އަންނަ މަހުގެ ނިޔަލަށް %94 ރިސޯޓް ހުޅުވޭނެ – އެމްއެމްޕީއާރުސީ

އަންނަމަހުގެ ނިޔަލަށް ރާއްޖޭގެ 94 އިންސައްތަ ރިސޯޓް އަލުން ހުޅުވޭނެކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަންގެ އެމްޑީ ތޮއްޔިބު މުހައްމަދު ވިދާލުވެއްޖެއެވެ. 

ތޮއްޔިބު މިހެން ވިދާޅުވީ، އިނގިރޭސިވިލާތުގެ ގްލޯބްޓްރެންޑް މެގަޒިންއަށް މަޢުލޫމާތުދެއްވަމުންނެވެ. ތޮއްޔިބު ވިދާޅުވީ، ރާއްޖޭގައި އޮޕަރޭޓްކުރާ 156 ރިސޯޓްގެ ތެރެއިން 146 ރިސޯޓެއް އޮކްޓޫބަރުމަސް ނިމުމުގެ ކުރިން ހުޅުވޭނެކަމަށް އުންމީދުކުރައްވާކަމަށެވެ. 

advertisement

އެމްއެމްޕީއާރުސީއަކީ ރާއްޖޭގެ ފަތުރުވެރިކަން ޕްރޮމޯޓްކުރުމުގައި އެންމެ އިސްދއުރެއް އަދާކުރާ ކޯޕަރޭޝަނެވެ. ތޮއްޔިބު ވިދާޅުވީ، ޖުލައިމަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލިފަހުން ވަރަށް ގިނަ ރިސޯޓްތަކެއް ހުޅުވާފައިވާކަމަށެވެ. މިމަހުގެ ތެރޭގައިވެސް އިތުރު 29 ރިސޯޓެއް ޙިދުމަތައް އަލުން ނިކުންނާނެކަމަށެވެ.

ކޯވިޑް19 އަށްފަހު ރާއްޖޭގެ ފަތުރުވެރިކަން އަލުން ފަށާފައިވާއިރު ޓޫރިޒަމް މިނިސްޓްރީއާއި އެމްއެމްޕީޢާރުސީ ގުޅިގެން ރާއްޖޭގެ ފަތުރުވެރިކަން ޕްރޮމޯޓްކުރުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ސިއްހީގޮތުން ރާއްޖޭގައި އާޅާފައިވާ ރައްކާތެރިކަމުގެ ފިޔަވަޅުތައް ފަތުރުވެރިންނަށާއި ބޭރުގެ ފަރާތްތަކަށް އަންނަނީ ބުނެދެމުންނެވެ.