ރާއްޖެއަންނަ ފަތުރުވެރިންގެ އަދަދު އިތުރުކުރުމަށް މޯލްޑިވްސް ބޯޑަރ މައިލްސް ލޯންޗްކޮށްފި

“މޯލްޑިވްސް ބޯޑަރ މައިލްސް” ލޯންޗްކޮށްފިއެވެ. ދުނިޔޭގެ ފަތުރުވެރިކަމުގެ ދުވަހާއި ގުޅުވައިގެން ރާއްޖެއިން ތައާރަފްކުރި މި ޕްރޮގުރާމްއަކީ މުޅި ދުނިޔޭގައިވެސް މިފަދަ ގޮތަކަށް ތައާރަފްކުރި ފުރަތަމަ ޕްރޮގުރާމެވެ.

މޯލްޑިވްސް ބޯޑަރ މައިލްސް ޕްރޮގުރާމް ލޯންޗްކޮށްފައިވަނީ ރާއްޖެ އަންނަ ފަތުރުވެރިންގެ އަދަދު އިތުރުކޮށް ތަކުރާރުކޮށް ފަތުރުވެރިން ރާއްޖެއަށް އައުމަށް މަގުފަހިކުރުމުގެ ގޮތުންނެވެ.

advertisement

މޯލްޑިވްސް ބޯޑަރ މައިލްސް” ޕްރޮގްރާމް މެދުވެރިކޮށް ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަ ކަންތައްތަކެއް ތަޢާރަފުކުރެވިގެންދާނެއެވެ. އެގޮތުން ފަތުރުވެރިން ބޯޑަރު ހުރަސްކުރާ ކޮންމެ ފަހަރަކު ޕޮއިންޓް ލިބޭއިރު، ޚާއްސަ މުނާސަބަތުތައް ފާހަގަކުރަން ރާއްޖެ އަންނަނަމަ އިތުރަށް ޕޮއިންޓް ލިބިގެންދާނެއެވެ.

މި ޕޮއިންޓްތަކުގެ ސަބަބުން އެކި އޮފަރތަކާއި، ޓިއާ މަތިކުރެވޭނެއެވެ. މި ޓިއާތައް ބަހާލާފައިވަނީ 3 ގޮތަކަށެވެ. އެގޮތުން ބްރޮންޒް އަށް ދީފައިވާ ނަމަކީ “އައިދަ” އެވެ. ސިލްވަރ އަށް “އަންތަރަ” ކިޔާއިރު ގޯލްޑް އަށް ކިޔަނީ “އަބާރަނަ” އެވެ. މިއާއެކު ފަތުރުވެރިންނަށް ޚާއްސަ ޙިދުމަތްތަކެއް ލިބިގެންދާނެއެވެ. މި ޕްރޮގްރާމަށް ޢަމަލުކުރަންފަށާނީ އަންނަ ޑިސެމްބަރުމަހުގެ ފުރަތަމަ ދުވަހުންފެށިގެންނެވެ.

މޯލްޑިވްސް ބޯޑަރ މައިލްސް އިފްތިތާހްކޮށްދެއްވައި ވާހަކަދައްކަވަމުން ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވީ، ފަތުރުވެރިކަމުގެ މަންފާ ރައްޔިތުންނަށް އެންމެ ބޮޑަށް ލިބިގެންދާނީ ގިނަ ދިވެހިން ފަތުރުވެރިކަމުގެ ވެރިންނަށް ވެގެންކަމަށެވެ. ރަށްރަށުގެ ކުދި ހޮޓާތަކާއި ގެސްޓް ހައުސްތައް އަދި ރާއްޖޭގެ އެހެން ޓޫރިސްޓް ޚިދުމަތްދޭ ތަންތަން ފައިދާއެއް ލިބޭގޮތަށް ހިންގައިގަނެގެންކަމަށެވެ. ފަތުރުވެރިކަމުގެ ދާއިރާގައި ދިވެހިން އަދާކުރާ ހިތް ވާ ބޮޑެތި މުސާރަ ލިބޭ ވަޒީފާތައް ދިވެހިންނަށް ހޯދައިދިނުމުގެ މަސައްކަތް މި ސަރުކާރުން ކުރާނެކަމަށް މިނިސްޓަރ ވަނީ ވިދާޅުވެފައެވެ.

މޯލްޑިވްސް ބޯޓަރ މައިލްސްއަކީ މޯލްޑިވްސް އިމިގްރޭޝަނުން އިސްނަގައިގެން ޓޫރިޒަމް މިނިސްޓްރީއާއި ގުޅިގެން ތަޢާރަފުކުރި ޕްރޮގުރާމެކެވެ. މި ޕްރޮގްރާމުގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯރޕަރޭޝަން، އެމް.އެމް.ޕީ.އާރް.ސީއާއި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލް ވަނީ ޕާޓްނަރުންގެ ގޮތުގައި ބައިވެރިވެފައެވެ.