ފްލެޓާއި ހައުސިންގ ޔުނިޓުތަކަށް ކުލި ދެއްކުން އިތުރު 3 މަހަށް ހައުސިންގ މިނިސްޓްރީން ފަސްކޮށްދީފި

ގެދޮރުވެރިކުރުން ޕްރޮގްރާމްގެ ދަށުން ދޫކޮށްފައިވާ ފްލެޓާއި ހައުސިންގ ޔުނިޓުތަކުން ސަރުކާރަށް ދައްކަންޖެހޭ ކުލި އިތުރު 3 މަސް ދުވަހަށް ފަސްކޮށްދީފިއެވެ.

ކޯވިޑް19 ގެ ސަބަބުން ގެދޮރުވެރިކުރުން ޕްރޮގުރާމްގެ ދަށުން ދޫކޮށްފައިވާ ފްލެޓާއި ހައުސިންގ ޔުނިޓްތަކުން ސަރުކާރަށް ދައްކަންޖެހޭ ކުލި ވަނީ މިދިޔަ މާރޗު މަހުން ފެށިގެން 6 މަސް ދުވަހުގެ މުއްދަތަކަށް ފަސްކޮށްދީފައެވެ. މީގެތެރޭގައި މާލެ، ހުޅުމާލެ އަދި އޮތޮޅުތަކުން ދޫކޮށްފައިވާ ފްލެޓާއި ހައުސިންގ ޔުނިޓްތައް ހިމެނެއެވެ. މާރޗް މަހުން ފެށިގެން ދިން 6 މަސްދުވަހުގެ މުއްދަތު 31 އޮގަސްޓް އަށް ވަނީ ހަމަވެފައެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ވިދާޅުވީ، ވަރަށް ގިނަ ފަރާތްތަކަކުން މުއްދަތު އިތުރު ކޮށްދިނުމަށް އެދެމުންދާތީ ކުލި ދެއްކުމުގެ މުއްދަތު އަނެއްކާވެސް އިތުރުކޮށްދީފައިވާކަމަށެވެ. އެގޮތުން މިނިސްޓްރީން މިހާރު ވަނީ ސެޕްޓެމްބަރ މަހުން ފެށިގެން އިތުރު 3 މަހަށް ކުލި ނެގުން ފަސްކުރުމަށް ނިންމާފައެވެ. ކުލި ދެއްކުން ފަސްކޮށްފައިވީނަމަވެސް ކުލި ފަސްކުރާ މުއްދަތުގައި މެއިންޓަނެންސް ފީ ދައްކަންޖެހޭނެ ކަމަށް ހައުސިންގ މިނިސްޓްރީން ވިދާޅުވެއެވެ. އަދި ކުލި ފަސްކުރާ މުއްދަތު އެގްރީމެންޓަށް އިތުރުކުރެވޭނެކަމަށްވެސް އެ މިނިސްޓްރީން ވިދާޅުވެއެވެ.

ކުލި ފަސްކުރުމަށް ބޭނުންވާ ފަރާތްތަކުން 15 އޮކްޓޯބަރު 2020 ވާ ބުރާސްފަތި ދުވަހުގެ މެންދުރު 13:00 ކުރިން އައި.ޑީ.ކާޑުގެ ކޮޕީއާއި ހައުސިންގ މިނިސްޓްރީއާއެކު ކޮށްފައިވާ އެގްރީމެންޓް ނަމްބަރު އެނގޭނެގޮތަށް އެ މިނިސްޓްރީގެ އީމެއިލް އަށް މެއިލްކުރެއްވުމަށް ހައުސިންގ މިނިސްޓްރީން ވަނީ އަންގަވާފައެވެ.

advertisement