ކްރިމިނަކް ކޯޓުން ބޭރުކޮށްލި އަދީބުގެ ހަތް ދައުވާ އަލުން ބަލަން ހުކުމް ކޮށްފި

ކުރީގެ ނައިބު ރައީސް އަހްމަދު އަދީބުގެ މައްޗަށް ދައުލަތުން އުފުލި ހަތް ދައުވާ ކްރިމިނަލް ކޯޓުން އަލުން ބެލުމަށް ހައި ކޯޓުން މިއަދު އަމުރުކޮށްފިއެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ބޮޑު ހިޔާނާތާ ގުޅިގެން އަދީބުގެ މައްޗަށް ދައުލަތުން އުފުލި ހަތް ދައުވާ ކްރިމިނަކް ކޯޓުން ބޭރުކޮށްލީ މިދިޔަ ޖުލައި މަހުގެ ތެރޭގައެވެ. އެ ކޯޓުން އެ ދައުވާތައް ބޭރުކޮށްލީ އާ ގާނޫނުލް އުގޫބާތުގެ ދަށުން އަދީބާއި ދައުލަތާ ދެމެދު ހެދި އިއުތިރާފްގެ އެއްބަސްވުން ސައްހަ ނޫން ކަމަށް ކަނޑައަޅަށެވެ.

advertisement

އަދީބުގެ މައްޗަށް ދައުލަތުން އުފުލާފައި ވަނީ ހިޔާނާތުގައި ބައިވެރިވުމުގެ ދެ ދައުވާއަކާއި، މަނީ ލޯންޑަރިންގެ ދެ ދައުވާއަކާއި، ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަމުގެ ދައުވާ އާއި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމުގެ ދައުވާއަކާއި މަގާމުގެ ނުފޫޒު ބޭނުންކޮށްގެން ނާޖާއިޒުފައިދާ ހޯދައިދިނުމުގެ ދައުވާއެކެވެ. ކުރިން އަދީބުގެ މައްޗަށް އުފުލި ގިނަ ދައުވާތަކެއްގެ ބަދަލުގައި ދައުލަތުން އުފުލާ ދައުވާތަކުގެ އަދަދު މަދުކޮށްފައި ވަނީ ދައުލަތަށް އެއްބާރުލުން ދިނުމުގެ އެއްބަސްވުމެއްގައި ސޮއިކުރުމުންނެވެ.

ކްރިމިނަކް ކޯޓުން ދައުވާތައް ބޭރުކޮށްލި މައްސަލަ ހައި ކޯޓުގައި ދައުލަތުން އިސްތިއުނާފުކުރުމުން އެ މައްސަލަ ބަލައި މިއަދު ކުރި ހުކުމުގައި ބުނެފައި ވަނީ އެ ދައުވާތައް ބޭރުކޮށްލި އަސާސް ރަނގަޅު ނޫން ކަމަށެވެ. އެ ގޮތުން ދައުލަތާއި އަދީބާ ދެމެދު ހަދާފައިވާ އިއުތިރާފުގެ އެއްބަސްވުން ސައްހަ ނޫން ކަމަށް ކްރިމިނަކް ކޯޓުން ނިންމި އިރު އެކަން ކަނޑައެޅުމަކީ ކޯޓުގެ ދައުރެއް ނޫން ކަމަށް މިއަދުގެ ހުކުމުގައި ބުނެފައި ވެއެވެ. އަދި އެފަދަ އެއްބަސްވުމާ މެދު ގޮތެއް ނިންމީ ކޯޓުގެ އިސް ނެގުމުން ކަމަށް އެނގެން އޮންނަ ކަމަށާއި ކޯޓުގެ ޒިންމާއަކީ އެފަދަ އެއްބަސްވުމެއް އޮތްތޯ ބެލުން ކަމަށެވެ. އަދި އެފަދަ އެއްބަސްވުމެއް އޮތް ނަމަވެސް ދައުވާ ލިބޭ ފަރާތްތަށް ކޮންމެ ވަގުތެއްގައި ވެސް އެ އެއްބަސްވުމަށް އިންކާރުކޮށް ދޫކޮށްލުމުގެ ހައްގު އޮންނާނެ ކަމަށާއި އެފަދަ އެއްބަސްވުމެއް ހެދި ސަބަބުތައް ހޯދައި އެކަމާ ގުޅޭ އިތުރު ތަހުގީގުތަކެއް ކުރުމަކީ ކޯޓުގެ އިޖުރާއަތެއް ނޫން ކަމަށް ވެސް ހައި ކޯޓުގެ ހުކުމުގައި ވެއެވެ.

ހައި ކޯޓުން އަމުރުކޮށްފައި ވަނީ އެ ހަތް ދައުވާގެ މައްސަލަ އިބްތިދާއީ މަރުހަލާ އިން ފެށިގެން ކުރިއަށް ގެންދިއުމަށާއި މިއަދުން ފެށިގެން 15 ދުވަހުގެ ތެރޭގައި އަދީބުގެ ބަންދާ މެދު ގޮތެއް ކަނޑައެޅުމަށެވެ.

އޭރު ބަންދުގައި ހުރި އަދީބުގެ މައްޗަށް އުފުލި ދައުވާތައް ކްރިމިނަކް ކޯޓުން ބޭރުކޮށްލުމާ އެކު އަދީބު މިނިވަން ވުމަށް މަގު ފަހިވެގެން ދިޔައެވެ. ނަމަވެސް މައްސަލަ އިސްތިއުނާފުކުރުމާ އެކު އިސްތިއުނާފުގެ މައްސަލަ ނިމެންދެން ކޯޓުން ނިންމާފައި އޮތީ ބަންދުގައި ބެހެއްޓުމަށެވެ. މިއަދު ކުރި ހުކުމުގައި ބުނެފައި ވަނީ ކްރިމިނަކް ކޯޓުން ވަކި ގޮތެއް ކަނޑައަޅަންދެން އަދީބު ހުންނަވަންޖެހޭނީ ރިމާންޑް ޖަލެއްގައި ކަމަށެވެ. އެއީ ހައި ކޯޓުން ކުރިން ނެރެފައިވާ އަމުރަކާ ގުޅިގެންނެވެ.    

ކްރިމިނަކް ކޯޓުން އަދީބުގެ ދައުވާތައް ބޭރުކޮށްލީ އަދީބާއި ދައުލަތާ ދެމެދު ހަދާފައިވާ އެއްބަސްވުން ސައްހަ ނޫން ކަމަށް ބަލައިގެން ކަމަށްވީ ނަމަވެސް ހައި ކޯޓުގައި އަދީބު ވިދާޅުވެފައި ވަނީ އެމްއެމްޕީއާރުސީގެ މައްސަލަ ބެލުމަށް ދައުލަތަށް އެއްބާރުލުން ދެއްވާނެ ކަމަށެވެ. އަދި ކްރިމިނަކް ކޯޓުން އެ މައްސަލަތައް އަލުން ބަލަންޖެހޭނެކަން ގަބޫލުކުރައްވާ ކަމަށް ވެސް ވިދާޅުވެފައި ވެއެވެ.

އަދީބުގެ މައްޗަށް އެކި މައްސަލަތަކުގައި 33 އަހަރަށް ވުރެ ގިނަ ދުވަހުގެ ޖަލު ހުކުމްތައް ކުރި ނަމަވެސް އެ މައްސަލަތައް ވަނީ މަތީ ކޯޓުތަކުން ބާތިލްކޮށްފައެވެ.