އިސްލާމިކް ޔުނިވާސިޓީ އާއި ބްރޮޑްކޮމް ގުޅިގެން ނޫސްވެރިން ތަމްރީންކުރަނީ

ނޫސްވެރިންގެ ފެންވަރު ރަނގަޅުކޮށް ސުލޫކީ މިންގަނޑަށް އަހުލުވެރިކުރުވުމުގެ ތަމްރީން ޕްރޮގްރާމްތައް ހިންގުމަށް އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އާއި މޯލްޑިވްސް ބްރޯޑްކާސްޓިން ކޮމިޝަންއާ ދެމެދު މެމޯރަންޑަމް އޮފް އަންޑަސްޓޭންޑިންގ (އެމްއޯޔޫ) އެއްގައި ސޮއިކޮށްފިއެވެ.

އައިޔޫއެމްގައި މިއަދު އޮތް ރަސްމިއްޔާތުގައި އެ ޔުނިވާސިޓީގެ ފަރާތުން ސޮއިކުރެއްވީ ވައިސް ޗާންސެލާ ޑރ. އިބްރާހީމް ޒަކަރިއްޔާ މޫސާއެވެ. ބްރޮޑްކޮމްގެ ފަރާތުން ސޮއިކުރެއްވީ އެ ކޮމިޝަންގެ ރައީސް މަރިޔަމް ވަހީދާއެވެ.

advertisement

ތިން އަހަރު ދުވަހުގެ މުއްދަތަށް ވެވޭ މި ފަހުމުނާމާގެ ދަށުން، އިސްލާމީ އުޞޫލުތަކަށާއި ދިވެހި ޤައުމިއްޔަތަށާއި ދިވެހިބަހަށް ނޫސްވެރިން އަހުލުވެރިކުރުވުމާއި، ދިވެހި މީޑިއާ ހެޔޮ ގޮތުގައި ދަމަހައްޓައިދޭނެ ޒިންމާދާރު ނޫސްވެރިން އުފެއްދުމާއި، މީޑިއާގައި ހުރި މައްސަލަތައް ދެނެގަތުމަށްޓަކައި، އިލްމީ ދިރާސާތައްކޮށް ނޫސްވެރިކަމުގެ ވެށި ކުރިއެރުވުމުގެ އިތުރުން ނޫސްވެރިންގެ ގަދަރު މަތިކޮށް މުޖުތަމައުގެ އިތުބާރާއި ޔަގީންކަން ކަށަވަރުކޮށްދިނުމަށް ދެ ފަރާތް ގުޅިގެން ގިނަ މަސައްކަތްތަކެއް ކުރުމަށް ވެސް އަމާޒު ކަނޑައަޅާފައި ވެއެވެ.

ސޮއިކުރެއްވުމަށް ފަހު ރަސްމިއްޔާތުގައި ވާހަކަ ދައްކަވަމުން ޑރ. ޒަކަރިއްޔާ ވިދާޅުވީ މުޖުތަމައުގެ ވިސްނުމާއި އަދަބު އަހްލާގު ބަދަލުކުރުމުގައި މީޑިއާގެ ދައުރު ވަރަށް ބޮޑު ކަމަށެވެ. އިސްލާމީ މުޖުތަމައުއެއްގައި އަދަބު އަހްލާގު ގެންގުޅެންވީ ގޮތް ބުނެދިނުމުގައި މީޑިއާ އިން މުހިންމު ދައުރެއް އަދާކުރާ އިރު މީޑިއާގެ ފަރާތްތައް އެކަމަށް ހޭލުންތެރިކޮށް އެ ފަރާތްތަކަށް ތަމަރީން ދިނުން މުހިންމު ކަމަށާއި މި ފަހުމްނާމާގެ ސަބަބުން މުސްތަގުބަލުގައި ރަނގަޅު މަސައްކަތްތަކެއް ކުރެވިގެންދާނެ ކަމަށެވެ.

މި ރަސްމިއްޔާތުގައި ވާހަކަ ދައްކަވަމުން ކޮމިޝަންގެ ރައީސް މަރިޔަމް ވަހީދާ ވިދާޅުވީ ބްރޯޑްސްކާސްޓިން އަދި ރީބްރޯޑްކާސްޓިން ދާއިރާ ތަރައްގީކުރުމަކީ ކޮމިޝަންގެ މައްޗަށް ގާނޫނީ ގޮތުން މަތިކޮށްފައިވާ ކަމަށްކަށްވާ އިރު މީޑިއާ ދާއިރާގައި މަސައްކަތްކުރާ ފަރާތްތަކަށް ތަމްރީން ޕްރޮގްރާމްތައް ހިންގައި މީޑިއާގެ ސުލޫކީ މިންގަނޑައަށް އަހުލުވެރިކުރުވުމަކީ ކޮމިޝަންގެ މިހާރުގެ ވަރަށް ބޮޑު އަމާޒެއް ކަމަށެވެ.

ައިޔޫއެމް އާއި ބްރޮޑްކޮމްއާ ދެމެދު މިއަދު ސޮއިކުރި އެމްއޯޔޫގެ ދަށުން މީޑިއާގެ ސުލޫކީ މިންގަނޑަށް އަހުލުވެރިކުރުވުމުގެ ވޯކްޝޮޕެއް އަންނަ މަހުގެ ތެރޭގައި ކުރިއަށް ގެންދިއުމަށް ވަނީ ހަމަޖައްސާފައެވެ. އަންނަ މަހުގެ 2 އިން 4 އަށް ކުރިއަށް ގެންދާ މި ވޯކްޝޮޕްގައި ބައިވެރިވުމުގެ ފުރުސަތު މިހާރު ވަނީ ހުރިހާ މީޑިއާތަކަށާއި މީޑިއާ އަށް ޝައުގުވެރިވާ ފަރާތްތަކަށް ހުޅުވާލާފައެވެ. މި ވޯކްޝޮޕްގައި އައިޔޫއެމްގެ ތަޖުރިބާކާރުންނާއި ކޮމިޝަންގެ މެންބަރުންނާއި ކަމާ ބެހޭ ދާއިރާގެ ތަޖުރިބާކާރުން ސެޝަންތައް ނަންގަވައިދެއްވާނެއެވެ.