އެމެރިކާ އިން ރާޢްޖެ އަށް 60 ވެންޓިލޭޓަރު ހަދިޔާކޮށްފި

ކޮވިޑް -19 ކޮންޓްރޯލްކުރުމަށް ރާއްޖެއިން ކުރަމުން އަންނަ މަސައްކަތަށް އެހީތެރިވުމުގެ ގޮތުން އެމެރިކާ އިން ރާއްޖެ އަށް 60 ވެންޓިލޭޓަރު ހަދިޔާކޮށްފިއެވެ.

ކްރިޓިކަލް ކެއާ ވެންޓިލޭޓަރުތައް ރާއްޖެއާ ހަވާލުކޮށްދެއްވީ މިއަދު ބޭއްވި ވާޗުއަލްް ރަސްމިއްޔާތެއްގައި، އެމެރިކާ އިން ރާއްޖެއަށާއި ސްރީ ލަންކާ އަށް ކަނޑައަޅާފައި ހުންނަވާ ސަފީރު އެލައިނާ ޓެޕްލީޒްއެވެ. ރާއްޖޭގެ ފަރާތުން ވެންޓިލޭޓަރުތަކާ ހަވާލުވެވަޑައިގަތީ ފޮރިން މިނިސްޓަރު އަބްދުﷲ ޝާހިދެވެ.

advertisement

މި ރަސްމިއްޔާތުގައި ވާހަކަ ދައްކަވަމުން އެމެރިކާގެ ސަފީރު އެލައިނާ ވިދާޅުވީ ކޮވިޑްގެ ހާލަތުން ސަލާމަތްވުމަށް ދުނިޔޭގެ އެކި ގައުމުތަކުން ކުރަމުން އަންނަ މަސައްކަތަށް އެމެރިކާ އިން ވަރަށް ބޮޑު އެހީތެރިކަމެއް ފޯރުކޮށްދެމުން އަންނަ ކަމަށާއި އެ ގޮތުން އެ ކަމަށް ވިހި ބިލިއަން ޑޮލަރު ހަމަޖައްސާފައިވާ ކަަމަށެވެ. މި ބަޖެޓްގެ ތެރެއިން ރާއްޖެ އަށް ހަދިޔާކުރި ވެންޓިލޭޓަރު ތަކަކީ ފެންވަރު ރަނގަޅު އާލާތްތަކެއް ކަމަށާއި އެހެން ކަމުން ފެނަވަރު ރަނގަޅު ފަރުވާއެއް ދެވޭނެ ކަމަށެވެ. އަދި އެ ތަކެތި ބޭނުންކުރުމަށް ފަންނީ އެހީ ވެސް އެމެރިކާ އިން ފޯރުކޮށްދޭނެ ކަމަށް ސަފީރު ވިދާޅުވިއެވެ.

އެމެރިކާ އިން މި ވެންޓިލޭޓަރުތައް ރާއްޖެ އަށް ހަދިޔާކޮށްފައި ވަނީ މީގެ ކުރިން ވެސް ރާއްޖެ އަށް ގިނަ އެހީތަކެއް ފޯރުކޮށްދީފައިވާ ޔޫއެސް އެޖެންސީ ފޯ އިންޓަނޭޝަން ޑިވެލޮޕްމެންޓް (ޔޫއެސްއެއިޑް) މެދުވެރިކޮށެވެ.

މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝާހިދު ވިދާޅުވީ މި ވެންޓިލޭޓަރުތަކުގެ ސަބަބުން ރާއްޖޭގެ ސިއްހީ ހާލަތު ރަނގަޅުވެ އައިސީޔޫގެ ކެޕޭސިޓީ އިތުރުވެގެންދާނެ ކަމަށެވެ. އަދި މިއީ ދެ ގައުމުގެ ގުޅުން ބަދަހިކަން ދައްކުވައިދޭ ކަމެއް ކަމަށް ވެސް ޝާހިދު ވިދާޅުވިއެވެ.

މީގެ ކުރިން ވެސް އެމެރިކާ އިން ވަނީ ކޮވިޑްއާ ގުޅުގެން ތަފާތު އެހީތައް ފޯރުކޮށްދީފައެވެ.