މޯލްޑިވްސް ވަރޗުއަލް ޓުއަރގެ ސީޕްލޭން ޕާޓްނަރަކަށް ޓީއެމްއޭ ހަމަޖައްސައިފި

މޯލްޑިވްސް ވަރޗުއަލް ޓުއަރގެ ސީޕްލޭން ޕާޓްނަރަކަށް ޓްރާންސް މޯލްޑިވިއަން އެއަރވޭސް، ޓީއެމްއޭ ހަމަޖައްސައިފިއެވެ.

މޯލްޑިވްސް ވަރޗުއަލް ޓުއަރއަކީ ރާއްޖޭގެ މަންޒަރުތައް 360 ޑިގްރީގައި ވަރޗުއަލްކޮށް ފެންނާނެ ޓުއަރއެކެވެ. މި ޓުއަރގެ ތެރެއިން ރާއްޖޭގެ 150 އާއި ގާތްކުރާ އަދަދަކަށް ރަށުގެ 2000 ޓުއަރ ހަދާނެއެވެ.

advertisement

މޯލްޑިވްސް ވަރޗުއަލް ޓުއަރ ގެ ސަބަބުން ފަތުރުވެރިން ރާއްޖެ އައުމުގެ ކުރިން އެމީހުންނަށް ރާއްޖޭގެ ރީތި މަންޒަރުތައް ވާޗުއަލްކޮށް ފެންނާނެއެވެ.  

ޓީއެމްއޭއާއިއެކު ވެވުނު އެއްބަސްވުމުގެ ދަށުން މޯލްޑިވްސް ވަރޗުއަލް ޓުއަރގައި އިޝްތިހާރުކުރާ ރާއްޖޭގެ ރީތި މަންޒަރުތައް ނަގަން ރާއްޖޭގެ އެއްތަނުން އަނެއްތަނަށް ދަތުރުކުރުމަށް ޓީއެމްއޭއިން އެހީތެރިވެދޭނެއެވެ.

މި އެއްބަސްވުމާއި ގުޅޭގޮތުން ވާހަކަދައްކަވަމުން ޓީއެމްއޭގެ ސީއީއޯ ފައުޒީ ވިދާޅުވީ، އޯރކާ މީޑިއާއިން ކުރިއަށްގެންދާ މޯލްޑިވްސް ވަރޗުއަލް ޓުއަރ ޕްރޮޖެކްޓް ކާމިޔާބުކުރުމަށް ޕާޓްނަރެއްގެ ގޮތުގައި މަސައްކަތްކުރުމަކީ ލިބޭ އުފަލެއްކަމަށެވެ. ޓީއެމްއޭއިން މިހާރުވެސް ރާއްޖޭގެ 80 ރިސޯޓަށް ދަތުރުކުރާކަން ފާހަގަކުރައްވައި އޭނާ ވިދާޅުވީ، މި ޕްރޮޖެކްޓަށް އެހީވުމަށް ޓީއެމްއޭގެ ފުރިހަމަ އެއްބާރުލުން ލިބޭނެކަމަށެވެ. މި ޕްރޮޖެކްޓްގެ ސަބަބުން ދުނިޔޭގެ އެކި ކަންކޮޅުތަކުގައި ތިބި މީހުންނަށް ރާއްޖެ އިޝްތިހަރުވެގެންދާނެކަން އޭނާ ފާހަގަކުރެއްވިއެވެ.

މޯލްޑިވްސް ވަރޗުއަލް ޓުއަރ ޕްރޮޖެކްޓް ރަސްމީކޮށް ލޯންޗްކުރުމަށް ހަމަޖެހިފައިވަނީ މިއަހަރުގެ ޓީޓީއެމް ޓްރެވެލް ސަމިޓްގެ ތެރެއިންނެވެ. މި ޕްރޮޖެކްޓް ނިންމުމަށް ހަމަޖެހިފައިވަނީ އަންނަ އަހަރުގެ ތެރޭގައެވެ.

މޯލްޑިވްސް ވަރޗުއަލް ޓުއަރ އަކީ އޯރކާ މީޑިއާއިން ކުރިއަށްގެންދާ ޕްރޮޖެކްޓެކެވެ. މި ޕްރޮޖެކްޓްގައި ޓޫރިޒަމް މިނިސްޓްރީއާއި މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަންއިންވެސް ވަނީ ބައިވެރިވެފައެވެ.