސަރުކާރު ގޯސްވަނީ މަގާމުން ވަކިކުރާ ހިސާބުން

ސިޔާސީ މަގާމުތަކަކީ ކައިވެނި ފަދަ ކަމެކެވެ. ހަނީމޫންގެ ދުވަސްވަރު އެވަރެއްނެތް ރަންގަނޑެކެވެ. ނަމަވެސް ކައިވެނި ރޫޅުމުން އެއަށް ވުރެ ނުބައި މީހަކު ނުހުރެއެވެ. ދައްކާނީ ހުސް އައިބު ކަންކަމެވެ. ސިޔާސީ މަގާމުގައި ނުވަތަ ސަރުކާރުން އައްޔަންކުރާ މަގާމެއްގައި ހުންނަ އިރު ވެސް ކަން ވަނީ މިހެންނެވެ. އެންމެ ފަހު ދުވަހާ ހަމައަށް ސަރުކާރު ވަރެއް ނެތެވެ. ނަމަވެސް ހަމަ ވަކިކުރީ ސަރުކާރު ނުވަތަ ރައީސުލްޖުމްހޫރިއްޔާ އަށް ވުރެ ނުބައި މީހެއް ނުހުރެއެވެ.

މި ސަރުކާރުގައި މީގެ ކުރިން ވެސް މި މަންޒަރު ފެނުނެވެ. އަދި މިހާރު ވެސް ދަނީ ފެންނަމުންނެވެ. މި ސަރުކާރުގެ މިނިސްޓަރުކަމުގައި ކުރިން ތިއްބެވި މިނިސްޓަރުންނަށްވެސް ވީ މިފަދަ ގޮތެކެވެ. ސަރުކާރުގައި ހުންނެވި އިރު އެއްވެސް އުނި ކަމެއް ނެތެވެ. އެކި ސަބަބުތަކާހެދި މަގާމުން ވަކިކުރުމާ އެކު ދެން ދައްކަވަން ފެށީ ސަރުކާރުގެ ގޯސް ވާހަކަތަކެވެ.

advertisement

ކުރިން ރައީސުލްޖުމްހޫރިއްޔާ ކީހާ ސަނާތައް މަތިން ހަނދާ ނެތި ނުގޮވާކަށް އެއްޗެއް ނެތެވެ. މިއީ ބައެއް މީހުންގެ ކަށީގައި ހިފާފައި ހުންނަ ކަމެކެވެ. މިއީ އާންމުކޮށް ކަންވާ ގޮތެވެ.

އެސްޓީއޯގެ ކުރީގެ އެމްޑީ އަމްރު ވަކި ކުރުމުން ނެރުނު ބަޔާން

މިހާރު ވެސް މިއީ އެފަދަ މަންޒަރުތައް ފެންނަ ދުވަސްކޮޅެކެވެ. މީގެ ދުވަސްކޮޅެއް ކުރިން ރައީސް ސޯލިހަށް ސަނާ ކިޔުއްވި ބޭފުޅުން މިހާރު ރަތްމަހަށް ނުގޮވާ ވަރަށް އެއްޗެހި ކިޔަނީއެވެ. ދާދި ފަހުން އެސްޓީއޯގެ އެމްޑީކަމުގައި ހުންނެވި ހުސައިން އަމުރުއަށް ވެސް ވެގެން އުޅެނީ މިފަދަ ގޮތެކެވެ.

ތެދު ތެދަށް ދަންނަވާ ނަމަ އަމްރުއަކީ އެސްޓީގެ ތާރީހުގައި އެ ކުންފުނި ހިންގެވި އެންމެ ކާމިޔާބު އެއް ބޭފުޅާއެވެ. އެހެން ނަމަވެސް ސަރުކާރުގެ ސިޔާސަތުތަކާ ދެކޮޅަށް ސިޔާސީ ވަކި ފިކުރެއް ދިރުވުމަށް މަސައްކަތްކުރެއްވުމުން އަމުރު މަގާމުން ވަކިކުރަން ޖެހުނެވެ. ކޮންމެހެން ހިންގުން ދޯދިޔާވެ، ނުވަތަ ގާބިލްކަން ނެތިގެން ނޫނެވެ. ސަރުކާރުގެ ސިޔާސަތު ތަންފީޒުކުރުމުގައި އަސާސީ ކުންފުންޏެއްގައި ހުރެ ސަރުކާރާ ދެކޮޅަށް މަސައްކަތްކުރައްވާތީއެވެ.

މަގާމުގައި ހުންނެވި އިރު އަމްރު ވަނީ ސަރުކާރުގެ ސިޔާސަތުތައް ދެމެހެއްޓުމަށްޓަކައި ވަރަށް ގިނަ މަސައްކަތްތައް ކުރައްވާފައެވެ. އަދި އެކަންކަން ކުރެއްވުމުގައި ސަރުކާރު ދިން އެއްބާރުލުމާއި މަގުފަހިކޮށްދެއްވާތީ ރައީސް ސޯލިހަށް ވަރަށް ފަހަކާ ޖެހެންދެން ވެސް ސަނާ އާއި ތައުރީފްގެ ބަސްތައް ވިދާޅުވަމުން ގެންދެވިއެވެ. އެހެން ނަމަވެސް މަގާމުން ވަކިވުމާ އެކު ހުރިހާ ކަމެއް ބަދަލުވެއްޖެއެވެ. އަމުރު ކުރެއްވި ގިނަ ކަންކަން ވެސް އެއީ ސަރުކާރުގެ ނުފޫޒުން ކުރެއްވި ކަންތައްތަކަށްވެ، އެ ކަންކަން ވެސް ގޯސް ވެއްޖެއެވެ.

މަގާމުން ވަކިކުރެއްވުމާ ގުޅިގެން ނެރުއްވި ދިގު ބަޔާނެއްގައި ސަރުކާރަށް ގިނަ ތުހުމަތުތަކެއް ކުރައްވާފައި ވެއެވެ. ރައީސް ސޯލިހް ދޫކުރައްވައި މަޖިލީހުގެ ރައީސް މުހައްމަދު ނަޝީދުގެ ފިކުރެއްގެ ދިރުމާ ގުޅިވަޑައިގަންނަވަންޖެހިވަޑައިގަތީ އިސްލާހްގެ މަގަށް ކަންކަން ގެންނެވުމަށް ކުރެއްވި މަސައްކަތަށް އެއްބާރުލުން ނުދެއްވުމުން ކަމަށް ތުހުމަތުކުރެއްވިއެވެ.

بسم الله الرحمن الرحيم pic.twitter.com/hbAPcZ3Dyg— Amr 🎈 (@HusenAmr) April 11, 2023

ސަރުކާރުގެ އިގްތިސާދީ ސިޔާސަތަށް ފާޑު ވިދާޅުވަމުން އަމްރު ވަނީ ޓެކްސް ބޮޑުކުރުމާއި ބޮޑު އަގުގައި ދަރަންޏަށް ފައިސާ ނަގާ ކަމާއި މަޝްރޫއުތައް ކުރިއަށް ދާ ގޮސް ސަރުކާރުން ނުބަލާ ކަމާއި ސަރުކާރުގެ ކުންފުނިތައް އާންމު އެތައް ވިޔަފާރިތަކަކަށް ދަރާފައިވާކަމުގެ ތުހުމަތުކުރައްވާފައެވެ.

އެ ވާހަކަތަކަށް ރައްދު ދެއްވައި ރައީސް އޮފީހުގެ ތަރުޖަމާން މުހައްމަދު މިއުވާން ވިދާޅުވީ އަމްރު ތުހުމަތުކުރެއްވި ކަންކަމަކީ ކޮވިޑާ ގުޅިގެން ކުރިމަތިވި އިގްތިސާދީ ދަތިހާލުން އަރައިގަތުމަށް ސަރުކާރަށް ކޮންމެހެން އަޅަންޖެހުނު ފިޔަވަޅުތަކެއް ކަމަށާއި އެ ފިޔަވަޅުތަކަށް ވޯލްޑް ބޭންކާއި ދުނިޔޭގެ މާލީ އިދާރާތަކާއި އެކި ގައުމުތަކުން ތައުރީފް ދިވެހި ސަރުކާރަށް ލިބުނު ކަމަށެވެ.

ދައުލަތުން ޑްރަގް ވިޔަފާރިއަށް ވެދެފަވާ ކަމަށް ތުހުމަތު ކުރެވޭ ޖާގަ އެބައޮތް.
ބޯމީހުނަށް ފަރުވާ ނުދެވި އެތެރެކުރެވޭ 2 ދޮރޯށި ތަންމިނަށް ހުޅުވާފަ އޮތް ކޮންމެ ދުވަހަކީ ޖީލެއް ހަލާކުވެގެންދާނެ ކަމެއް. https://t.co/nNt7NqfCg8— Amr 🎈 (@HusenAmr) April 5, 2023

އަދި އެކަންކަން ސަރުކާރުން ކުރީ މާލީ އިދާރާތަކުގެ ލަފާގެ މަތިން ކަމަށް ވެސް މިއުވާން ވިދާޅުވިއެވެ. އަނެއްކޮޅުން އަމްރު އެ ވިދާޅުވި ކަންކަން ތަންފީޒުކުރުމުގައި އެންމެ އިސް ދައުރެއް އަދާކުރި އެއް ކުންފުންޏަކީ އެސްޓީއެވެ. އަދި މިއަދު ކަމުނުގޮސްގެން އުޅޭ ފިޔަވަޅުތައް އެޅުމަށް ސަރުކާރުން ގޮތް ނިންމި އިރު އަމުރުގެ ދައުރު ވެސް ބޮޑެވެ.

މަގާމުން ވަކިކުރުމުން އެހެން ގިނަ ސިޔާސީ މީހުންވެސް އަމަލުކުރީ ހަމަ މިފަދައިންނެވެ. މަގާމުގައި ހުންނެވި އިރު ސަނާ ކިޔުމުގައެވެ. ވަކިކުރުމުން ސަރުކާރުގެ ރަނގަޅު ހަމަ އެންމެ ސިފައެއް ވެސް ނެތެވެ. މަޖިލީހުގައި މީގެ ކުރިން ސަރުކާރަށް ތައުރީފު އޮއްސި ކަންކަމަށް މިހާރު ގެންދަވަނީ ފާޑު ވިދާޅުވަމުންނެވެ. ކުރިން ތައުރީފާއި ސަނާ ކިޔަމުން ދިޔަ ބޭފުޅުންނަށް މިހާރު ހަމަ އެކަންކަން ހަރާމް ކަންކަމަށްވެ ފާޑު ގޮވަނީއެވެ. އެންމެނަށްވެސް ސަރުކާރު ރަނގަޅީ އެމީހަކަށް އެއްޗެއް ލިބެންޏާއެވެ. ސިޔާސީ ކަންކަމަކީ މިހެން އޮންނަކަމެކޭ ބުނެ ދެންޖެހޭނީ ނިންމާލާށެވެ. ހަކުރު ދެންޏާ ބޮޑުބޭބެ އުސޫލެވެ.