ހުޅުމާލެ ބީޗު: ރަށު ބަންދުގައި ވެސް އެތައް ބަޔަކަށް ހިތްހަމަޖެހުން!

މީގެ ކުރިން އެ ސަރަހައްދު ފެންނަނީ ގޮނޑި ޖަހާ ފުރިފައި އޮތް ރެސްޓޯރެންޓެއް ނޫނީ ކެފޭއެއްގެ ސިފައިގައެވެ. ކޮފީއެއް ނުވަތަ ކޮންމެ ވެސް އެއްޗެއް ކާން ނޫނީ އެ ސަރަހައްދު އާންމު މީހަކަށް ޖާގައެއް ނުލިބެއެވެ. ހުސަތަންކޮޅެއް ނެތޭ ބުންޏަސް ދޮގަކަށް ނުވާނެއެވެ. ގޮނޑި އާއި މޭޒުތައް ޖަހަމުން ގޮސް ރާޅުޖަހާ ހިސާބަށް ވެސް ފޯރިއެވެ. ދުވަސްކޮޅަކަށް ދޫކޮށްލާފައި އޮތް ނަމަ މޫދުގައި ފްލޯޓިން މޭޒުތައް ވެސް ޖެހުން އެކަށީގެންވެއެވެ. ކުޑަކުއްޖަކު ގޮވައިގެން މޫދަށް އެރެލާނެ ޖާގައެއް ވެސް އެތާކު ނެތެވެ. 

ނަމަވެސް މިއަދު މަންޒަރު ތަފާތެވެ. ހެނދުނުން ފެށިގެން ހަވީރު އަދި ރޭގަނޑު ވެސް އެ ސަރަހައްދު ފެންނަނީ އުފާވެރިކޮށެވެ. ކުޑަކުދިން ކުޅޭ މަންޒަރާއި އާއިލާތައް އެކުގައި ގޮސް މަޖާކޮށް، މޫދަ އެރޭ މަންޒަރު ކޮންމެ ދިމާއަކުން ވެސް ފެނެއެވެ. ގޮނޑޮ ދޮށުގައި ބީހޭ ރާޅުތައް ފައިގައި ޖެހޭ ހިސާބުގައި ރޭގަނޑު އަތް ގުޅާލައިގެން ހިނގާލުމުގެ ފުރުސަތު ލޯބިވެރިންނަށް މިއަދު ވަނީ ތަނަވަސްވެފައެވެ.

advertisement

ހުޅުމާލޭ އިރުމަތީ ފަރާތު ރީތި ދޮންވެލި ގޮނޑުދޮށް މިއަދު ވެފައި ވަނީ އެތައް ބަޔަކަށް ހިތްހަމަޖެހުން ގެނެސްދޭ ސަރަހައްދަކަށެވެ. މީގެ ކުރިން ރެސްޓޯރެންޓްތަކުންނާއި ހޮޓާތަކާއި ކެފޭތަކުން ހިލޭ މިލްކެއް ކަމަށް ބަލައި، ވިޔަފާރީގެ އުސޫލުން ބޭނުންކުރި އެ ގޮނޑޮދޮށުގައި މިއަދު ކޮންމެ މީހަކަށް ވެސް މިނިވަން ކަމާ އެކު ތިބެލުމުގެ ފުރުސަތު ވަނީ ތަނަވަސްވެފައެވެ. ހުޅުމާލެ ބަލަހައްޓާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގެނައި ބަދަލާ އެކު ހުޅުމާލެ ގޮނޑުދޮށުގެ މަލަމަތި މިހާރު ވަނީ މުޅިން ބަދަލުވެފައެވެ. ހޮޓާތަކާއި ރެސްޓޯރެންޓްތަކަށް އެ ސަރަހައްދު ބޭނުންކުރުން މަނާކުރުމާ ގުޅިގެން ފުރަތަމަ ކޮޅުގައި އެ ވިޔަފާރި ކުރަމުން ދިޔަ ފަރާތްތަކުން ވަރަށް ގިނަ ޝަކުވާތައް ކުރިއެވެ. ނަމަވެސް އާންމުންގެ ހިތްތައް އެޗްޑީސީ އަށް ފަތަހަކުރެވުނެވެ. 

ބައެއް ވިޔަފާރިވެރިން ވެސް މިހާރު ދެކޭ ގޮތުގައި އެއީ ހެޔޮ ބަދަލެކެވެ. ބީޗް ސަރަހައްދު ވިޔަފާރި އުސޫލުން ވަކި ބަޔަކަށް ބޭނުންކުރެވޭ ގޮތަށް އޮތުމަކީ ހުޅުމާލޭގެ ވަކި ވިޔަފާރިތަކަކަށް ހިލޭ ދެވޭ ހާއްސަ ފުރުސަތެއް ކަމަށް ބައެއް ވިޔަފާރިވެރިން ދެކެއެވެ. 

ހުޅުމާލޭގައި ފުޅާދާއިރާއެއްގައި ގެސްޓް ހައުސް އާއި ކެފޭގެ ވިޔަފާރިކުރާ ފަރާތަކުން ބުނީ ވަކި ބަޔަކަށް ބީޗް ހިލޭ ދިނުމަކީ އިންސާފު ނޫން ކަމަށެވެ. އަދި އާންމުންނަށް ނުވަތަ ހުޅުމާލެ އެތެރޭގައި ހުރި ވިޔަފާރިތަކަށް ބޭނުން ނުކުރެވޭ ގޮތަށް އޮތުމަކީ ހަމަޖެހޭ އުސޫލެއް ނޫން ކަމަށް އޭނާ ބުންޏެވެ. މިހާރު އޮތް ގޮތުން އެ ސަރަހައްދު ހުރިހާ ފަރާތްތަކަށް ވެސް ބޭނުންކުރެވޭ ކަމަށާއި އާންމުންނަށް ވެސް ބޭނުންކުރެވޭތީ މިހާރު ގެނައި ބަދަލު މާ ރަނގަޅު ކަމަށް އޭނާ ދެކެއެވެ. 

މުސްތަގުބަލުގައި ވެސް އެފަދަ ބަދަލެއް ގެންނަ ނަމަ ގެންނަންޖެހޭނީ ހަމަހަމަ އުސޫލެއްގެ ދަށުން ހުރިހާ ފަރާތްތަކަށް ވެސް ފުރުސަތު އޮންނަ ގޮތަށް ކަމާއި ވަކި ބަޔަކަށް ހިލޭ ދިނުމުގެ ބަދަލުގައި އާންމު ރައްޔިތު މީހާ އަށް ކޮންމެ އިރަކު ވެސް ބޭނުންކުރެވޭ އުސޫލަކުން ކަމަށް ވެސް އޭނާ ބުންޏެވެ. 

ހަގީގަތުގައި ވެސް މިއީ ހެޔޮ ބަދަލެކެވެ. މުޅި ދުނިޔެ އާއި ރާއްޖޭގައި ވެސް ފެތުރެމުން ދާ ކޮވިޑް -19ގެ ބަލިމަޑުކަމުގައި ގޭތެރޭގައި ގިނަ ވަގުތު ތިބެންޖެހުމާއި ހާއްސަކޮށް މާލޭގައި ރަށު ބަންދުވެފައި ތިބެންޖެހިފައިވާ އިރު ހުޅުމާލެ ބީޗް ސަރަހައްދު ވެފައި ވަނީ ގިނަ ބަޔަކަށް ހިތްހަމަޖެހުން ގެނެސްދޭ ސަރަހައްދަކަށެވެ. ރަށުން ބޭރަށް ހިތްހަމަޖައްސާލަން ނުދެވޭ އެތައް އާއިލާތަކެއް މާލެ އިންނާއި ހުޅުމާލެ އިން ވެސް ޕިކްނިކް ހެދުމަށް މިހާރު ދަނީ ބީޗަށެވެ. އަދި ހަވީރު ގަޑީގައި އެކުގައި ސައިބޯލައި ކުޑަކުދިން ގޮވައިގެން މޫދަށް އެރުން ފަދަ ކަންކަމަށް މިއަދު ހުޅުމާލެ ބީޗްގައި ހުރަހެއް ނެތެވެ. އެ ސަރަހައްދުގައި ބަހައްޓާފައި ހުރި ގޮނޑިތަކުގައި ކިތަންމެ އިރަކު އިށީނދެގެން ތިއްބަސް މިއަދު ބިލު ހިފައިގެން އިރިއިރުކޮޅާ ވޭޓަރެއް ނާދެއެވެ. ނުވަތަ އިށީނުން މަނަލެއް ނޫނެވެ. ތިމާއަށް ކަމުދާ ތަނަކުން ކާއެއްޗެހި ގަނެގެން ގޮސް ބީޗްގައި ތިބެންވީއެވެ. ވަކި ތަނެއްގައި ތިބެން ވަކި ރެސްޓޯރެންޓަކުން ނުވަތަ ވަކި ކެފޭއަކުން އެއްޗެހި ގަންނާކަށް މިހާރު ނުޖެހެއެވެ. އެޗްޑީސީންގެ ގެނައި މި ބަދަލުގެ ސަބަބުން ބައެއް ވިޔަފާރިވެރިން ދެ ބުމަ ގޮއްޖަހައިގެން ތިއްބަސް މިއީ އާންމު ރައްޔިތުންގެ ލާބައަށްޓަކައި އެ ކޯޕަރޭޝަނުން އެޅި ރަނގަޅު ފިޔަވަޅެކެވެ. ގިނަ ބަޔަކަށް މިކަން ކަމު ހިނގައްޖެއެވެ.