August mahu import, export adhi dhaulathah libunu aamdhany dhahvejje

އޮގަސްޓް މަހުގެ ތެރޭގައި އިންޕޯޓް، އެކްސްޕޯޓް އަދި އިންޕޯޓް އެކްސްޕޯޓުން ދައުލަތައް ލިބުނު އާމްދަނީވެސް ދަށްވެއްޖެއެވެ. 

ކަސްޓަމްސްގެ ތަފާސްހިސާބުތަކަށް ބަލާއިރު، މިދިޔަ އަހަރުގެ އޮގަސްޓްމަހު 3.3 ބިލިއަން ރުފިޔާގެ މުދާ ވަނީ ރާއްޖެއަށް އިމްޕޯޓްކޮށްފައެވެ. މިއަހަރުގެ އޮގަސްޓް މަހު ދިވެހިރާއްޖެއަށް އިމްޕޯޓްކޮށްފައި ވަނީ 2.1 ބިލިއަން ރުފިޔާގެ މުދަލެވެ. އެހެންކަމުން މިއީ 35 އިންސައްތައިގެ ދަށްވުމެކެވެ.

އެކްސްޕޯޓަށް ބަލާއިރު މިދިޔަ އަހަރުގެ އޮގަސްޓް މަހާއި އާޅާބަލާއިރު މިއަހަރުގެ އޮގަސްޓް މަހު ރާއްޖެއިން އެކްސްޕޯޓްކުރި މުދަލުގެ އަދަދު ވަނީ 2 އިންސައްތަ ދަށްވެފައެވެ. މިދިޔަ އަހަރުގެ އޮގަސްޓްމަހު 256 މިލިއަން ރުފިޔާގެ މުދާ އެކްސްޕޯޓްކޮށްފައިވާއިރު، ނިމުނު އޮގަސްޓްމަހު އެކްސްޕޯޓްކޮށްފައި ވަނީ 251 މިލިއަން ރުފިޔާގެ މުދަލެވެ.

advertisement

އިންޕޯޓް އެކްސްޕޯޓް ދަށްވެފައިވާއިރު ދައުލަތައް ލިބުނު އާމްދަނީވެސް ވަނީ ދަށްވެފައެވެ. މިދިޔަ އަހަރުގެ އޮގަސްޓް މަހާއި އަޅާބަލާއިރު މިއަހަރުގެ އޮގަސްޓް މަހު އިންޕޯޓް އެކްސްޕޯޓުން ދައުލަތައް ލިބުނު އާމްދަނީ ވަނީ 66 އިންސައްތަ ދަށްވެފައެވެ. 2019 ވަނަ އަހަރުގެ އޮގަސްޓް މަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީއަކީ 297 މިލިއަން ރުފިޔާއެވެ. މިއަހަރުގެ އޮގަސްޓްމަހު މިއަދަދު ވަނީ 102 މިލިއަން ރުފިޔާއަށް ދަށްވެފައެވެ. 

ފާއިތުވި އޮގަސްޓްމަހު ރާއްޖެއަށް އެންމެ ގިނައިން މުދާ ގެނެސްފައިވާ 5 ޤައުމުގެ ތެރޭގައި ހިމެނެނީ ޗައިނާ، އިންޑިއާ، ސިންގަޕޫރު، އޮމާން،އަދި ޔޫއޭއީއެވެ. ރާއްޖެއިން އެންމެ ގިނައިން މުދާ ބޭރުކޮށްފައިވަނީ ތައިލޭންޑް، ޖަރުމަނުވިލާތް، އިނގިރޭސިވިލާތް،  ފަރަންސޭސިވިލާތް، އަދި އިޓަލީއަށެވެ.