މިއަހަރުގެ ޑަބްލިއުޓީއެމް ފެއަރ އޮންނާނީ ވަރޗުއަލްކޮށް

ވޯލްޑް ޓްރެވަލް މާކެޓް، ޑަބްލިޔުޓީއެމް ފެއަރ މިއަހަރު ވަރޗުއަލްކޮށް ބޭއްވުމަށް ހަމަޖައްސައިފިއެވެ.

ޑަބްލިއުޓީއެމް ފެއަރއަކީ ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުން ބައިވެރިވާ އެންމެ ބޮޑު އެއް ފެއަރއެވެ.  

ފެއަރ އިންތިޒާމްކުރާ އިނގިރޭސިވިލާތުގެ ރީޑް އެގްޒިބިޝަންއިން ބުނީ މިއަހަރުގެ ޑަބްލިޔުޓީއެމް ފެއަރ ކުރިއަށްދާނީ ނޮވެމްބަރުމަހުގެ 9 ވަނަ ދުވަހުން 11 ވަނަ ދުވަހުގެ ނިޔަލަށްކަމަށެވެ. ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ބައިވެރިވުމުގެ ފުރުޞަތު ކޮންމެ ދުވަހަކު ހެނދުނު 7:00 އިން ރޭގަނޑު 10:00 އަށް އޮންނާނެއެވެ.

advertisement

މިއަހަރުގެ ފެއަރ ވަރޗުއަލްކޮށް ބޭއްވިނަމަވެސް ލައިވް ކޮންފަރެންސް ސެޝަންސްއާއި ފޯރަމްތައް ބާއްވާނެއެވެ. އަދި ސިނާއަތުގައި ހަރަކާތްތެރިވާ ފަރާތްތަކަށް ކުރިމަތިވަމުންދާ މައްސަލަތަކާ ގުޅޭގޮތުން މަޝްވަރާކުރާނެއެވެ. މީގެއިތުރުންވެސް ފަތުރުވެރިކަމުގެ ސިނާއަތަށް ލިބިފައިވާ ގެއްލުމުން އަރައިގަތުމަށް މަގުޗާޓެއް އެކުލަވާލުމުގެ މަސައްކަތްކުރާނެކަމަށް ފެއަރ އިންތިޒާމްކުރާ ފަރާތުން މައުލޫމާތުދެއެވެ.
ޑަބްލިއުޓީއެމް ފެއަރއަކީ ރާއްޖޭގެ ފަތުރުވެރިކަމުގައި މުހިންމު ފެއަރއެކެވެ. މި ފެއަރގައި ކޮންމެ އަހަރަކުވެސް ރާއްޖެއިން ބައިވެރިވެ އަންނަނީ ރާއްޖެ އިޝްތިހާރުކުރުމުގެ މަސައްކަތް ކުރަމުންނެވެ.
ޑަބްލިޔުޓީއެމް ފެއަރ ބާއްވާތާ 40 އަހަރު ވެފައިވާއިރު މިއީ މި ފެއަރ ވަރޗުއަލްކޮށް ބާއްވާ ފުރަތަމަ ފަހަރެވެ. މިއަހަރުގެ ފަތުރުވެރިކަމުގެ ގިނަ ފެއަރތަކެއް ކޯވިޑް19 އާއި ގުޅިގެން ބާއްވާފައިވަނީ ވަރޗުއަލްކޮށްނެވެ.