އިންޑިއާ އާއި ދިވެހިރާއްޖޭގެ މެދުގައި ގާއިމް ކުރެވޭ ކާގޯ ފެރީ ސާވިސް އިފްތިތާހްކޮށްފި

އިންޑިއާ އާއި ދިވެހިރާއްޖެ މެދުގައި ގާއިމް ކުރެވޭ ކާގޯ ފެރީ ސާވިސްގެ ފުރަތަމަ ދަތުރު އިފްތިތާހް ކޮށްދެއްވާނީ އިންޑިއާގެ ފަރާތުން މިނިސްޓަރ އޮފް ސްޓޭޓް ފޯ ޝިޕިން (އިންޑިޕެންޑެންޓް ޗާޖް)، ޝްރީ މަންސުޚް އެލް. މަންޑަވިޔާ އަދި ދިވެހި ސަރުކާރުގެ ފަރާތުން މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން، އައިޝަތު ނަހުލާ އެވެ. އިފްތިތާހް ކުރުމުގެ މި ރަސްމިއްޔާތު ބޭއްވުމަށް ހަމަޖެހިފައިވަނީ 21 ސެޕްޓެމްބަރ 2020 ގައި ވާޗުއަލް ކޮށެވެ. މި ރަސްމިއްޔާތުގައި ޓުޓިކުރިން އަދި ކޮޗިން ބަނދަރު ތަމްސީލް ކުރާ ފަރާތް ތަކުގެ އިތުރުން، މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އަދި ދިވެހި ފޮރިން މިނިސްޓްރީ ގެ އޮފިޝަލުން ބައިވެރިވެފައިވެ.

ޝިޕިން ކޯޕޮރޭޝަން އޮފް އިންޑިއާ (އެސް.ސީ.އައި) އޮޕަރޭޓް ކުރާ ކާގޯ ފެރީ އުޅަންދު އެމް.ސީ.ޕީ ލިންޒް އިންޑިއާގެ ޓުޓިކުރިން އަދި ކޮޗިންގެ ބަނދަރު ރާއްޖޭގެ ކުޅުދުއްފުށި އަދި މާލޭ ބަނދަރާ ގުޅުވައިދޭނެއެވެ. މި އުޅަންދު 26 ސެޕްޓެމްބަރ ގައި ކުޅުދުއްފުށީގައި އަދި 28 ސެޕްޓެމްބަރ ގައި މާލޭގައި ބަނދަރުކުރާނެކަމަށް ލަފާކުރެވެއެވެ. 380 ޓީ.އީ.ޔޫ އަދި 3000 މެޓްރިކް ޓަނުގެ ބަލްކް ކާގޯ ބަރުދަން އުފުލޭ އެމް.ސީ.ޕީ ލިންޒް ގެ ދަތުރުތަކުގެ ‘ޓާން އަރައުންޑް ޓައިމް’ އަކީ 10-12 ދުވަހެވެ. ރިފްރިޖަރޭޓް ކުރެވިފައި ހުންނަ ކޮންޓެއިނަރު އުފުލުމަށްޓަކާ މި އުޅަނދުގައި ރީފާ ޕްލަގްސް ހުންނާނެއެވެ. އަދި މި އުޅަނދުގެ ސަބަބުން އިންޑިއާ އާއި ދިވެހިރާއްޖޭގެ މެދުގައި ފުރަތަމަ ފަހަރަށް ސީދާ ކާގޯ ކަނެކްޓިވިޓީ ގާއިމް ވެގެންދާނެއެވެ. އަދި ދެގައުމުގެ ޓްރޭޑަރުންނާއި ވިޔަފާރިވެރިން ކުރަންޖެހޭ ޚަރަދު ކުޑަވެގެންދާނެއެވެ.

advertisement

ދެގައުމުގެ މެދުގައި ކާގޯ ފެރީ ސާވިސް ގާއިމް ކުރުމަށް އިންޑިއާގެ ކޮމިޓްމެންޓް ބޮޑު ވަޒީރު ނަރޭންދްރަ މޯދީ ފުރަތަމަ އިއުލާނުކުރެއްވީ ޖޫން 2019 ގައި އެމަނިކުފާނު ދިވެހިރާއްޖެއަށް ކުރެއްވި ރަސްމީ ދަތުރުފުޅުގައި ރައްޔިތުންގެ މަޖްލީހުގައި ވާހަކަފުޅު ދައްކަވަމުންނެވެ. ހަމަ މިދަތުރުފުޅުގައި މި މަޝްރޫއު އާއި ގުޅޭ އެމް.އޯ.ޔޫ ގައި އިންޑިއާގެ މިނިސްޓްރީ އޮފް ޝިޕިން އާއި ރާއްޖޭގެ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން ގެ ފަރާތުން ސޮއިކުރެވުނެވެ. އަދި މި މަޝްރޫއުގެ ޕްރިލިމިނަރީ ސްޓަޑީޒް ހެދުމަށް ޖުލައި 2019 ގައި އެސް.ސީ.އައި ގެ ޓީމެއް ރާއްޖެއަށް ފޮނުވުނެވެ. އޭގެ ފަހުން މިއަހަރުގެ ކުރީކޮޅުގައި އެފް.އައި.ސީ.ސީ.އައި ގެ ފަރާތުން ވަނީ ފީސިބިލިޓީ ސްޓަޑީ އެއް ވަނީ ހަދާފައެވެ. އަދި އޮގަސްޓް 13، 2020 ގައި ފޮރިން މިނިސްޓަރ ޝާހިދް އާއި އެކްސްޓާނަލް އެފެއާޒް މިނިސްޓަރ ޑރ. ޖެއިޝަންކަރު ގެ މެގުގައި ބޭއްވުނު ވާޗުއަލް ބައްދަލުވުމުގައި ކާގޯ ފެރީ ސާވިސް ފެށުމަށް ހަމަޖެހިފައިވާކަން އިއުލާނުކުރެވުނެވެ. މި ކާގޯ ފެރީ ސާވިސް ފެށިގެންއަންނަ އިރު، އިންޑިއާއިން މި ސާވިސް ސަބްސިޑައިޒްކޮށް 3 މިލިއަން ޑޮލަރު ޚަރަދު ކުރުމަށް ވަނީ ހަމަޖެހިފައެވެ.

އިންޑިއާ އާއި ދިވެހިރާއްޖޭގެ ދެމެދުގައި އެކި ގޮތްގޮތަށް ވިޔަފާރީގެ ގުޅުން ގާއިމް ވެފައި އޮންނަތާ އެތައް ގަރުނެއް ވެއްޖެއެވެ. ނަމަވެސް މިއަދު އިންޑިއާ އޮތީ ދިވެހިރާއްޖޭގެ ޓްރޭޑިން ޕާޓްނަރުންގެ ލިސްޓުގެ 4 ވަނައިގައެވެ. މި ކާގޯ ފެރީ ސާވިސް ގެ އަމާޒަކީ ދެގައުމުގެ މެދުގައިވާ ވިޔަފާރީގެ ގުޅުން ބަދަހިކޮށް ދެފަރާތަށް ދިމާވާ ލޮޖިސްޓިކްސް ގެ ދަތިތައް ފަސޭހަކުރުމެވެ. އަދި ހަނިމާދޫ އެއާޕޯޓް ތަރައްގީ ކުރެވި، (އިންޑިއާގެ ލައިން އޮފް ކްރެޑިޓް ފެސިލިޓީގެ ދަށުން) ކުޅުދުއްފުއްޓާއި އިންޑިއާއާއި ދެމެދު ކާގޯ ފެރީ ސާވިސް ގާއިމް ކުރެވުމުން ރާއްޖޭގެ އުތުރުގެ އަތޮޅުތަކާއި ރަށްތަކަށް ފަތުރުވެރިކަން ފުޅާވެ، އިގްތިސާދީ ކުރިއެރުން ލިބި، ތަރައްގީ ވެގެންދާނެކަން ކަށަވަރެވެ. މި ކާގޯ ފެރީ ސާވިސްގެ ސަބަބުން ދިވެހި އެކްސްޕޯޓަރުންނަށް މަހާއި، މަހުގެ ބާވަތްތައް ފަދަ ރާއްޖޭގެ އުފެއްދުންތައް އިންޑިއާގެ ބާޒާރަށާއި، އިންޑިއާ މެދުވެރިކޮށް ޔޫރަޕުގެ ބާޒާރަށް ނެރެވޭނެއެވެ. ކޮޗިން ބަންދަރުން ހަފްތާއަކު އެއްފަހަރު 6500 ޓީ.އީ.ޔޫ ގެ ބަރުދަން އުފުލޭ އުޅަނދެއް ޔޫރަޕަށް ދަތުރުކުރެއެވެ.

މި ކާގޯ ފެރީ ސާވިސްއަކީ އިންޑިއާ އާއި ދިވެހިރާއްޖޭގެ މާކެޓްތައް ގުޅުވާ، ދެގައުމުގެ ވިޔަފާރި އަދި އިންވެސްޓްމެންޓް ކުރުމުގެ ޕޮޓެންޝަލް އިތުރުކޮށް، ގުޅުން ބަދަހި ކުރުމަށް އިންޑިއާއިން ކުރަމުންދާ މަސައްކަތުގެ ތެރެއިން ކޮމިޓްމެންޓްއެކެވެ. އަދި އިންޑިއާގެ ‘ނެއިބަހުޑް ފަސްޓް’ އަދި ރާއްޖޭގެ ‘އިންޑިއާ ފަސްޓް’ ޕޮލިސީ ގެ ނަތީޖާއެވެ.