VIAge Air Traffic Movement Ithuruvaan Fashaifi

އޯގަސްޓްމަހު ވެލާނަ އިންޓަރނޭޝަނަލް އެއަރޕޯޓަށް ޖެއްސި ފްލައިޓްތަކާއި ފުރި ފްލައިޓްތަކުގެ އަދަދު އިތުރުވެއްޖެއެވެ.
އެމްއޭސީއެލްއިން އާއްމުކޮށްފައިވާ ތަފާސް ހިސާބުތައް ދައްކާގޮތުން ޖުލައިމަހާއި އަޅާބަލާއިރު އޯގަސްޓްމަހު ވީއައިއޭގެ އިންޓަރނޭޝަނަލް އަދި ޑޮމެސްޓިކް އެއަރ ޓްރެފިކް މޫވްމަންޓް ވަނީ ބޮޑުތަނުން އިތުރުވެފައެވެ. ޖުލައިމަހުގެ 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލުމާއިއެކު އެމަހުގެ ތެރޭގައި އިންޓަނޭޝަނަލް އެއަރ ޓްރެފިކް މޫމަންޓްސް އުޅުނީ 196 ގައެވެ. ނަމަވެސް ނިމިދިޔަ އޮގަސްޓް މަހުގެ ތެރޭގައި މިއަދަދު ވަނީ 432 އަށް އިތުރުވެފައެވެ. އަދި ޑޮމެސްޓިކް އެއަރޓްރެފިކް މޫވްމަންޓު ޖުލައިމަހު 191 ގައި އުޅުނުއިރު އޮގަސްޓް މަހު ވަނީ 326 އަށް އިތުރުވެފައެވެ.

ފްލައިޓްތަކުގެ އަދަދު އިތުރުވެފައިވާއިރު ޖުލައި މަހު ބޯޑަރު ހުޅުވާލިފަހުން ވެލާނާ އިންޓަރނޭޝަނަލް އެއަރޕޯޓުން ފުރި މީހުންގެ އަދަދުވެސް ވަނީ އިތުރުވެފައެވެ. އެގޮތުން ޖުލައިމަހު ރާއްޖެއިން ފުރި އިންޓަރނޭޝަނަލް ޑިޕާޗާޒްގެ އަދަދަކީ 4106 އެވެ. އަދި އޯގަސްޓްމަހު މި އަދަދު ވަނީ 14045 އަށް އިތުރުވެފައެވެ. މީގެއިތުރުން ޖުލައިމަހު އެތެރޭގެ އުދުހުންތަކުގެ ޑިޕާޗާޒްގެ އަދަދަކީ 2555 ގައެވެ. އަދި އޯގަސްޓްމަހު މި އަދަދު ވަނީ 3438 އަށް އިތުރުވެފައެވެ.

ކޯވިޑް-19ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ބޯޑަރު ހުޅުވާލާފައިވަނީ ޖުލައިމަހުގެ 15 ވަނަ ދުވަހުއެވެ. ޖުލައި އަދި އޮގަސްޓް މަހުގެ ތެރޭގައި ރާއްޖެއަށް ވަނީ 9329 ފަތުރުވެރިން ޒިޔާރަތްކޮށްފައެވެ.

advertisement