ރިޕޯޓު: ސިޔާސީ ފިކުރުތައް އޮޅުންބޮޅުންވެ މަސްހުނިވެފައި

މިހާރު ފެންނަނީ ހުސް ސަރުކާރުގެ ކުލަވަރު،” އީދުގެ އުފާފާޅުކުރުމުގެ ތެރެއިން ޝޯތައް ދިނުމަށް ދަތުރުކުރި ގްރޫޕެއްގައި އިސްކޮށް އުޅުނު މީހަކު ބުންޏެވެ. 

އީދުގެ ހަތަރު ރޭ ހަތަރު ރަށެއްގައި ޝޯ ކުޅެދިން ގްރޫޕްގައި ހިމެނޭ އެ މީހާ އެ އިޝާރާތްކުރީ ރަށްރަށުގައި އޮންނަ ސިޔާސީ ވާދަވެރިކަމުގެ ވާހަކައަށެވެ. އާންމު ގޮތެއްގައި އީދަކީ ސިޔާސީ ފޯރިން އެއްކިބާވެ، ހުރިހާ ރައްޔިތުން އެކުގައި ގުޅިގެން އުފާފާޅުކުރާ ދުވަސްވަރެކެވެ. އެހެން ނަމަވެސް މީގެ ކުރިން މި ފޯރީގެ ތެރެއިން ވެސް ސިޔާސީ ކުލަވަރު ކޮންމެ ވެސް މިންވަރަކަށް ފެނެއެވެ. 

advertisement

ސަރުކާރުގެ ހަރަކާތްތައް ފިޔަވައި އެހެން ހަރަކާތެއް ނުފެނެ

ނުވަތަ އެ ރަށެއްގައި އޮންނަ ސިޔާސީ ވާދަވެރިކަން ކޮންމެ ވެސް ސިފައެއްގައި ރަށު ތެރެއަށް ފެނެއެވެ. އެހެން ނަމަވެސް އޭނާ ފާހަގަކުރީ އޭނާ ދަތުކުރި ހަތަރު ރަށުން ވެސް “ސަރުކާރުގެ ހަރަކާތްތައް” ފިޔަވައި އެހެން ހަރަކާތެއް ނުފެންނަ ކަމެވެ. އިދިކޮޅުގެ އެއްވެސް ހިލަމެއް ނެތް ކަމަށް އޭނާ ފާހަގަކުރިއެވެ. ”ކުރިން ވެސް އީދު ފާހަގަކުރަނީ އެންމެން ގުޅިގެން. 

އެހެން ނަމަވެސް އީދާ ހަމައަށް އެ އޮންނަ ސިޔާސީ ފޯރީގެ އަސަރު ރަށު ތެރެއިން ފެންނާނެ. ނަމަވެސް މިހާރު އެކަމެއް ނެތް. ފޮތިގަނޑެއް ހިސާބު ވެސް ނުވަތަ ސިޔާސީ ލަވައެއް ވެސް އަޑެއް ނީވޭ. ފެންނަނީ ރަށުގައި ހިންގާ ކޮންމެ ވެސް ތަރައްގީގެ މަސައްކަތެއްގައި މީހުން ބިޒީވެގެން އުޅޭތަން،” ކުރިން ވާހަކަ ދެއްކި އެ މީހާ ބުންޏެވެ. 

މީގެ ކުރިން ޅ. ހިންނަވަރަކީ ވެސް ސިޔާސީ ގޮތުން ވަރަށް ވާދަވެރިކަން ބޮޑު ރަށެކެވެ. މިހާރުގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އެ ރަށުގެ ގޮނޑި ފަސް ދައުރެއްގައި ދިފާއުކުރެއްވި ނަމަވެސް އެއިން ކޮންމެ ފަހަރަކު ވެސް އިންތިހާބު ކާމިޔާބުކުރެއްވީ ވަރަށް ވާދަވެރިކޮށެވެ. 

އެހެންކަމުން ފެށުނީއްސުރެއް އެ ރަށުގައި ޑީއާރުޕީ ނުވަތަ ފަހުން ޕީޕީއެމްގެ ސަޕޯޓަރުންނާއި އެމްޑީޕީގެ ސަޕޯޓަރުންގެ މެދުގައި ވާދަވެރިކަން އޮވެއެވެ. އީދު ފާހަގަކުރުމުގައި ވެސް އެ ވާދަވެރިކަން އޮތެވެ. އެއްބަޔަކު ރަށުގެ އެއްކޮޅުގައި ޝޯ ބާއްވާ ނަމަ އަނެއް ބަޔަކު އަނެއްކޮޅުގައި ސްޓޭޖް ހަދައެވެ. އެއް ފަހަރާ ދެ ކާނިވާ ހިންގާ ފަހަރު ވެސް އާދެއެވެ. އެހެން ނަމަވެސް މިހާރު އެ މަންޒަރު ވަނީ ބަދަލުވެފައެވެ.

“މި ރަށަށް ނިސްބަތްވާ ބޭފުޅަކު ރައީސަކަށް އައުމާ އެކު ސިޔާސީ ވާދަވެރިކަން އެއް އަތަކަށް ގޮސް ބުރަވެއްޖެ. ފާއިތުވި އިންތިހާބުތަކުގެ 

ނަތީޖާތަކުން ވެސް އެކަން އެނގޭނެ. މަޖިލިސް އިންތިހާބު ބޮޑު ތަފާތަކުން އެމްޑީޕީ ކާމިޔާބު ކުރީ. އޭގެ ފަހުން ލޯކަލް ކައުންސިލް އިންތިހާބު ވެސް ހަމައެހެން. އަނެއްހެން މިހާރު މި ރަށުގައި އޮތީ އެމްޑީޕީ އެކަންޏޭ ބުންޏަކަސް ގޯހަކަށް ނުވާނެ،” ހިންނަވަރުގެ އާންމު ރައްޔިތަކު ބުންޏެވެ. 

ހިންނަވަރުގައި ސިޔާސީ ތިލަފަތް އެއް އަތަކަށް ބުރަވުމުގައި ވަރަށް ގިނަ ސަބަބުތައް އެބަ ހުއްޓެވެ. އެއްކަމަކީ ކުރިން ޕީޕީއެމްގެ ހަރަކާތްތައް ހިންގުމަށް އިސްކޮށް އުޅުނު ގިނަ ބަޔަކު މި ސަރުކާރުން އެކި ވަޒީފާތައް ދީ ކޮޅު ބަދަލުކޮށްފައި ވުމެވެ. އޭގެ ތެރޭގައި ޑީއާރުޕީގެ ޒަމާނުން ފެށިގެން ވެސް އެ ހަރަކާތްތައް ހިންގަމުން އައި އާއިލާތަކުގައި އިސްކޮށް ތިބި މީހުން ހިމެނެއެވެ.

“މިހާރު ނެތް ޕީޕީއެމްގެ ހަރަކާތް ހިންގާނެ ހަރުދަނާ މީހަކު. ގިނަ މީހުން ތިބީ ސަރުކާރު ވަޒީފާތަކުގައި. އަނެއް ބަޔަކު އެހެން ޕާޓީތަކުގައި. ކުރިން ވާދަކުރެއްވި ބޭފުޅާ ވެސް މިހާރު މިދާއިރާއަށް މާބޮޑު އަޅައިލުމެއް ނެތް. އާއިލާ ބޭފުޅުން ވެސް ތިއްބެވީ ސަރުކާރުގައި،” ކުރިން ވާހަކަ ދެއްކި މީހާ ބުންޏެވެ. 

ސިޔާސީ ފޯރި ކުޑަވުމުގެ މައިގަނޑު ސަބަބަކީ ކޮބާ؟

މިއީ ހަމައެކަނި ހިންނަވަރުގެ ހާލަތެއް ނޫނެވެ. މީގެ ކުރިން ސިޔާސީ ފޯރިގަދަ އެހެން ބައެއް ރަށްރަށުގައި ވެސް މިކަން އޮތީ މިހެންނެވެ. ބައެއް ފަރާތްތަކުން ބުނާ ގޮތުން ސިޔާސީ ފޯރި ކުޑަވުމުގެ މައިގަނޑު ސަބަބަކީ ވަކި ފިކުރަކަށް އޮތް ލޯބި ކުޑަވުމެވެ.

އޭނާ ދެކޭ ގޮތުން އެހެން އެވީ އެއް ފިކުރާއި އަނެއް ފިކުރު މަސްހުނިވެ އޮޅުންބޮޅޭ ހިސާބަށް ކަންކަން ދިއުމުންނެވެ. އޭނާ ދައްކާ ވާހަކަ ގޮސް ގުޅެނީ ވަކި ފިކުރެއް ދިރުވުމުގައި އެއްގޮތެއްގައި ސިޔާސީ ލީޑަރުންނަށް ވެސް ދެމި ނުތިބެވޭ ކަމުގެ މައްޗަށެވެ. ޕާޓީ ބަދަލުކުރުމާއި ތާއީދުކުރާ ގޮތް ބަދަލުވުމަކީ މިހާރު އާންމު ކަމަކަށް ވަނީ ވެފައެވެ. އަދި ވަކި އެދުމެއް ހާސިލްކުރުމަށް ސިޔާސީ ފަރާތްތަކުން ކޮންމެ ފަދަ ގޮތަކަށް ވެސް ޑީލް ހަދާފާނެކަމަށް ރައްޔިތުން ގަބޫލުކުރެއެވެ.

ރަށްރަށުގައި ހަމައެކަނި ސިޔާސީ ފޯރި ކުޑަވީކީ ނޫނެވެ. ސަރުކާރާ ދެކޮޅަށް ވާހަކަދައްކާ މީހުން ނުވަތަ އިދިކޮޅު ހަރަކާތްތައް ވެސް ހުއްޓުނީއެވެ. ބައެއް މީހުން ގަބޫލުކުރާ ގޮތުގައި މިކަމުގައި ވެސް ދެ ސަބަބެއް އެބަ އޮތެވެ. އެއް ސަބަބަކީ ފާއިތުވި ފަސް ވަރަކަށް އަހަރުގެ ތެރޭގައި އިދިކޮޅުން ރަށްރަށުގައި ސިޔާސީ ހަރަކާތް ނުހިންގުމެވެ. 

އިދިކޮޅުގެ ހަރަކާތްތައް މަޑުޖެހިފައި އޮތުމުގެ ސަބަބަކީ ކޮބާ؟

ހާއްސަކޮށް ކުރީގެ ރައީސް އަބްދުﷲ ޔާމީން ޖަލަށް ލުމާ އެކު އިދިކޮޅުގެ ހަރަކާތްތައް މަޑުޖެހިފައި އޮތުމަކީ އޭގެ އެއް ސަބަބެވެ. އަނެއް ސަބަބަކީ ރަށްރަށުގައި ތަރައްގީގެ ގިނަ މަސައްކަތްތަކެއް އެއްފަހަރާ ކުރިއަށް ދިއުމެވެ. އަދި މި މަސައްކަތްތަކުގައި ރަށްގެ ވަރަށް ގިނަ ރައްޔިތުން ބައިވެރިވުމެވެ. 

ކުރިއާ ހިލާފަށް މީގެ ތެރެއިން ގިނަ މަޝްރޫއުތަކަކީ ދައުލަތުގެ ކުންފުނިތަކާ ހަވާލުކޮށްގެން ކުރިއަށް ގެންދާ މަޝްރޫއުތަކަށް ވެފައި އެ މަސައްކަތުގައި އެ ރަށަކަށް ނިސްބަތްވާ ގިނަ ބަޔަކު ހަރަކާތްތެރިވުމަކީ ވެސް ސިޔާސީ ކަންކަމަށް ދޭ ސަމާލުކަން ކުޑަވާ ކަމެކެވެ.

“މި ރަށަށް ބަލައިލި ނަމަވެސް އެތައް ބަޔަކު އެ އުޅެނީ މަގު ހެދުމުގައި. އާރުޑީސީގެ ވަޒީފާތަކުގައި. މަގުމައްޗަށް ބަލައިލި ނަމަވެސް އަންހެން ވެރިން ވެސް ފެންނާނީ މަގު ކޮނެ، ގާއެތުރުން ފަދަ މަސައްކަތްތަކުން،” ހިންނަވަރުގެ މަގުތައް ހެދުމުގައި ހަރަކާތްތެރިވާ އަންހެނަކު ބުންޏެވެ. 

މިއީ ރާއްޖެ ކޮންމެ ދިމާލަކަށް ބަލައިލި ނަމަވެސް މި ކަން އޮތް ގޮތެވެ. 

ފެނާއި ނަރުދަމާގެ މަސައްކަތާއި، މަގުތަކުގައި ތާރު އެޅުމާއި، ކަރަންޓްގެ މަސައްކަތްތަކާއި، ބަނދަރު ހެދުމާއި މިހެން ގޮސް އެތައް އެތައް މަސައްކަތްތަކެއް ސަރުކާރުގެ ކުންފުނިތައް ކަމަށްވާ ފެނަކަ، ސްޓެލްކޯ، އާރުޑީސީ އަދި އެމްޓީސީސީ ފަދަ ކުންފުނިތަކުން ކުރިއަށް އެބަ ގެންދެއެވެ. ކުރިއާ ހިލާފަށް މި ކުންފުނިތަކުގެ މަސައްކަތްތަކުގައި ދިވެހިން، ހާއްސަކޮށް މަޝްރޫއު ހިންގާ ރަށުގެ ރައްޔިތުން ބައިވެރިކުރެއެވެ.

“ކޮންމެ މީހަކު ވެސް މިއުޅެނީ ސަރުކާރުގެ ކޮންމެ ވެސް ކުންފުންޏެއްގެ ވަޒީފާގައި. ނޫނީ ރަށުގައި ހިންގާ މަޝްރޫއަކުން މަންފާ ލިބޭ ކަމެއްގައި. ސިޔާސީ ކަންކަމަށް ވިސްނުން ބަހައްޓައިގެން އުޅުމަށް ވުރެ އާމްދަނީ ލިބޭނެ ގޮތް މީހުންނަށް މިހާރު މުހިންމު،” ނ. ހޮޅުދޫ ޒުވާނަކު ބުންޏެވެ.

މިހާތަނަށް ރަށްރަށުގައި އެއްފަހަރާ އެންމެ ގިނަ މަޝްރޫއު ހިންގުމުގެ ރެކޯޑް ހަމަގައިމު ވެސް އޮތީ މި ސަރުކާރަށެވެ. މި ސަރުކާރުން ކުދި ރަށެއް ބޮޑު ރަށެއް ބެލުމެއް ނެތި އެތައް މަޝްރޫއެއް އެބަ ހިންގައެވެ. އެހެންކަމުން ގިނަ އަދަދެއްގެ ވަޒީފާތައް މިމަސްރޫއުތަކާއި ގުޅިގެން ވަނީ އުފެދިފައެވެ. 

އަދި އެކި ޕާޓީތައް ރޫޅި, އެކި ފިކުރުތައް މަސްހުނިވެ, އޮޅުންބޮޅުން އަރައި ރައްޔިތުން ތިބީ ހަމައެކަނި މީހަކު ވެރިކަމުން ބޭލުން ނުވަތަ ވަކި މީހަކަށް ވެރިކަން ހޯދައިދިނުމަށްވުރެ ފުޅާ ވިސްނުމަކަށް ބޭނުންވެފައެވެ. މިމަންޒަރު މިހާރު ފެންނަންނެތުމުގެ ނަތީޖާއަކީ ކުރީގެ ފިކުރުތައް ގެއްލި ވަކި މީހަކަށް ކުރާ ތާއީދު މާޒީވެ މުޅިން އާ ފިކުރުތަކެއް ކުރިއަށް އޮތްތަނުގައި އުފަންވެގެން ދިއުމެވެ