Dubai in genai Ventilator Mingandah fethey kamah Healthin Bunefi

ދުބާއީގެ އެގްޒެކިއުޓިވް ޖެނެރަލް ޓްރޭޑިންގ އިން ފަހުން ފޮނުވި 10 ވެންޓިލޭޓަރު ރަނގަޅު ކަމަށާއި މިންގަނޑުތަކަށް ފެތޭ ކަމަށް ހެލްތު މިނިސްޓްރީން ބުނެފިއެވެ.

އެގްޒެކިއުޓިވް ޖެނެރަލްއާ ހަވާލުކުރި 75 ވެންޓިލޭޓަރުގެ ތެރެއިން 10 ވެންޓިލޭޓަރު މީގެ ކުރިން ވެސް އެ ކުންފުނިން ފޮނުވިއެވެ. ނަމަވެސް އެ ވެންޓިލޭޓަރުތައް މިންގަނޑުތަކަށް ނުފެތޭތީ ހެލްތު މިނިސްޓްރީން އެ ތަކެއްޗާ ހަވާލުވާން ވަނީ ދެކޮޅު ހަދާފައެވެ.

advertisement

ހެލްތު މިނިސްޓްރީން ބުނީ ބާކީ ހުރި ވެންޓިލޭޓަރުތައް ގެނައުމާ ބެހޭ ގޮތުން ވެސް އެ ކުންފުންޏާ އެކު މަޝްވަރާކުރަމުން އަންނަ ކަމަށެވެ.

ވެންޓިލޭޓަރުތައް ގެނައުމަށް އެގްޒެކިއުޓިވްއާ ހަވާލުކުރީ 34 މިލިއަން ރުފިޔާއަށެވެ. އޭގެ ތެރެއިން 90 ޕަސެންޓް އެޑްވާންސްކޮށް އެ ކުންފުންޏަށް ދީފައިވާ އިރު އެއްބަސްވުމާ އެއްގޮތަށް އެ ކުންފުނިން އަމަލުކޮށްފައެއް ނުވެއެވެ. ވެންޓިލޭޓަރުތައް ގެނައުމަށް އެ ކުންފުންޏާ ހަވާލުކުރުމުގައި ކޮރަޕްޝަނަށް މަގުފަހިވާ ކަންތައްތަކެއް އޮޑިޓް އޮފީހުން ހެދި ކޮމްޕްލަޔަންސް އޮޑިޓްގައި ފާހަގަކޮށްފައި ވެއެވެ. އެ މައްސަލަ މަޖިލީހުގެ އިތުރުން އޭސީސީން ވެސް ގެންދަނީ ބަލަމުންނެވެ.

ދުބާއީގެ އެ ކުންފުނި ކަނޑައެޅީ ޑަބްލިޔުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީން ތަކުރާރުކޮށް ބުނަމުން އަންނަ އިރު އޮޑިޓް ރިޕޯޓްގައި ބުނެފައި ވަނީ ރަސްމީ އެއްވެސް ސިފައެއްގައި ޑަބްލިޔުއެޗްއޯ އިން ލަފާ ދީފައި ނުވާ ކަމަށެވެ.

މި މައްސަލައާ ގުޅިގެން ބިޑް ކޮމިޓީގެ މެންބަރުން ސަސްޕެންޑްކޮށްފައިވާ އިރު ހެލްތު މިނިސްޓަރު އަބްދުﷲ އަމީން ވެސް ހުންނެވީ އަމިއްލަފުޅަށް މަސައްކަތުން އެކަހެރިވެވަޑައިގެންނެވެ. އެއްބަސްވުމާ އެއްގޮތަށް ވެންޓިލޭޓަރުތައް ނުގެނެވި ގިނަ ދުވަސްތަކެއް ވަމުން ދިޔަ ނަމަވެސް މިނިސްޓަރު އަމީން އެންމެ ފަހުން ވެސް ވިދާޅުވެފައި ވަނީ އެ ކަމުގައި ކޮރަޕްޝަނަށް މަގުފަހިވާ އެއްވެސް ކަމެއް ކުރައްވާފައި ނުވާ ކަމަށާއި ވެންޓިލޭޓަރުތައް ލިބޭނެ ކަމުގެ އުންމީދު ވެސް މިނިސްޓްރީން ކަނޑައިނުލާ ކަމަށެވެ. ކޮވިޑް 19ގައި ހާލު ބޮޑުވާ މީހުންނަށް ފަރުވާ ދިނުމަށް ވެންޓިލޭޓަރު ހޯދުމަށް ހެލްތު މިނިސްޓްރީގެ ފަރާތުން ގިނަ ކުންފުނިތަކަކާ ހަވާލުކޮށްފައިވެއެވެ.