އަންނަ މަހު އެންޓިބޮޑީ ޓެސްޓް ހެދުމަށް މިދަނީ މަސައްކަތްކުރަމުން – ޑރ ނަޒްލާ

ރާއްޖޭގައި ކޯވިޑް-19 ޖެހި، ބަލިން ރަނގަޅުވެފައިވަނީ ކިހާ އަދަދެއްގެ މީހުންނެއްތޯ ދެނެގަތުމަށް އަންނަ މަހުގެ ތެރޭގައި އެންޓިބޮޑީ ޓެސްޓު ހެދުމަށް ތައްޔާރުވަމުންދާކަމަށް ހެލްތް އިމަރޖެންސީ އޮޕަރޭޝަން ސެންޓަރު އެޗް.އީ.ސޯ.ސީން ވިދާޅުވެއްޖެއެވެ.

އެޗް.އީ.ސޯ.ސީގެ ތަރުޖަމާން ޑރ. ފާތުމަތު ނަޒްލާ ރަފީޤު ވިދާޅުވީ މުޖުތަމަޢުގެ ތެރޭގައި ކޯވިޑް-19 އަށް އެކްސްޕޯޒްވެފައިވާ މީހުންގެ އިންސައްތަ ދެނެގަތުމަށް ކުރިއަށްގެންދާ މި ދިރާސާއަކީ ވަރަށް ބުރަ މަސައްކަތެއްކަމަށެވެ. އަދި މި މަސައްކަތް އަންނަ އޮކްޓޯބަރުމަހުގެ ތެރޭގައި ފެށުމަށް ތައްޔާރުވަމުންދާކަމަށެވެ. ޑރ. ނަޒްލާ ވިދާޅުވީ ދިރާސާއެއްގެ ގޮތުގައި އެންޓިބޮޑީ ޓެސްޓް ހެދުމަށް ވާންޖެހޭ ތައްޔާރީތައް އެ ސެންޓަރުން ވަމުންދާކަމަށެވެ. އެގޮތުން އެކަމަށް ބޭނުންވާ ސްޓަޑީ ޕްރޮޕޯސަލް ތައްޔާރުކޮށް ހެލްތު މިނިސްޓްރީގެ ދަށުން ހިންގާ ހެލްތު ރިސަރޗް ކޮމެޓީއަށް ހުށަހަޅާ، އެ ޕްރޮޕޯސަލް ފާސްވެފައިވާކަމަށެވެ. އަދި އެންޓިބޮޑީ ޓެސްޓް ހެދުމަށް އިދާރީގޮތުން ވާންޖެހޭ ތައްޔާރީތައް ވަމުންދާކަމަށްވެސް ޑރ.ނަޒްލާ ވިދާޅުވިއެވެ.

ކޯވިޑް-19 ހުރިކަން ދެނެގަތުމަށް މިވަގުރު ރައްޖޭގައި ހަދަމުންދަނީ ޕީ.ސީ.އާރް ޓެސްޓެވެ.

advertisement