އައިޓީއެފްސީ އިން ބީއެމްއެލް އަށް 5 މިލިއަން ޑޮލަރު ދީފި

އިންޓަރނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އިން ބޭންކް އޮފް މޯލްޑިވްސް އަށް ފަސް މިލިއަން ޑޮލަރުގެ މުރާބަހާ ފެސިލިޓީއެއް ހަމަޖައްސައިދީފިއެވެ.

ބީއެމްއެލް އިން ބުނީ އިސްލާމިކް ޑިވެލޮޕްމަންޓް ބޭންކް (އެއިއެސްޑީބީ) ގްރޫޕްގެ މެންބަރެއް ކަމަށްވާ އައިޓީއެފްސީ އިން ދޫކޮށްފައިވާ މި ފެސިލިޓީއަކީ ކުދި އަދި މެދު ފަންތީގެ ވިޔަފާރިތަކަށް އެހީތެރިވުމުގެ ގޮތުން ދޫކޮށްފައިވާ ފެސިލިޓީއެއް ކަމަށެވެ. މި ފެސިޓީގެ މައިގަނޑު މަގުސަދަކީ ބޭރުން މުދާ އެތެރެކުރުމުގައި އަމިއްލަ ވިޔަފާރިތަކަށް އެހީތެރިކަން ފޯރުކޮށްދިނުމެވެ.

advertisement

އެކި ގައުމުތަކުގެ ލޯކަލް ބޭންކްތައް މެދުވެރިކޮށް އައިޓީއެފްސީން އަންނަނީ އަމިއްލަ ވިޔަފާރިތައް ފުޅާކުރުމަށް އެހީތެރިކަން ފޯރުކޮށްދެމުންނެވެ. މި ފެސިލީޓީ ހަމަޖައްސައިދީފައި މި ވަނީ ކޮވިޑް- 19ގެ ސަބަބުން ކުދި އަދި މެދު ފަންތީގެ ވިޔަފާރިތަކަށް ބޮޑެތި ދަތިތައް ކުރިމަތިވެފައިވާ ދަނޑިވަޅެއްގައެވެ.

ބީއެމްއެލްގެ ސީއީއޯ އަދި އެމްޑީ ޓިމް ސޯޔާ ވިދާޅުވީ ކޮވިޑްއާ ގުޅިގެން ވިޔަފާރިތަކަށް ކުރިމަތިވެފައިވާ އިގްތިސާދީ އަޑިގަނޑުން އަރައިގަތުމަށް އެހީތެރިވުމަށް ބީއެމްއެލް އިން އިސްވެ މަސައްކަތްތަކެއް ކުރަމުން އަންނަ ކަމަށެވެ. އަދި މި އައިޓީއެފްސީއާ އެކު މި މަސައްކަތް ކުރިއަށް އޮތްތަނުގައި ފުޅާކުރެވިގެންދާތީ އުފާކުރައްވާ ކަމަށް ވެސް ސޯޔާ ވިދާޅުވިއެވެ.

އައިޓީއެފްސީގެ ސީއީއޯ، ހާނީ ސަލިމް ސޮންބޯލް ވިދާޅުވެފައި ވަނީ ކުދި އަދި މެދު ފަންތީގެ ވިޔަފާރިތައް ފުޅާކުރުމަށް ބީއެމްއެލްއާ އެކު ބައިވެރިއެއްގެ ގޮތުގައި މަސައްކަތްކުރުމަށްޓަކައި ފަހުރުވެރިވާ ކަމަށާއި އައިޓީއެފްސީގެ މައިގަނޑު އަސާސްތަކުގެ ތެރޭގައި ބީއެމްއެލް ފަދަ މާލީ އިދާރާތައް މެދުވެރިކޮށް ކުދި އަދި މެދު ފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުން ހިމެނޭ ކަމަށެވެ.

އައިޓީއެފްސީގެ މި އެހީއަކީ އައިއެސްޑީބީ ގްރޫޕް ކޮވިޑް-19 ރެސްޕޮންސް ޕެކޭޖްގެ ދަށުން ކޮވިޑްގެ ބަލިމަޑުކަމުން އަރައިގަތުމަށް އޯއައިސީގެ ގައުމުތަށް ކަމަށްވާ ބަންގްލަދޭޝް، މިސްރު، ކިރިގިސްތާނު، ސެނެގާލް އަދި ރާއްޖެ ހިމެނޭ ގޮތަށް ދެމުން އަންނަ އެހީއެކެވެ. އެ ގޮތުން ކާބޯތަކެއްޗާއި ބޭހުގެ އިތުރުން ދަނޑުވެރިކަމަށް ބޭނުންވާ ގަސްކާނާ ފަދަ ބާވަތްތައް ހޯދުމަށް މާލީ އެހީތެރިކަން ފޯރުކޮށްދޭނެއެވެ.

ކޮވިޑްއާ ގުޅީގެން ބީއެމްއެލް އިން މިހާރު ވެސް އަންނަނީ ގިނަ އެހީތަކެއް ވިޔަފާރިތަކަށާއި އަމިއްލަ ފަރުދުންތައް ފޯރުކޮށްދެމުންނެވެ. އެ ގޮތުން އިގްތިސާދީ އަޑިގަނޑުން އަރައިގަތުމަށް ލޯނު ދިނުމަށް ކުރިން ދޫކޮށްފައިވާ ލޯނުތަކަށް ފައިސާ ދެއްކުން ފަސްކުރުން ފަދަ ލުއިތައް އަންނަނީ ދެމުންނެވެ.