ދިރިއުޅުމަށް ވަނީ ލަސްތަކެއް އައިސްފައި، ހަރަކާތެރި ދިރިއުޅުމެއް މުހިންމު: ރައީސް

ކޮވިޑް-19 އާ ގުޅިގެން ދިރިއުޅުމަށް ލަސްތަކެއް ގެނުވައިފި ކަމަށާއި ނަމަވެސް ހިތުގެ ބަލިފަދަ ބަލިތަކުން ރައްކާތެރިވުމަށް ހަރަކާތްތެރި، ސިއްހަތަށް ފައިދާހުރި ގޮތަށް ދިރިއުޅުމުގެ ވައްޓަފާޅި ބަދަލުކުރަންޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.

ބައިނަލްއަގުވާމީ ހިތުގެ ދުވަހުގެ މުނާސަބަތުގައި ރައީސް ސޯލިހް މިއަދު ކުރެއްވި ޓްވީޓެއްގައި ވިދާޅުވީ ހިތުގެ ބަލިން ދިފައުވުމަށް ހިތް ހަރަކާތްތެރިވާންޖެހޭ ކަމަށާއި ހަރަކާތެރިވެ އުޅުން މުހިންމު ކަމަށެވެ. ކޮވިޑްގެ ސަބަބުން އެންޒައިޓީ އާއި ސްޓްރެސްއަކީ ކޮންމެ ދުވަހަކު ތަހައްމަލުކުރަންޖެހިފައިވާ ކަންތައްތަކުގެ ގޮތުގައި އެމަނިކުފާނު ފާހަގަކުރެއްވިއެވެ.

advertisement

ކޮވިޑްގެ މިހާތަލުން އަރައިގަތުމަށް މަސައްކަތްކުރަމުންދާ އިރު ހިތުގެ ބަލިތަކުން ރައްކާތެރިވުމަށް ލޯތްބާއި އަޅާލުން މުހިންމު ކަމުގައި އެމަނިކުފާނު ވިދާޅުވިއެވެ.

ބައިނަލްއަގުވާމީ ހިތުގެ ދުވަހާ ދިމާކޮށް ޓައިނީ ހާޓްސް އޮފް މޯލްޑިވްސް އާއި ދައުލަތުގެ އިދާރާތައް ގުޅިގެން އެހެން އަހަރުތަކުގައި ގިނަ ހަރަކާތްތަކެއް ހިންގައެވެ. ނަމަވެސް ކޮވިޑްގެ މި ހާލަތުގައި މިފަހަރު ހަރަކާތްތައް ކުރިއަށް ގެންގޮސްފައި ވަނީ ވާޗުއަލްކޮށެވެ. އެ ގޮތުން ސޯޝަލް މީޑިއާ މެދުވެރިކޮށް ވަނީ ކެމްޕެއިނެއް ކުރިއަށް ގެންގޮސްފައެވެ.