Income support allowance gothuga 59.1 million ruffiya sarukaarun dhookohfi

މިމަހުގެ 3 ވަނަ ދުވަހުގެ ނިޔަލަށް އިންކަމް ސަޕޯޓް އެލަވަންސްގެ ގޮތުގައި 59.1 މިލިއަން ރުފިޔާ ދޫކޮށްފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.

އިންކަމް ސަޕޯޓް އެލަވަންސްއަކީ ކޯވިޑް-19އާ ގުޅިގެން ޢާމްދަނީއަށް ނުރަނގަޅު އަސަރެއް ކޮށްފައިވާ މީހުންނަށް، އެހީތެރިވުމުގެ ގޮތުން ސަރުކާރުގެ ފަރާތުން ފޯރުކޮށްދޭ ޚާއްޞަ ޢިނާޔަތެކެވެ.

ފިނޭންސް މިނިސްޓްރީން އެންމެފަހުން އާންމުކޮށްފައިވާ ތަފާސް ހިސާބުތައް ދައްކާގޮތުން ސެޕްޓެމްބަރ މަހުގެ 3 ވަނަ ދުވަހުގެ ނިޔަލަށް 14105 މީހުން އިންކަމް ސަޕޯޓް އެލަވަންސްއަށް އެދި ވަނީ ހުށައަޅާފައެވެ. އިންކަމް ސަޕޯޓް އެލަވަންސްއަށް އެދި ހުށައަޅާފައިވާ މީހުންގެ ތެރެއިން 6388 މީހަކަށް އެލަވަންސް ވަނީ ދޫކޮށްފައެވެ. މިއީ ޖުމްލަ 59.1 މިލިއަން ރުފިޔާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.

އިންކަމް ސަޕޯޓު އެލަވަންސް ގިނަ ބަޔަކަށް ދެވޭ ގޮތަށް އެ އެލަވަންސް ދިނުމާއި ގުޅޭ އުސޫލަށް ސަރުކާރުން މިހާރު ވަނީ ބަދަލުވެސް ގެނެސްފައެވެ. ކުރިން އިންކަމް ސަޕޯޓް އެލަވަންސްއަށް އެދި ހުށައެޅެނީ މިއަހަރގެ މާރޗް މަހުން ފެށިގެން ވަޒީފާއަށް ނޭދެވޭ އަސަރުކޮށްފައިވާ މީހުންނަށެވެ. ނަމަވެސް ފަހުން ގެނައި ބަދަލާއިއެކު 1 ޑިސެންބަރު 2019 ގެ ފަހުން އާމްދަނީއަށް ނުރަނގަޅު އަސަރުކޮށްފައިވާ ފަރާތްތަކަށް އިންކަމް ސަޕޯޓު އެލަވަންސްއަށް އެދި ހުށައެޅޭނެކަމަށް ސަރުކާރުން ވިދާޅުވެއެވެ.

advertisement