ހުޅުމާލޭގެ އަހަރީ ދުވަސް ފާހަގަކުރުމަށް ހާއްސަ ކުޑަކުދިންގެ ހަވީރަކާއިއެކު ހެލްތު ސްކްރީނިން ޕްރޮގްރާމެއް

ހުޅުމާލޭގައި މީހުން ދިރިއުޅެން ފެށިތާ 19 އަހަރު މި މެއި މަހުގެ 12 ވަނަ ދުވަހު ފުރޭ އިރު، އެ ދުވަސް ފާހަގަކުރުމުގެ ގޮތުން އަރބަންކޯއިން ވަނީ ގިނަ ހަރަކާތްތަކެއް ރާވާފައެވެ. 

ހާއްސަ ކުޑަކުދިންގެ ހަވީރެއް

މޯލްޑިވްސް ނެޝެނަލް ހައުސިން އެސޯސިއޭޝަންއާއި އަރބަންކޯއިން ގުޅިގެން 12 ވާ ހުކުރު ދުވަހުގެ ހަވީރު ހުޅުމާލޭގައި ކުޑަކުދިންގެ ހަވީރެއް ބޭއްވުމަށް ވަނީ ހަމަޖައްސާފައެވެ. 

advertisement

ކުޑަކުދިންގެ ދުވަހާއި ހުޅުމާލެ އަށް 19 އަހަރު ފުރުން ފާހަގަކުރުމުގެ ގޮތުން މި ކުޑަކުދިންގެ ހަވީރު ބާއްވަން ހަމަޖެހިފައި ވަނީ ހަވީރު 4ން 6އަށް ދެވަނަ ފިޔަވަހީގެ ހިޔާ ޕާކުގައެވެ. މި ހަވީރުގައި ލަވަކިޔުންތެރިޔާ ޝަލަބީ އަދި ރޮބޯމޭންގެ ހަރަކާތްތައް ކުދިންނަށް ދައްކާލުމަށް ހަމަޖައްސާފައިވާއިރު، ސްޕޯޓްސް ކާ ޝޯވެސް ކުރިއަށްދާނެއެވެ. މީގެ އިތުރަށް އަރބަންކޯގެ އިސްނެގުމަށް ހިޔާ މެޑިކަލް ސެންޓަރ އާ ގުޅިގެން ގެންދާ ހެލްތު ޗެކްއަޕް ސްޓޭޝަނެއްވެސް މި ހަވީރުގައި ހިމަނާފައިވާނެއެވެ.

މި ހަރަކާތުގެ މަގުސަދަކީ ކުޑަކުދިންނަށް އުފާވެރި ވަގުތެއް ހޯދައިދީ، މުޖުތަމައުގެ މެދުގައި އޮންނަ ގުޅުން އެއްބައިވަންތަކޮށް، ބާރުވެރިކޮށް، ބަދަހިކުރުމެވެ. އަދި މުޖުތަމަޢުގައި ދިރިއުޅޭ މީހުންނަށް، ގެއިން ބޭރުގައިވެސް ދަރިންނަށް އުފާވެރި، ހަރުދަނާ، ޞުލްޙަވެރި މާޙައުލެއް ޤާއިމުކުރެވިދާނެކަން ދައްކުވައިދިނުމެވެ. 

ހެލްތު ސްކްރީނިން ޕްރޮގްރާމެއް

އަރބަންކޯއާއި، ހުޅުމާލޭގައި ހިންގަމުން އަންނަ ހޮސްޕިޓަލްތައް ގުޅިގެން ހުޅުމާލޭގެ އެކި ސަރަހައްދުތަކުގައި ހެލްތު ސްކްރީނިން ޕްރޮގްރާމްތަކެއް ކުރިއަށްގެންދިއުމަށް ވަނީ ނިންމާފައެވެ. 

މެއި މަހުގެ 12 ވާ ހުކުރު ދުވަހު ހަވީރު 4ން އިރުއޮއްސި 6އާ ހަމައަށް ހުޅުމާލޭގެ ތިން ސަރަހައްދެއްގައި މި ހެލްތު ސްކްރީނިން ޕްރޮގްރާމް ކުރިއަށްދާނެއެވެ. އެއީ ހުޅުމާލެ ފޭސް 1 ގެ ރުއްގަނޑު 1 ސަރަހައްދު، ފޭސް އެކެއްގައި ހުންނަ މޭރީ ބްރައުން ކައިރި، އަދި ހުޅުމާލޭގެ ފޭސް 2 ހިޔާ ޕާކު ސަރަހައްދުގައެވެ. މި ޕްރޮގްރާމް މައިގަނޑުގޮތެއްގައި އަމާޒުކޮށްފައި ވަނީ ރާއްޖޭގައި އާންމުކޮށް ފެންނަ ގައިން ގަޔަށް ނާރާ ބަލިތަކަށެވެ. އެގޮތުން ހިތުގެ ބަލިތަކަށެވެ. އެގޮތުން މި ތިން ސަރަހައްދުގައި މިފަދަ ބަލިތަކުގެ ހިރާސް ދެނެގަތުމުގެ ޓެސްޓުތައް ހަދާނެއެވެ. އޭގެ ތެރޭގައި ހަކުރު ޓެސްޓާއި، ބީޕީ އަދި ބީއެމްއައި ބަލައި، މިކަންކަމާ ގުޅުންހުރި މައުލޫމާތު އާންމުންނަށް ފޯރުކޮށްދިނުމަށް ވަނީ ހަމަޖެހިފައެވެ.

ހުޅުމާލޭގެ އަހަރީ ދުވަސް ފާހަގަކުރުމުގެ ގޮތުން މިކަހަލަ ހަރަކާތެއް ކުރިއަށްގެންދިއުމުގެ މައިގަނޑު މަގްސަދަކީ ހުޅުމާލޭގެ ރައްޔިތުންނަކީ ދުޅަހެޔޮ ސިއްހަތެއްގައި ތިބޭ ބަޔަކަށް ހަދައި މިކަންކަމަށް އާންމުން އަހުލުވެރިކުރުވުމެވެ. މި ހަރަކާތުގެ އިތުރުން އެ ދުވަހު ހަވީރު ހުޅުމާލޭގެ ދެވަނަ ފިޔަވަހީގައި ކުޑަކުދިންގެ ހަވީރެއް ވެސް ކުރިއަށްދާނެއެވެ.