އިޖުތިމާޢީ ގުޅުންތައް ބަދަހިކުރުމަށް ދަރިފުޅަށް އެހީތެރިވުން

އިޖުތިމާއީ ގުޅުންތައް ބަދަހިކުރުމަކީ،  ކުޑަކުދިންނަށް އެހާ ފަސޭހަކަމަކަށް ނުވެދާނެއެވެ. ހާއްސަކޮށް އެކުދިން ބޮޑެތިވަމުން އަންނައިރު ދިމާވާ އެކި އެކި އިޖުތިމާޢީ ކަންކަމާ ކުރިމަތިލާއިރު ބައެއް ކުދިންނަށް އުނދަގޫތަކާ ކުރިމަތިވެއެވެ. ބެލެނިވެރިއެއްގެ ހައިސިއްޔަތުން ދަރިފުޅުގެ އިޖުތިމާޢީ ހުނަރުތައް ތަރައްޤީކޮށް، ދުޅަހެޔޮ ގުޅުންތަކެއް ބިނާކުރުމަށް އެހީތެރިވެދެވޭނެ ތަފާތު ގޮތްތައް އެބަހުއްޓެވެ. މިއީ އެގޮތަށް އެހީތެރިވެދޭނެ ބައެއް ސްޓްރެޓެޖީތަކެވެ.

• މުވާޞަލާތު ކުރުމަށް ހިތްވަރު ދިނުން: ދަރިފުޅުގެ ޚިޔާލާއި އިޙްސާސްތައް ބުނެދޭއިރު އިޙްތިރާމާއެކު މުޢާމަލާތު ކުރުމަށް ހިތްވަރު ދޭށެވެ. އެހެން މީހުން ދައްކާވާހަކަ އަޑުއަހާ، އަނެކާގެ އިހްސާސްތައް ދަނެ އިހްތިރާމާއި އެކު އަޑުއަހަން ދަސްކޮށްދެވިދާނެއެވެ. 
• ޚިޔާލުތަފާތުވުންތައް ހައްލުކުރަން ދަސްކޮށްދިނުން: ދެބަސްވުންތައް ނުވަތަ ތަފާތު ހިޔާލުތައް ހައްލުކުރުމަށް ރަނގަޅު ގޮތަކަށް ދަސްކޮށްދީ، އެހެން މީހުންގެ ޚިޔާލުތަކަށް އިހްތިރާމްކުރުމަށް ހިތްވަރު ދެވިދާނެއެވެ. .
• އިޖުތިމާޢީ ގުޅުމަށް ފުރުޞަތުތައް ހޯދައިދިނުން: ގްރޫޕް ހަރަކާތްތަކާއި އިޖުތިމާޢީ ހަރަކާތްތަކުގައި ބައިވެރިވުމަށް ދަރިފުޅަށް ހިތްވަރު ދޭންވާނެއެވެ. މިއީ އިޖުތިމާޢީ ހުނަރުތައް ތަރައްޤީކޮށް އެހެން ކުދިންނާ ގުޅުން ބަދަހިކުރުމަށް އެހީތެރިވެދޭނެ ކަމެކެވެ. 
• އެހެން ކުދިންގެ އިހްސާސްތައް ދެނަގަތުމަށް ދަސްކޮށްދިނުން: އެހެން ކުދިންގެއިޙްސާސްތައް އެނގި ، ކިޔައިދީ ދަރިފުޅަށް އެހެން މީހުންގެ އިހްސާސްތައް ދެނަގަތުމުގެ ގާބިލްކަން އިތުރުވާނެއެވެ. މިއީ އެހެން މީހުންނާ މެދު އޯގާތެރިކޮށް ވިސްނުން ބެހެއްޓުމަށް އެހީތެރިވެދޭނެ ކަމެކެވެ.

މި ސްޓްރެޓެޖީތައް ބޭނުންކޮށްގެން ދަރިފުޅަށް އިޖުތިމާޢީ ގުޅުންތައް ބަދަހިކުރުމަށް އެހީތެރިވެދީ، އެހެން ކުދިންނާ ގުޅިގެން އުޅެން ދަސްވެގެންދާނެއެވެ

advertisement