2021 ވަނަ އަހަރު ފަށާއިރު ދާއިރާގެ މީހުންގެ މޫނުމަތިން އުވާފެރިކަން ފެންނާނެ – ޓޫރިޒަމް މިނިސްޓަރ

2021 ވަނަ އަހަރު ވެގެންދާނީ ފަތުރުވެރިކަމުގައި ކާމިޔާބު އަހަރަކަށްކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ. 

އެމްވީ ޕްލަސްއަށް ދެއްވި ޙާއްސަ އިންޓަވިއުއެއްގައި ޓޫރިޒަމް މިނިސްޓަރ ވިދާޅުވީ، 2021 ވަނަ އަހަރަށް މަރުހަބާ ކިޔާއިރު ރާއްޖޭގެ ފަތުރުވެރިކަން އަލުން އިއާދަވުމުގެ ކޮޅުމަތި ފެންނަން ފަށާނެކަމަށެވެ. 2021 ވަނަ އަހަރު އިރާދަކުރެއްވިއްޔާ އަނެއްކާވެސް ވާނީ ރާއްޖޭގެ ފަތުރުވެރިކަމުގައި ކާމިޔާބު އަހަރަކަށްކަން ފާހަގަކުރައްވައި މިނިސްޓަރ ވިދާޅުވީ، އަހަރު ފަށާއިރު ފަތުރުވެރިކަމުގެ ދާއިރާގައި މަސައްކަތްކުރާ މީހުންގެ މޫނުމަތިން އުފާވެރިކަން ފެނިގެންދާނެކަމަށެވެ. 

advertisement

މިނިސްޓަރ ވިދާޅުވީ 1 މިލިއަން ފަތުރުވެރިން އަންނަ އަހަރު ރާއްޖެ ގެނައުމަށް އަމާޒުހިފާފައިވާކަމަށެވެ. ނަމަވެސް ފަތުރުވެރިންގެ ނަންބަރަށްވުރެ ބޮޑަށް އިސްކަންދެއްވާނީ ފަތުރުވެރިކަމުން ރާއްޖެއަށް ލިބޭ މަންފާ އިތުރުކުރުމަށްކަމަށް މިނިސްޓަރ ވިދާޅުވިއެވެ.

“އަޅުގަނޑުމެން އިރާދަކުރެއްވިއްޔާ ސެލެބްރޭޓިންގ މޫޑެއްގައި 2021 އަށް މަރުހަބާ ކިޔާނީ. އެއިރު ރިކަވަރީ ފަށާފައި ހުންނާނީ. އިންޑަސްޓްރީ ޕާޓްނަރުންނާއި މުވައްޒަފުންގެ މޫނުން ހިނިތުންވުމުގެ އަސަރު ފެންނަން ފަށާފައި ހުންނާނީ. 2021 ވަނަ އަހަރު އިރާދަކުރެއްވިއްޔާ ހަމަ ފަތުރުވެރިކަމުގައި ކާމިޔާބު އަހަރަކަށް ބަދަލުވެގެންދާނެ. ޓޫރިސްޓް ނަންބަރުން ވެއްޖެއްޔާ 1 މިލިއަން. އެކަމަކު އަޅުގަނޑުމެން ވާހަކަދައްކަމުން މިދަނީ ނަންބަރަކުންނެއްނޫން ޓޫރިޒަމްގެ ރެވެނިއުއިން. މުވައްޒަފުންނަށް ލިބޭ ޓިޕްސްއިން، މުވައްޒަފުންނަށް ލިބޭ ސަރވިސް ޗާޖުން. ޓޫރިޒަމް މިނިސްޓަރ ވިދާޅުވިއެވެ.

ރާއްޖެ ޕްރޮމޯޓްކުރުމުގައި މިވަގުރު އެންމެ މުހިންމު އިސްކަމެއްދީގެން ކުރައްވަމުންގެންދަވާ ކަމަކީ ސަލާމަތާއި ރައްކާތެރިކަމުގެ ގޮތުން އަޅާފައިވާ ފިޔަވަޅުތަކުގެ މައުލޫމާތު ފަތުރުވެރިންނާއި، ޓްރެވެލް އެޖެންޓުންނާއި، ބޭރުގެ މީޑިއާތަކަށް ބުނެދިނުންކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ގެސްޓްހައުސް ޕްރޮމޯޓްކުރުމަށް އަންނަ އަހަރު ޙާއްސަ އިސްކަމެއްދީގެން މަސައްކަތް ކުރައްވާނެކަމަށެވެ. ގެސްޓްހައުސްތައް އަންނަ މަހުގެ 15 ވަނަ ދުވަހު ހުޅުވުމަށް ތައްޔާރުވަމުންއަންނައިރު އެފަރާތްތަކަށް އެހީތެރިވެދެވޭނެގޮތްތައް މިނިސްޓްރީން ބަލަމުންއަންނަކަމަށެވެ. ގެސްޓްހައުސްތައް ހުޅުވާއިރު ހުރިހައި ގެސްޓްހައުސްތައް ހިންގާނީ ފައިދާގައި ނޫންކަން ފާހަގަކުރައްވައި މިނިސްޓަރ ވިދާޅުވީ، ގެއްލުމުގައި ހިންގަންވެސް ގެސްޓްހައުސްތައް ފަށަން ބޭނުންވާތީ އުފާވާކަމަށެވެ.

“އަޅުގަނޑު އުންމީދުކުރަނީ މުސްތަޤްބަލުގައި ރާއްޖޭގެ ރިޒާވް ވަރަށް ވަރުގަދަވެފައި މިހެން އަންނަ އިޤްތިޟާދީ ލޮޅުންތަކުގައި ހިތްހަމަޖެހޭވަރަށް ރިލީފް ޕެކޭޖްތައް ދެވޭނެކަމަށް. މިހާރުދެން އަޅުގަނޑު އެބޭފުޅުންނަށް ޝުކުރު އަދާކުރަން ބޭނުންވޭ 15 އޮކްޓޯބަރގައި ހުޅުވާއިރުވެސް ހުރިހައި ގެސްޓްހައުސްތައް ހިންގާނީ އަދި ޕްރޮފިޓަކުނޫން. ގެއްލުމުގައި ހިންގަންވެސް އެމީހުން އެކަން ފަށަން ބޭނުންވާކަމީ އަޅުގަނޑުމެން ޝުކުރުވެރިވާކަމެއް.” މިނިސްޓަރ ވިދާޅުވިއެވެ.

ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުތަކާއިއެކު ވައިގ ދަތުރުތައް ފެށުމަށް މަޝްވަރާތައް ކުރައްވަމުން ގެންދަވާކަން މިނިސްޓަރ ވަނީ ފާހަގަކުރައްވާފައެވެ. ވެލާނާ އިންޓަނޭޝަނަލް އެއަރޕޯޓް ނޫނަސް ރާއްޖޭގެ އެހެން އެއަރޕޯޓަތަކަށްވެސް ދަތުރުކުރެވޭނެކަމުގެ މައުލޫމާތު އެފަރާތްތަކަށް ދެމުން އަންނަކަމަށް މިނިސްޓަރ ވިދާޅުވިއެވެ.