ސައިކަލް ބުރުގެ ތެރެއިން ހައްޔަރުކުރި މީހުން ޖޫރިމަނާކޮށް ދޫކޮށްލައިފި

ސަރުކާރާ ދެކޮޅަށް އިއްޔެ ބޭއްވި ސައިކަލް ބުރުގެ ތެރެއިން ހަޔަރުކުރި މީހުން ޖޫރިމަނާކޮށް އެކަކު ފިޔަވައި އެހެން އެންމެން ފުލުހުންގެ ބަންދުން ދޫކޮށްލައިފިއެވެ.

ފުލުހުން ބުނީ އެކަކު ފިޔަވައި އެހެން މީހުން ދޫކޮށްލާފައިވާ ކަމަށާއި ސިއްހީ ކުއްލި ނުރައްކަލުގެ ހާލަތު އިއުލާނުކޮށްފައިވާ މި ދަނޑިވަޅުގައި ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންގުންތަކާ ހިލާފުވުމުން ކޮންމެ މީހަކު 1،000ރ. އިން ޖޫރިމަނާކޮށްފައިވާ ކަމަށެވެ. އިއްޔެގެ ހަރަކާތުގެ ތެރެއިން 41 މީހަކު ހައްޔަރުކޮށްފައި ވެއެވެ.

advertisement

ފުލުހުން ބުނީ ބަންދުގައި މިހާރު ހުރީ ފުލުހުންނަށް އިންޒާރު ދިންކަމުގެ ތުހުމަތުގައި ހުރި މީހެއް ކަމަށެވެ.

އިދިކޮޅު ޕީޕީއެމް އާއި ޕީއެންސީން އިންތިޒާމުކޮށްގެން މީގެ ކުރިން ބޭއްވި ސައިކަލް ބުރުގައި ބައިވެރިވި ބައެއް ފަރާތްތައް ވެސް ފުލުހަށް ހާޒިރުކޮށް ޖޫރިމަނާކޮށްފައި ވެއެވެ. އަދި އިލެކްޝަންސް ކޮމިޝަނުން ވަނީ އެ ދެ ޕާޓީ 75،000ރ. އިން ޖޫރިމަނާކޮށްފައެވެ. ނަމަވެސް އިއްޔެ ބޭއްވި ސައިކަލް ބުރަކީ އެ ފަރާތްތަކުން އިންތިޒާމުކުރި ސައިކަލް ބުރެއް ނޫން ކަމަށް އެ ފަރާތްތަކުން ވަނީ ބުނެފައެވެ.

އިއްޔެގެ ހަރަކާތުގެ ކުރީ ސަފުން ވެސް އިދިކޮޅު ފަރާތްތައް ފެނިފައިވާ އިރު ކުރިއަށް އޮތްތަނުގައި ބާއްވާ މިފަދަ ހަރަކާތްތަކުގައި ވެސް ބައިވެރިވާނެ ކަމަށް ޕީޕީއެމްގެ ނައިބު ރައީސް އަހްމަދު ޝިޔާމް ވިދާޅުވެފައި ވެއެވެ. އަދި އެ ހަރަކާތަކީ ސުލްހަވެރި ހަރަކާތެއް ކަމާއި އެޗްޕީއޭގެ ގައިޑްލައިންތަކާ އެއްގޮތަށް ބޭއްވި ހަރަކާތެއް ކަމަށެވެ. ނަމަވެސް އެޗްޕީއޭގެ ގައިޑްލައިންގައިވާ ގޮތުން އެއް ބަޔަކު އެއްތަނަކަށް އެއްވެ ހަރަކާތް ހިންގުމަކީ މަނާ ކަމެކެވެ.