250 މިލިއަން ޑޮލަރު ރާއްޖެ އަށް ނުދެއްކިއްޖެ ހާލަތެއްގައި ޒިންމާވާނީ އިންޑިއާ އިން!

ކޮވިޑް-19އާ ގުޅިގެން ކުރިމަތިވެފައިވާ އިގްތިސާދީ އަޑިގަނޑުން އަރައިގަތުމަށް އިންޑިއާ ސަރުކާރު މެދުވެރިކޮށް ސްޓޭޓް ބޭންކް އޮފް އިންޑިއާ (އެސްބީއައި) އަށް ވިއްކި 250 މިލިއަން ޑޮލަރު (3.8 ބިލިއަން ރުފިޔާ)އަކީ ދިވެހިންގެ ބޮލުގައި އެޅުވި ބޮޑު ލޯނެއްގެ ގޮތުގައި އިދިކޮޅު ފަރާތްތަކުން ދަނީ ސިފަކުރަމުންނެވެ. އަދި އެއީ އިންޑިއާ އިން ދިން އެހީއެއް ނޫން ކަމާއި އެއީ އެސްބީއައި އިން ދިން އިންޓަރެސްޓް ބޮޑު ލޯނެއް ކަމަށް ދެއްކުމަށް ދަނީ މަސައްކަތްކުރަމުންނެވެ. އެއީ އެހީއެއްގެ ގޮތުގައި ސިފަކުރާތީ ވެސް ސަރުކާރަށް ދަނީ ފާޑުކިޔަމުންނެވެ.

މި ފާޑުކިޔުންތަކަށް ސަރުކާރުން ސީދާ ރައްދެއް ނުދެއެވެ. ނަމަވެސް ފިނޭންސް މިނިސްޓްރީން އާންމުކޮށްފައިވާ މައުލޫމާތުތަކުން މި ކަމަށް ވަރަށް ރަނގަޅު ރައްދެއް ލިބިގެންދެއެވެ. މިފަދަ ހާލަތެއްގައި ދިއްކޮށްލާ ކޮންމެ ލާރިފޮއްޗަކީ ވެސް އެހީއަކަށް ވާއިރު ހަގީގަތުގައި ވެސް 250 މިލިއަން ޑޮލަރަކީ ވަރަށް ބޮޑު އެހީއެކެވެ.

advertisement

މި ލޯނުގެ ތަފްސީލްތައް ބައެއް މީޑިއާތަކުން މިހާރު ވެސް ދަނީ ހާމަކުރަމުންނެވެ. އެ ގޮތުން އޮންލައިން ވެބްސައިޓެއް ކަމަށްވާ ޖަޒީރާނިއުސް.އެމްވީގައި އިތުބާރު ހިފޭ މަސްދަރަކާ ހަވާލާދީ ބުނެފައި ވަނީ އެސްބީއައި އަށް ބޮންޑް ވިއްކާފައި ވަނީ 3.5 ޕަސެންޓްގެ ރޭޓުގައި ކަމަށެވެ. ފިނޭންސް މިނިސްޓްރީގެ ވެބްސައިޓްގައިވާ މައުލޫމާތުތަކަށް ބަލާއިރު މިއީ މިފަދަ ޑޮލަރުގެ ޓްރެޝަރީ ބޮންޑަކަށް ސަރުކާރުން ދައްކާ އެންމެ ކުޑަ އިންޓަރެސްޓެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި 250 މިލިއަން ޑޮލަރުގެ ޓްރެޝަރީ ބޮންޑް ވިއްކާފައި ވަނީ ހަތް ޕަސެންޓްގައެވެ.

އަނެއްކޮޅުން 10 އަހަރުގެ ތެރޭގައި ދައްކަންޖެހޭ ގޮތަށް އެސްބީއައިގެ ރާއްޖެ ގޮފިން 250 މިލިއަން ޑޮލަރު ރާއްޖެ އަށް ދޫކޮށްފައި ވަނީ ސީދާ އިންޑިއާ ސަރުކާރު ޒިންމާވާ ގޮތަށެވެ. އެއްބަސްވުމުގައި ސޮއިކޮށްފައި ވަނީ އިންޑިއާ އިންނެވެ. އެހެންކަމުން މި ފައިސާ ރާއްޖެ އަށް ނުދެއްކިއްޖެ ހާލަތެއްގައި ޒިންމާ ނަގަންޖެހޭނީ އިންޑިއާ ސަރުކާރުންނެވެ.

ރާއްޖެ އަށް ކުރިމަތިވެފައިވާ އިގްތިސާދީ އަޑިގަނޑުން އަރައިގަތުމަށް އިންޑިއާ އިން ގެންދަނީ ގިނަ އެހީތަކެއް ފޯރުކޮށްދެމުންނެވެ. އަދި ތަރައްގީގެ މަޝްރޫއުތަކަށް ވެސް އަންނަނީ ފަންޑްކުރަމުންނެވެ. އެގޮތުން ގުޅިފަޅާއި ވިލިމާލެ އަދި މާލެ ގުޅައިލުމުގެ މަޝްރޫއަށް ވެސް ފަންޑްކުރަނީ އިންޑިއާ އިންނެވެ. މީގެ އިތުރުން ރަށްރަށުގައި ވެސް ތަރައްގީގެ ގިނަ މަޝްރޫއުތަކެއް އަންނީ ހިންގަމުންނެވެ.