ޝިފިން އެޖެންސީގެ ގަވާއިދަށް ބަދަލު ގެނައުމަށްފަހު އަލުން އިއުލާން ކުރާނަން – ޓްރާންޕޯޓް މިނިސްޓްރީ

ދިވެހިރާއްޖޭގެ ޝިޕިން އެޖެންސީގެ ޙިދުމަތްދިނުމާއިބެހޭ ޤަވައިދަށް ބަދަލުތައް ގެނައުމަށްފަހު އަލުން އިޢުލާންކުރާނެކަމަށް ޓްރާންސްޕޯޓް މިނިސްޓްރީން ވިދާޅުވެއްޖެއެވެ.  

މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ޝިޕިން އެޖެންސީގެ ޙިދުމަތްދިނުމުގެ ޤަވައިދު ގެޒެޓްކޮށްފައިވަނީ ޖުލައިމަހުގެ 15 ވަނަ ދުވަހުއެވެ. ނަމަވެސް ދާއިރާގެ ފަރާތްތަކުގެ ބައެއް ކަންބޮޑުވުންތަކުގެ ސަބަބުންކަމަށްބުނެ މި ޤަވައިދު އެ މިނިސްޓްރީން މިހާރު ވަނީ އުވާލާފައެވެ.

advertisement

މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވިދާޅުވީ، ޤަވައިދު ގެޒެޓް ކުރުމާއި ގުޅިގެން ދާއިރާގައި މަސައްކަތްކުރާ ފަރާތްތަކުން ޤަވައިދުގައި މައްސަލަތަކެއް ހުރިކަން ފާހަގަކޮށް ވަނީ ކަންބޮޑުވުން ފާޅުކޮށްފައިކަމަށެވެ. އޭގެތެރޭގައި ދިވެހިރާއްޖޭގެ ޝިޕިން އެޖެންސީގެ ޙިދުމަތްދޭ ކުންފުނިތައް ރަޖިސްޓްރީކުރުމަށް ދީފައިވާ މުއްދަތު މޯލްޑިވްސް ޓްރާންސްޕޯޓް އޮޓޯރިޓީން 15 ސެޕްޓެމްބަރ ގެ ނިޔަލަށް އިތުރުކޮށްދީފައިވީނަމަވެސް އެ ޤަވައިދަށް އަމަލުކުރުމުގައި ދަތިތަކެއް ހުރިކަމަށާއި އެ ޤަވައިދު އެކުލަވާލާފައިވަނީ ކަމާގުޅުންހުރި ފަރާތްތަކާއިއެކު އެންމެ ފުރިހަމައަށް މަޝްވަރާކުރެއްވުމަކާއި ނުލައިކަން ރައްޔިތުންގެ މަޖިލީހުގެ އިޤްތިޟާދީ ކޮމިޓީންވެސް ފާހަގަކޮށްފައިވާކަމަށެވެ.

ރާއްޖެގައި ޙިދުމަތްދެމުންދާ ބޭރުގެ ބޮޑެތި ޝިޕިންލައިންތަކުންވެސް މިޤަވައިދުގައި ކަންބޮޑުވުންތަކެއް ހުރިކަން ވަނީ ފާހަގަކޮށްފައިކަމަށް ޓްރާންސްޕޯޓް މިނިސްޓްރީން ވިދާޅުވެއެވެ. އެހެންކަމުން މި ޤަވައިދު ބަދަލުތަކާއިއެކު އަލުން އިޢުލާންކުރާނެކަމަށް އެ މިނިސްޓްރީން ވަނީ ވިދާޅުވެފައެވެ.

ޝިޕިން އެޖެންސީތަކުން ހިދުމަތް ދިނުމުގެ ނަމުގައި ހަދާފައިވާ ގަވައިދުގައި ބުނެފައިވަނީ އޮގަސްޓް 16 ގެ ފަހުން ރާއްޖޭގައި ރަޖިސްޓްރީ ނުކޮށް އެ ހިދުމަތް ދިނުމަކީ މަނާކަމެއްކަމަށެވެ. ނަމަވެސް ފަހުން މި ރަޖިސްޓްރީވާން އޯގަސްޓް 16 ވަނަ ދުވަހަށް އިތުރު މުހުލަތެއް ވަނީ މިނިސްޓްރީން ދީފައެވެ.

ޝިޕިން އެޖެންސީގެ ޙިދުމަތްދޭ ފަރާތްތަކުން އެކި ނަންނަމުގައި ފީތައް ނަގަމުންއަންނަކަމަށް ވިޔަފާރިވެރިން ވަނީ ބުނެފައެވެ. މި ޤަވައިދުގެ ސަބަބުން ތަފާތު އެކި ނަންނަމުގައި ބޭރުގެ އެޖެންސީތަކުން ފީ ނެގުން ހުއްޓޭނެކަމަށް ބައެއް ފަރާތްތަކުން އެއިރު ވަނީ ބުނެފައެވެ.