ސަސްގެ ކޯޗާއި އެސިސްޓަންޓް ކޯޗު ހަމަޖައްސައިފި

ފުރަތަމަ ޑިވިޝަނުގައި މިއަހަރު އަލަށް ވާދަކުރާ ކްލަބް ސުޕަ ޔުނައިޓެޑް ސްޕޯޓްސް (ސަސް)ގެ ކޯޗާއި އެސިސްޓަންޓް ކޯޗު އައްޔަންކޮށްފިއެވެ.

ސަސްގެ ކޯޗަކަށް އައްޔަންކޮށްފައިވަނީ އަހުމަދު ނާޝިދު (ނާދު) އެވެ. އަދި އެސިސްޓަންޓް ކޯޗަކަށް ހަމަޖައްސާފައިވަނީ ފަރީދު މުހައްމަދު (ފަރިއްޓެ) އެވެ.

advertisement

ނާޝިދުއަކީ ފުރަތަމަ ޑިވިޝަނާއި ގައުމީ ޓީމުތަކުގައިވެސް މަސައްކަތްކޮށްފައިވާ ތަޖުރިބާކާރު ކޯޗެކެވެ. ސަސްއިން ކޯޗެއްގެ ގޮތުގައ ނާޝިދު ގެނައީ އެއް އަހަރު ދުވަހުގެ އެއްބަސްވުމެއްގެ ދަށުންކަމަށް އެ ޓީމުން ބުނެއެވެ. އެސިސްޓަންޓް ކޯޗު ފަރީދު މުހައްމަދަކީ ޒުވާން ގައުމީ ޓީމުތަކާއި ފުރަތަމަ ޑިވިޝަނުގެ ބައެއް ކްލަބްތަކުގައި ކޯޗެއްގެ ގޮތުގައި މަސައްކަތްކޮށްފައިވާ މީހެކެވެ.

މިއީ ސަސްއިން ފުރަތަމަ ޑިވިޝަނުގައި ކުޅޭ ފުރަތަމަ އަހަރެވެ. އެހެންކަމުން ޓީމާއިމެދު ކުރެވޭ އުންމީދު ބޮޑެވެ. ސަސްއިން މަސައްކަތްކުރަމުންދަނީ ގަދަ ހައެއްގެ ތެރޭގައި ހިމެނޭ ވަރުގެ ސްކޮޑެއް އެކުލަވާލުމަށްކަމަށް އެ ޓީމުން ބުނެއެވެ. ޓީމުގެ ވިސްނުންހުރީ ފުރަތަމަ ޑިވިޝަނުގައި ކުޅެފައިވާ 10 ކުޅުންތެރިންގެ އިތުރުން ކީޕަރެއް ހިމެނޭ ގޮތަށް ބިދޭސީ ހަތަރު ކުޅުންތެރިން ގެންނައުމަށެވެ.

ސަސްއިން ކޯޗާއި އެސިސްޓަންޓް ކޯޗުގެ އިތުރުން ގޯލްކީޕަރު ޓްރެއިނަރަކުވެސް ވަނީ ޓީމަށް ނަގާފައެވެ. ގޯލްކީޕަރު ޓެރެއިނަރެއްގެ ގޮތުގައި އެ ޓީމަށް ނަގާފައިވަނީ ގައުމީ ޓީމާއި ފުރަތަމަ ޑިވިޝަނުގެ ކްލަބްތަކުގައި ގިނަ ދުވަސްތަކެއް ވަންދެން މަސައްކަތްކުރި ހަސަން ހަމީދުއެވެ.